Manipud Kadagiti Agbasbasa

Annak Apaman a naawatko ti serye a “Dagiti Annak​—Ti Kasapulanda Kadagiti Nagannak,” sigagagar a binasak dayta. (Disiembre 22, 2003) Kas ina ti lima nga annak, napikapikak unay kadagita nga artikulo. Sapay koma ta mabasa ida ti amin nga inna iti lubong.

C. M., Francia

Naintiempuan kaniak dagiti impablaakyo nga artikulo. Idi naammuanmi ken ni lakayko a maaddaankami iti anak, nangipablaakkayo iti impormasion maipapan kadagiti masikog. (Enero 8, 2003) Ita ta naragsakkamin a nagannak ti tallo ti bulanna nga anak a lalaki, nangipablaakkayo iti nagsayaat a singasing maipapan iti panangpadakkel kadagiti maladaga. Para iti agtutubo nga ina, makatulong unay dagitoy nga artikulo.

D. K., Poland

Pakasaritaan iti Biag Agyamanak kadakayo gapu iti amin nga artikulo, ngem nangruna a magustuak dagiti pakasaritaan iti biag. Napikapikak iti pakasaritaan ni Eileen Brumbaugh a “Pakaitibkolak Idi ti Panagkawkawes ken Panaglanglanga.” (Disiembre 22, 2003) Nagpasnek la ketdin ti tarigagayna idi a mangsapul iti pudno a relihion!

L. M., Russia

Nangruna a nagustuak ti pakasaritaan ni Eileen Brumbaugh agsipud ta nagadu ti pamilia dagiti Amish ken Mennonite iti lugarmi. Iti napalabas, impagarupko no awan serserbi ti makisarita kadakuada maipapan iti Biblia ta kasla napeklanda unay iti pammatida. Manipud iti kapadasanna, naawatak a babaen ti panangipakita iti personal a pannakaseknan ken napasnek nga interes, mabalintay a tulongan ti amin a kita ti tattao a maaddaan iti umiso a pannakaammo iti Dios.

M. H., Estados Unidos

Para kaniak idi, “nailubongan unay” met ti panagkolorete ken panagalahas. Ti napudno a panagayat dagiti Saksi ni Jehova, agraman ti panagraemda iti Nasantuan a Kasuratan, ti nakatulong kaniak a mangmatmat iti napatpateg ngem iti makinruar a langa.

A. C., Estados Unidos

Panangusar Kadagiti Makaagas a Mula Nagustuak a binasa ti artikulo a “Panangusar Kadagiti Makaagas a Mula​—Matulongandaka Aya?” (Disiembre 22, 2003) Maysaak a lisensiado a nars, ket agus-usarak iti nadumaduma a natural a pangagas iti susuopko. Natakuatak a mapaimbagda ti kasasaadko. Ngem saanyo a dinakamat a ti dadduma a makaagas a mula ket agresulta iti nakaro a panagpadara no maopera ti maysa a tao. Rumbeng nga igunamgunam dagiti Saksi ni Jehova a di mausar ti dadduma a makaagas a mula sakbay a maopera ti maysa a tao.

J. H., Estados Unidos

Sungbat ti “Agriingkayo!”: Apresiarenmi daytoy napateg a palagip. Sakbay ti operasion, masapul nga ipakaammo ti pasiente iti doktorna ti amin nga agas a tomtomarenna​—agraman dagiti makaagas a mula. Nangruna a napateg daytoy kadagidiay mangipangpangag iti bilin ti Biblia nga ‘umadayoda iti dara.’​—Aramid 15:29.

Panagpalawag iti Publiko Talaga a nagustuak a binasa ti artikulo nga “Agimtuod Dagiti Agtutubo . . . Kasano nga Agballigiak kas Pumapalawag iti Publiko?” (Disiembre 22, 2003) Sangapulo a tawenen nga agtartrabahoak kas periodista ngem kaskasdi nga agnerbiosak bassit no agbitlaak iti dakkel a tallaong. Agpapan pay iti amin a panagsanayko iti eskuelaan ken iti panggedan, awan ti makaartap iti nagsayaat a pannursuro a maaw-awatko kas estudiante iti Teokratiko nga Eskuelaan ti Panagministro a maang-angay kadagiti Kingdom Hall dagiti Saksi ni Jehova. Gapu iti daytoy a pannakasanay, saan la a simmayaat ti panangasabak no di ket naballigiak met iti panggedak.

L. B., Estados Unidos