Sibabalud, Ngem Siwayawaya!

Babaen iti mannurat ti Agriingkayo! idiay Mexico

SIAM a pulo a kilometro iti taaw manipud iti makintengnga a laud ti Mexico ti ayan ti Islas Marías. * Ti María Madre a maysa kadagiti isla iti Pacifico ti maus-usar a pagbaludan ti gobierno pederal ti Mexico sipud idi 1905. Adda idi tiempo a ti pannakaidestiero sadiay ket nakaam-amak a pannusa. Ngem ita, dagiti balud nga agdinamag a simmayaaten ti kababalinda mabalin a kiddawenda ti mapan a mismo sadiay!

Ti maysa a rason ket maipalubos kadagiti balud a makaduada dagiti pamiliada nga agnaed sadiay. Imbes nga agnaedda kadagiti selda, agnaed dagiti balud iti babassit a balbalay. Dagiti kabalbalayan ket addaan iti dadduma a pangpubliko a pasilidad a masarakan iti aniaman a bassit nga ili. Ti telepono, telebision, ken koreo ti makatulong kadagiti balud tapno maammuanda ti kasasaad iti ruar ti pagbaludan. Makapageskuela met iti elementaria dagiti annakda, nupay masapul nga agsubli dagitoy iti kangrunaan a paset ti Mexico inton ageskuelada iti haiskul. Ket nupay nainget ti pannakaguardia dagiti isla, maminsan iti kada lawas nga adda sumanglad a barko ti marina tapno mangitulod kadagiti suplay ken sangaili.

Komusta ngay ti panangpasingpet? Maikalikagum kadagiti balud​—a mangawag iti bagida kas colono, wenno dagiti umili​—nga agtrabahoda iti sumagmamano nga oras iti agmalem. Saan la a makatulong daytoy kadakuada a makibagayto iti biag iti ruar ti pagbaludan no di ket mangsustento pay iti masapsapulda. Siwayawaya met dagiti colono a mangaramid kadagiti bukodda a trabaho kas iti panagmula ken panagaramid kadagiti produkto tapno adda panguartaanda. Di kaipapanan daytoy a naan-anay nga awanen dagiti restriksion iti pagbaludan. Masapul a sumungbat dagiti balud no saggaysa a maayaban ti naganda iti alas singko ti parbangon ken agtulnogda iti bilin a didan rumrummuar kadagiti balayda no alas nueben ti rabii.

Dimteng ti Naespirituan a Wayawaya Idiay Marías

Idi agarup 1985, adda colono, a ti pamiliana ket Saksi ni Jehova, a nagpatulong iti naespirituan. Nairugi ti panagadal iti Biblia babaen iti koreo. Idi agangay, nabuangay ti maysa a grupo dagiti agad-adal iti Biblia sada rinugian ti nangangay kadagiti Nakristianuan a gimong. Apaman a napatgan ti panagkiddawda iti permiso ti gobierno, regular a sarsarungkaranen dagiti Saksi ni Jehova ti isla​—a 13-nga oras nga agpatnag a biahe manipud Mazatlán, iti kangrunaan a paset ti pagilian. Iti panaglabas dagiti tawen, 40 a balud ti nakasursuro iti kinapudno  ti Sao ti Dios, nabautisaran, ken kalpasan a naikaroda ti sentensiada, nawayawayaanda. Agingga idi maisursurat daytoy, 6 a bautisado a Saksi ti adda pay la iti isla, ket agarup 25 ti tumabtabuno kadagiti Nakristianuan a gimong.

Dagiti Saksi ni Jehova ket padayawan dagiti autoridad gapu iti panagreggetda. Raraemen met ti amin nga umili dagiti balud a nagbalin a Saksi. Iti nabiit pay, kastoy ti nasao ti katulongan a direktor ti pagbaludan kadagiti sumarsarungkar a Saksi: “Pudno a makatulong ti agpapada nga interesyo iti pisikal ken moral a pagimbagan dagiti balud. Talaga a maseknankayo kadakuada! Naan-anay a suportarandakayo.” Impatarimaanna ti pasdek a naipalubos a paggigimongan dagiti kakabsat.

Kinuna ti maysa a bautisado a Saksi a naibalud iti 10 a tawen: “No damagen dagiti kakabsat no kayatkon ti pumanaw, ibagak kadakuada a kayatko ti agtultuloy nga agserbi ditoy; ibilangko daytoy kas ti naituding a teritoriak, ta adda dakkel a pakasapulan. Siempre, kayatko ti tumabuno kadagiti asamblea ken tagiragsaken ti Nakristianuan a panaglalangen.” Naikeddengen a mawayawayaan inton umay a tawen gapu iti simmayaat a kababalinna.

Naipadamag a naballigi ti sistema ti pagbaludan iti Islas Marías a mangpasingpet kadagiti balud. Nupay kasta, ti mensahe ti Pagarian ti nangipaay iti pudno a naespirituan a wayawaya ken panangpasingpet, a ‘nangwayawaya kadagiti kautibo,’ ken ‘nanglukat a naimbag iti matmata dagiti balud.’​—Lucas 4:18; Isaias 61:1.

[Footnote]

[Kahon/Dagiti Ladawan iti panid 21]

Nagbalin a Kristiano a Panglakayen ti Dati a Managdroga

Naibalud ni Guillermo gapu iti panaglako ken panagusarna iti droga. Kalpasan a naipan idiay Islas Marías, intultuloyna a sinumok ti droga. Ngem nadlawna a dadduma kadagiti padana a balud a nabayagen a nangikaro kadagiti sentensiada gapu kadagiti kasoda a panaglako iti droga ket nataknengen ti langada, rimmagsaken ti panangmatmatda, ken mapagwadandan. Idi naammuanna a makipagad-adal dagitoy iti Biblia a kadua dagiti Saksi ni Jehova, pinatganna ti awis a tumabuno kadagiti gimongda. Idi agangay, regular a nayadalanen iti Biblia.

Dakkel ti nagbalbaliwan ni Guillermo ken di nagbayag, nawayawayaan. Dagus a sinapulna dagiti Saksi ni Jehova tapno itultuloyna ti panagadalna. Ita, agserserbin kas maysa a panglakayen iti kongregasion Kristiano, ket nagbalinen a Saksi ni Jehova ti 17 a miembro ti pamiliana. Kastoy ti kinunana: “Dakkel a pribilehio ti pannakaam-ammok ken ni Jehova ken ti panangiwaksik iti amin a bisiok. Gapu iti droga, natayen ti adu kadagiti dati a gagayyemko. Ti droga ti nangapektar iti utekko, isu a marigatanak a manglagip iti impormasion. Ngem ti pamay-an ti panagadal dagiti Saksi ti nakatulong tapno sumayaat ti panunotko. Nasdaaw dagiti doktor agsipud ta impagarupda a diakon umimbag. Ti kinapudno iti Biblia nakaskasdaaw ti naaramidanna kadakami a sangapamiliaan. Pulos a saankami idi nga agiinnayat ngem itan agkaykaysakamin.”

[Dagiti Mapa iti panid 20]

(Para iti aktual a pannakaurnosna, kitaem ti publikasion)

Mazatlán

Islas Marías

María Madre

[Ladawan iti panid 20]

Makigimgimong “dagiti colono” ken dagiti pamiliada iti Kingdom Hall idiay María Madre