Dagiti Pagimbagan ti Panangibasa Kadagiti Ubbing

BABAEN ITI MANNURAT TI AGRIINGKAYO! IDIAY POLAND

Kastoy ti imbaga dagiti nangorganisar iti tinawen a kampania a “Ti Intero a Poland Ibasaanna Dagiti Ubbing”: “Napateg ti panagbasa tapno maaddaantayo iti pannakaammo ken pannakaawat. . . . Dayta ti mangted iti gundaway tapno maawatantayo ti kapanunotan ken pannakaammo ti tao.” No agpayso daytoy, apay a di kaay-ayo ti adu a nataengan ken ubbing ti agbasa?

Kinuna dagiti nangilungalong iti daytoy a kampania: “Kabayatan ti kinaubing, rumbeng a mapatanor ti ugali a panagbasa ken panagayat kadagiti libro.” Kinunada kadagiti nagannak: “No kayatyo nga agmasirib ken agballigi ti annakyo iti eskuelaan ken iti biag, ibasaanyo ida iti 20 a minuto iti kada aldaw.”

Maiparparegta met kadagiti nagannak a dida itantan ti panangibasa kadagiti annakda no di ket “dagus a rugiandan dayta.” Kaano? Naidagadag kadagiti nagannak: “Ibasaantayo ti maysa a maladaga, bayat nga ub-ubbaentayo, mingmingmingantayo a sidudungngo, ken al-allukoyentayo ti interesna babaen ti timektayo. Iti kasta, kanayon a malaglagipnanto a ti panagbasa ket nainaig iti kinatalged, kinaragsak, ken kinasinged. Kanayonanna, dayta met ti manggutugot iti irarang-ay ti panunotna.”

Impaganetget dagiti nangorganisar iti kampania a “napatpateg itan ngem idi ti panangibasa kadagiti ubbing,” ket impatuldoda ti dadduma pay a pagimbagan. Ti panangibasa ti mangisuro kadagiti ubbing nga agpanunot, “tumulong kadakuada a makaawat iti dadduma a tattao, iti lubong, ken iti bagbagida, . . . mangallukoy iti interes, mangparayray iti imahinasion, manggutugot iti emosional nga irarang-ay, mangsukay iti kinasensitibo ken pannakipagrikna, mangisuro kadagiti naimbag a prinsipio, . . . mangpabileg iti panagraem iti bagi.” Awan duadua a dayta “ti sumang ti adu a dakes nga impluensia . . . a mamagpeggad iti isip ken puso ti ubbing,” kinuna dagiti panguluen daytoy a kampania.

Tapno ad-adda nga epektibo ti panagbasa, masapul a mausar dagiti publikasion a mangparegta kadagiti ubbing nga umadani iti nailangitan a Namarsua kadakuada. Ti Biblia ti kasayaatan a libro a makatulong kadatayo nga umadani iti Dios. “Manipud kinamaladaga,” kuna ti Biblia, ti ubing a ni Timoteo nasursuruan idi iti “nasantuan a sursurat.” (2 Timoteo 3:15) Iti maysa a programa a panangibasa kadagiti annak, mabalin nga usaren met ti nagannak dagiti libro a naibasar iti Biblia a kas iti Ti Librok Dagiti Estoria ti Biblia ken Agsursuroka iti Naindaklan a Mannursuro, a naisurat a nangnangruna para kadagiti ubbing ken impablaak dagiti Saksi ni Jehova.