“Ti Pannakipagna iti Dios Mangyeg Kadagiti Gunggona Ita ken iti Agnanayon”
“Ti Pannakipagna iti Dios Mangyeg Kadagiti Gunggona Ita ken iti Agnanayon”
MASANSAN a maikuna a ti biag ket kaasping ti panagdaliasat. Ngem mariknam kadi a kasla nayaw-awanka? Adu ita ti makarikna iti kasta. Agbibiagtayo iti sidong dagiti nakaro a pakarigatan iti daytoy a lubong. Bayat a rumangranggas ken dumakdakes ti kagimongantayo, mabalin a mariknatayo a maap-apektarantayo kadagiti kasasaad a ditay makontrol. Kasanotay nga agbalin a natimbeng kadagita a nariribuk a kasasaad? Kasanotay a mapagtalinaed a naannayas ti panagdaliasattayo?
Naglaon ti Biblia iti nagsayaat ken makaliwliwa a sungbat. Isurona nga addaantayo iti nakaskasdaaw a gundaway—mabalintay ti makipagna iti Dios. Nalabit uyawen ti dadduma dayta a kapanunotan. Ngamin, kasano koma a mabalin a makipagna ti tao laeng iti mannakabalin amin a Namarsua iti uniberso? Ipakita ti Biblia a posible dayta. Kinapudnona, ti pannakipagna iti Dios kaipapananna ti kasayaatan ken kararagsakan a biag iti daytoy nariribuk a lubong. Ngem ania ti ramanenna? Ket ania dagiti bendision nga ipaay ti kasta a pannagna?
Dagitoy a saludsod ti masungbatanto iti makaparagsak a palawag a “Ti Pannakipagna iti Dios Mangyeg Kadagiti Gunggona Ita ken iti Agnanayon.” Maidiskurso daytoy a palawag publiko kadagiti kombension distrito dagiti Saksi ni Jehova a mangrugi inton Nobiembre 19. Ginasut kadagita a kombension ti naangayen ken maangayto pay iti intero a lubong. Tapno maammuam ti kaasitgan a pakaangayanna iti pagnanaedam, makiumanka kadagiti Saksi ni Jehova iti lugarmo wenno agsuratka kadagiti nangipablaak iti daytoy a magasin.