Panangdaer iti Pannakadidigra Gapu iti Panangatake Dagiti Terorista

BABAEN ITI MANNURAT TI AGRIINGKAYO! IDIAY ESPANIA

IDI Marso 11, 2004, nadayyeg ti siudad ti Madrid, Espania gapu iti panagbettak ti sangapulo a bomba iti tallo a nagduduma nga estasion ti tren. Agarup 190 a tattao ti natay ken 1,800 ti nasugatan gapu iti naggigiddan a panangatake kadagiti uppat a pangpasahero a tren.

 Gapu ta bimtak dagiti bomba kabayatan ti oras ti panagaapura iti dayta nga agsapa, amin a tren ket napno iti pasahero isu a nagadu ti naapektaran. “Nakitak ti panagpallatok ti intero a benneg ti tren iti sangametro. Kasta kapigsa ti panagbettak,” kinuna ni Aroa, maysa a nakasaksi. “Idi dimsaagak iti tren, kas man la naggugubatan ti aglawlaw. Makapasidduker a kitaen ti kasta nga aktual a pannakapapatay.” Kasta met la ti nakaam-ames a napasaran ti uppat a nadumaduma a tren ken iti sangapulo a nagduduma a benneg ti tren. Imbati dagiti terorista dagiti kadayda a napno iti adu nga eksplosibo kadagiti tren sada pinabettak dagitoy babaen kadagiti cell phone.

Naimbag laengen ta dagiti nakaam-amak a napasamak ket saan unayen a malagip ti dadduma a pasahero. Ngem ginasut kadakuada, kas ken ni Aroa, ti rumbeng a mangdaer iti pisikal ken emosional a pannakadidigra. “Ti panagbettak ti nangdangran unay iti panagdengngegko,” kinuna ni Aroa, “ngem ad-adda a mariribukanak kadagiti aktual a makapasidduker a nakitak.

“Naimbag laengen ta kas maysa kadagiti Saksi ni Jehova, adu ti mangliwliwa kaniak,” kinuna pay ni Aroa. “Dagiti awag iti telepono ken mensahe manipud iti intero a lubong ti mangipalagip kaniak a pudno a kamengtayo iti sangalubongan a panagkakabsat. Tultulongannatayo met ti Biblia a makaawat no apay a mapaspasamak dagitoy a kinadangkok. Inlawlawagko iti dadduma kadagiti katrabahuak a naipadto kadagiti Kasuratan a kabayatan ‘dagiti maudi nga aldaw,’ dagiti tattao ket agbalin a narungsot ken awanan iti nainkasigudan a panagayat. Napaneknekak met a ti amin-tiempo a ministeriok ti talaga a makatulong iti panangiliwliwagko iti nasaem a kapadasak.”​—2 Timoteo 3:1-3.

Ni Pedro ket maysa kadagiti adu a pasahero a nagsagaba iti nakaro a pannakadunor. Awan pay uppat a metro ti kaadayona manipud iti bomba a bimtak iti naglugananna a tren. Gapu iti panagbettak, natumba iti suelo, isu a nadunor ti ulona ken naaddaan iti nakaro a sakit iti aangsan. Kalpasan ti lima nga aldaw a pannakaidalitna iti intensive care unit, wenno pakaasikasuan dagiti grabe ti kasasaadda idiay ospital, nangrugin nga immimbag. Naparegta iti adu a padana a Saksi a simmarungkar kenkuana, isu a nasdaaw met dagiti nars. “Iti 26 a tawen, ita pay la a nakakitaak iti kasta a kaadu ti simmarungkar ken kaadu dagiti regalo!” kinuna ti maysa a nars. Iti sabali a bangir, naragsakan ni Pedro a nangdeskribir kadagiti agtartrabaho idiay ospital. “Nakaim-imbagda,” kinunana. “Nagdakkel ti naitulongda iti iyiimbagko.”

