Manipud Kadagiti Agbasbasa

Nagan ti Dios Ti serye nga “Ammom Kadi ti Nagan ti Dios?” (Enero 22, 2004) ti maysa kadagiti kapintasan, ken nabagas unay a pannakailawlawag ti nagan ti Dios sipud idi nagbalinak a Kristiano idi 1973. Maysa nga obra maestra dayta a serye gapu iti makaallukoy nga akkub, buya, ken diseniona, agraman ti di mabalusingsing a pannakaisalaysayna. Nagsayaat ti naaramidanyo!

D. L., Estados Unidos

Nabiit pay a nangrugiak kas amin-tiempo a managebanghelio, isu a nasingsingedak nga amang itan ken Jehova ngem idi. Gapu iti dayta, nagustuak unay ti serye maipapan iti nagan ti Dios. Impakita ti kahon a napauluan iti “Ammo ti Dios ti Naganmo” a nupay nagadu ti tattao ditoy daga, maseknan ti Dios iti tunggal maysa kadatayo. Dayta ti gapuna a kayatko nga adalen ti ad-adu pay maipapan ken Jehova ken aramiden ti makaay-ayo kenkuana.

M. J., Japan

Idi binasak, natakuatak a makaisuro, detalyado, ken nagsayaat ti pannakasirarak dayta a serye. Makapainteres ken makaay-ayo unay ti pannakaisalaysayna. Nagustuak met unay a makita ti nagan ni Jehova iti 39 a pagsasao iti ngatuen dagiti panid. Dayta a salaysay ti mangidayaw iti nagan ni Jehova ken rumbeng laeng a magustuan dagiti nasingpet a tattao.

G.D.M., Estados Unidos

Pammati ti Sientista Nagustuak unay ti artikulo a “No Apay a Mamatiak iti Biblia​—Salaysayen ti Maysa a Nuklear a Sientista ti Pakasaritaanna.” (Enero 22, 2004) Innem a tawen ti napalabasen, nagutugotak met a mamati kadagiti kinapudno iti Biblia gapu kadagiti nainkalintegan ken mapaneknekan a kinapudno. Apresiarek met unay itan dagiti naadalko. Mapabpabileg ti pammatik kadagiti kapadasan a kas iti pakasaritaan ni Alton Williams. Agyamanak ken Jehova ta ipapaayanna ti tunggal maysa kadatayo iti ebidensia a maitutop iti espesipiko a kasapulantayo.

E. L., Hungary

Sabsabong Iti Africa Nagsuratak tapno agyaman gapu iti artikulo a “Tinawen a Milagro Idiay Namaqualand.” (Enero 22, 2004) Nakaskasdaaw a makita ti kinanadumaduma dagiti sabong nga inaramid ni Jehova tapno matagiragsaktayo. Bayat a basbasaek ti artikulo, nalagipko ti kinuna ni salmista David: “Nakaskasdaaw dagiti aramidmo, kas pagaammo unay ti kararuak.”​—Salmo 139:14.

A. J., Mexico

Homework Agtawenak iti 13 ken maysaak nga estudiante ket kanayon a marigatanak a mangiwaya iti panawenko. Nakatulong kaniak ti panangbasak iti artikulo nga “Agimtuod Dagiti Agtutubo . . . Kasano a Maiwayaak nga Aramiden ti Homework-ko?” (Enero 22, 2004) Manmanoak idi nga agbuya iti telebision. Ngem no agbuyaak, agsasaruno a programa ti buyaek. Ita, pulos a saanakon nga agbuybuya.

R. O., Japan

Ages-eskuelaak iti pagtaenganmi, ket talaga a rumbeng nga agbalinak a disiplinado tapno makapagadalak iti kada aldaw. Gapu kadagiti singasing iti artikulo, iwayaakto nga aramiden ti homework-ko.

X. R., Estados Unidos

Nagrigat! Talaga a nagrigat nga ileppas ti homework-ko. No dadduma, pagarupen dagiti dadakkelko a sadutak no nabayagak a mangiringpas iti homework-ko. Ngem no dadduma, nakarigrigat, wenno nagadu dayta. Pagyamanan iti panangisuroyo kadakami no kasano a maaddaankami iti tiempo a mangaramid iti homework-mi ken mausarmi a sieepektibo ti panawenmi.

J. S., Estados Unidos

Makatulong unay ti artikulo. Dagiti singasing iti paulo a “Nasaysayaat a Panangusar iti Tiempom” ti nakatulong kaniak a mangpasayaat iti panagadalko.

B. L., Italia