Manipud Kadagiti Agbasbasa

Pakaammo: Nagadu nga agbasbasa ti natignay nga agsurat gapu iti serye a “Panangtarus iti Mood Disorder,” a mabasa iti ruarmi nga Enero 8, 2004. Dagiti sumaganad a surat ket pagarigan laeng ti adu a naawatmi.

Adun nga artikulo ti nabasak kadagiti magasinyo a nangpikapik kaniak, ngem daytoy pay la a serye ti nangtukay unay kaniak. Bayat a binasak ti maipapan kadagiti kakabsattayo nga agsagsagaba kadagitoy a sakit, naasianak kadakuada. No adda man naibagak idi a nangsair kadakuada, sapay koma ta mapakawandak. Pangngaasiyo ta itultuloyyo ti agipablaak kadagiti artikulo a kas kadagitoy. Dagitoy ti makatulong kadatay amin tapno agbalintayo nga ad-adda a managayat ken mannakaawat.

S. W., Estados Unidos

Impagarupko no naan-anayen a nadadael ti biagko idi nadayagnos nga addaanak iti bipolar disorder. Nagsangitak iti kasta unay, ngem immararawak met ken Jehova. Ita a lawas, naawatko ti sungbat dagiti kararagko​—ti Agriingkayo! maipapan iti mood disorder. Kas man la inulesannak ni Jehova iti naimeng kabayatan ti tiempo ti lam-ek. Gapu kadagitoy nga artikulo, naturedakon nga agbiag.

R. T., Canada

Ti 12 ti tawenna nga anakmi a lalaki ket nadayagnos nga addaan iti bipolar disorder tallo a tawenen ti napalabas. Masansan a mariknana nga awan ti makatarus kadagiti parikutna ken saan a maseknan kenkuana ni Jehova. Idi impakitami kenkuana dagitoy nga artikulo, dagus a binasana ida. Aglulua a kinunana: “Nanang, adda dadduma a tattao a pudno a makaawat, ken maawatannak gayam ni Jehova.” Naragsakan ti doktorna a nangakseptar iti magasin, ken siraragsak a nagsaritaanmi ti Biblia.

L. P., Estados Unidos

Sipapasnek nga inkararagko ken Jehova a maipablaak koma ti impormasion maipapan iti bipolar disorder. Ita, dua a bulan kalpasanna, naawatko ti Enero 8, 2004, a ruar ti Agriingkayo! Gapu kadagiti praktikal a singasingyo, nabaelak a parang-ayen ti serbisiok ken Jehova.

M. S., Mexico

Inusarko ti impormasion iti daytoy a serye agpaay iti maysa a proyekto iti kolehio. Ti manangaywan iti programa ti departamento a mangtartarawidwid kadagiti addaan iti naisangsangayan a kasapulan ket nagkiddaw iti kopia dayta tapno usarenna a mangisuro kadagiti kameng ti departamento maipapan iti bipolar disorder. Itultuloyyo ti nagsayaat a trabahoyo. Adu ti matultulongan.

K. R., Estados Unidos

Silalawag nga impaganetgetyo ti kinapateg ti ditay koma pannakariro iti nagdumaan ti sakit ken iti tao a mismo. Dagitoy nga artikulo ti makatulong kadakami a panglakayen iti kongregasion tapno maawatanmi dagiti kasasaad ti kakabsat a mangib-ibtur kadagitoy a sakit ken tapno makatulongkami kadakuada.

R. P., Italia

Ni manangko ket agsagsagaba iti major depression. Nagsangitak idi nabasak dagitoy nga artikulo agsipud ta naamirisko nga adda idi nasaok a mangipasimudaag iti kinaignorantek iti kasasaadna. Ammok itan a saan la a rumbeng nga itultuloyko a tulongan ni manangko no di ket siaanus nga ikagumaak a tarusan.

D. P., Estados Unidos

Amin a nabasak iti daytoy a serye ti nangdeskribir iti kasasaadko. Nakasangitak ken medio nabang-aranak maipapan iti pannakakonsiensiak. Inikkak iti kopia ti doktorko a kanayon a mangparparegta kaniak a naynay a surotek dagiti patpatiek.

A. L., Francia

Agtawenak iti 13. Namin-adun a kayatko ti matay. Talaga a tinulongannak ti Agriingkayo! tapno diak agpakamatay. Ammokon a talaga a maseknan ni Jehova ken dengdenggennatayo!

