Ti Apagisu a Kasapulan Dagiti Agtutubo

Iti adun a tawen, ibagbaga dagiti agbasbasa, agtutubo man ken nataengan, a ti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo ti mangipapaay iti apagisu a masapul a maammuan dagiti agtutubo. Maysa a balasitang nga agtawen iti agarup 15 a taga Sinaloa, Mexico, ti nagkiddaw iti sangapulo a kopia dayta a libro agpaay iti dadduma a gagayyemna. Imbagana a nupay saan a maysa kadagiti Saksi ni Jehova, talaga a nagustuanna ti libro, sana inlawlawag: “Dakkel ti panagraemko kadakayo.”

Kinunana pay: “Adu ti gagayyemko nga addaan iti nagadu a saludsod maipapan iti biagda ita. Impakitak kadakuada ti libro ket nagustuanda unay. Nagsayaat ti libro ken nakailanadan ti amin a kayat a maammuan ti maysa nga agtutubo.” Kiniddawna no mabalin a maipatulod dagiti libro sakbay nga agserra ti eskuelaan para iti bakasion iti dayta a kalgaw.

Addaan iti 39 a kapitulo ti libro nga Iyimtuod ti Agtutubo. Ramanen dagitoy ti: “Kasano a Maallukoyko Dagiti Dadakkelko nga Ikkandak iti Ad-adu Pay a Wayawaya?” “Kasanoak a Maaddaan iti Pudpudno a Gagayyem?” “Ti Ngay Panagdenna Sakbay ti Panagasawa?” ken “Kasanok a Masierto no Pudno nga Ayat Dayta?” Mabalinmo ti agkiddaw iti kopia daytoy 320 ti panidna a libro babaen ti panangsuratmo iti naipakuyog a kupon ken panangibusonmo iti dayta iti naipaay nga adres wenno iti maitutop nga adres a nailista iti panid 5 daytoy a magasin.

□ Kayatko ti maaddaan iti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo.

□ Interesadoak iti libre a panagadal iti Biblia.