M. S., Estados Unidos

Kanayon idi nga ibilangko a managimbubukodan ti depression, ken maysa a banag a nasken laeng nga iwaksi ti maysa a tao. Ngem kalpasan a nabasak dagitoy nga artikulo, naamirisko a no diak ikabilangan ti rikna ti sabsabali, kinaagpaysuanna, siak gayam ti managimbubukodan.

R. N., Estados Unidos

 Pagyamanan iti daytoy nagsayaat ti pannakaisuratna a serye. Nangipaay iti nagsayaat a pangibasaran iti panangagas. Maysaak nga estudiante iti kinadoktor iti sikolohikal a panangbalakad, isu nga usarekto ti artikulo kadagiti klientek.

P. Y., Estados Unidos

Nasurok a sangapulo a tawenen nga ib-ibturak ti depression. Dinakamat dagitoy nga artikulo ti pagimbagan ti panagsurat iti diary, ket kayatko a padasen dayta. Adda Kristiano a gayyemko a mangirekrekord kadagiti gimong para kaniak kadagiti aldaw a diak makatabuno, ket pudno a makatulong dayta.

M. S., Japan

Sangapulo a tawenen nga ib-ibturak dagitoy a sintoma. Namin-adun a nabasak dagiti artikulo ken inadalko ida a naimbag a kadua ni lakayko. Dagitoy ti nakatulong tapno pagsaritaanmi ti maipapan kadagiti riknak ken ad-adda nga asikasuenmi ti maysa ken maysa.

I. H., Hungary

Babbabalawennak ti mismo a pamiliak agingga a kayatko payen ti agpakamatay. Ngem daytoy a serye ti nangted kaniak iti namnama, ta naammuak a maawatannak ni Jehova. Ita, tumabtabunoak manen kadagiti Nakristianuan a gimong ken makipaspasetak iti ministerio.

M. B., Estados Unidos

Maliwliwaak iti kinapudno a saanak nga agmaymaysa kadagiti sagsagabaek. Adda dagiti makatulong a singasing iti serye, ket ikagumaakto nga iyaplikar dagita. Pangngaasiyo ta itultuloyyo ti agimprenta kadagita nga artikulo a makatulong iti adu.

V. L., Russia

Maysaak a panglakayen nga agtawen iti 68 ken agarup sangapulo a tawenen nga addaanak iti clinical depression. Kayat met dagiti panglakayen iti kongregasion ti masarungkaran, ket mabalin a dadduma kadakami ti addaan met iti nakaro a depression. Napikapikak unay idi nabasak ti panangibtur ti dadduma iti mood disorder.

B. A., Estados Unidos

Natignayak nga agpaagas gapu iti nabasak iti daytoy a serye. Tinulonganna met ni baketko tapno nasaysayaat ti panangdaerna iti depression-ko. Kanayon nga apresiarek ti kinanaintiempuan ken kinaumiso dagiti artikuloyo.

C. B., Alemania

Tallo a bulan sakbay a nabasak daytoy a serye, nadayagnos nga addaanak iti depression. Dagiti damo a reaksionko ket kas iti eksakto a dineskribiryo iti serye​—nakigtotak ken diak kayat a maammuan ti asinoman. Gapu kadagiti seryeyo, nariknak nga adda makaawat kaniak ket diak mariknan nga agmaymaysaak.

A. G., Austria

Sipud pay idi ubingak, agsagsagaban ni tatangko iti bipolar disorder. No nakaro ti kasasaadna, talaga nga agsagaba ti pamilia. Nupay ammok a masakit, kagurgurak. Ngem idi nabasak ti serye, naawatak ti sagsagabaen ni tatangko. Sangitak la a sangit bayat a binasak dayta. Inton sumaganad a panagawidko, kayatko ti makisarita kenkuana. Ikagumaakto nga akseptaren a naimpusuan.

S. S., Japan

Adda sakit ti isip ti balasang ti gayyemko, ket imbagak a no basta aggaggaget nga agadal ken masansan nga agkararag, sumayaat ti riknana. Impakita ti impormasion iti panid 10 daytoy a serye a nagkamaliak. Makatulong ti panagkararag ken panagadal ngem saan a makaagas dagitoy kadagiti sakit. Pagyamanan iti kanayon a panangisuroyo kaniak.

B. D., Estados Unidos

Namin-adun a nagsangitak idi adda nangibaga a no Kristianotayo, saantayo a maaddaan iti depression. Ngem nakatulong kaniak daytoy a serye, ket liniwliwanak ta naammuak a saan la a sisiak ti addaan iti kastoy a parikut.

P. B., England