Imigrante a nabiit pay nga immakar idiay Espania ti adu kadagiti biktima. Nadunor ni Manuel, a taga Cuba, gapu iti immuna a panagbettak iti estasion ti Atocha, sa naawanan iti puot iti maikadua a panagbettak. “Gapu iti pannakataranta dagiti tattao, nabaddebaddekandak bayat a nakadasayak iti paset ti estasion a pagurayan dagiti pasahero,” inlawlawagna. “Idi nagsublin ti puotko, natukkol gayamen ti dua a paragpagko, nadunor ti gurongko, ket pulos a din makangngeg ti maysa a lapayagko.

“Dagiti pang-emerhensia a trabahador​—dagiti polis, ambulansia, ken bombero​—dimtengda iti lugar kalpasan ti sumagmamano a minuto. Tinulongandakami a dagus,” kinuna pay ni Manuel. “Ammoda ti eksakto nga aramidenda, ket ti kinaepisiente ken kinalaingda ti nakatulong tapno saankami unay nga agdanag. Malaksid a siniguradoda a maagasanak a dagus, nakasingsingpet ken nakaan-anusda met a nangasikaso kaniak.”

Panagbuteng Kalpasan ti Pannakadidigra

Kas ken Aroa, nakaro ti pannakadidigra ni Manuel. “Madanaganak idi nabiit pay a nagluganak iti tren,” impudnona. “Kapilitan a dimsaagak a dagus. Agduaduaak pay laeng no adda makitak a nakakaday nga aglugan iti pangpubliko a lugan wenno adda awitna a kaasping dayta. Ngem ad-adu ti nagun-odak a tulong ngem iti sabsabali, nupay no awan miembro ti pamiliak nga agnanaed ditoy Espania. Ginasut a Saksi ti nagtelepono kaniak, ken adda maysa a pamilia a Saksi a nangawis kaniak a makipagnaed pay laeng iti balayda tapno saanak a naladingit. Daytoy di magatadan a panangandingay ti sangalubongan a panagkakabsattayo ti nakatulong tapno agkalmaak.”

Ni Sergio, maysa a pasahero a nakaruar a di pulos naan-ano ti kaskasdi a mabutbuteng iti kada aldaw manipud kadagiti makitkitana iti aglawlawna. Adda bomba a bimtak iti benneg ti tren iti sanguananna, ken bimtak ti sabali pay iti benneg ti tren iti likudanna. Kas ken Manuel,  agyaman gapu iti naayat a panangandingay ti pamiliana ken dagiti padana a Saksi. “Dida laeng imparikna a dungdungnguendak, no di ket impalagipda pay a kamengak ti agkaykaysa ken agsisinnakit nga agkakabsat,” kinunana. “Inaldaw nga inandingaydak, ket nayebkasko ti riknak gapu iti nagadu a nagtelepono, banag a masansan a narigatko nga aramiden.”

Agduduma a kita ti danag ti napasaran ti dadduma a pasahero ti tren. Naiparna nga agtugtugaw idi ni Diego iti abay ti maysa kadagiti uppat a bomba a saan a bimtak. Nakaruar iti tren a saan a pulos a naan-ano. “Ngem makonkonsiensiaak ta diak man la natulongan dagidiay nadunor,” impudnona. “Natarantaak met idin agraman ti ginasut a nangikagumaan a makaruar manipud iti estasion.”

Naklaat unay ni Ramón, maysa nga agtutubo a lalaki a taga Brazil, iti panagbettak iti tren isu a saan payen a makakuti. Nupay kasta, dua nga aldaw kalpasan ti panangatake, inkeddengna ti makipaset iti panangikasaba iti mensahe ti Pagarian iti sabsabali. Nakasaritana ti maysa a lalaki a Portugues a nangibaga ken ni Ramón a birbirokenna ti pudno a relihion. Rinugian ni Ramón nga inyadalan iti Biblia. Dagus a rinugian dayta a lalaki ti timmabuno kadagiti Nakristianuan a gimong. “Nasaysayaat ti panagriknam no matulongam ti sabsabali iti naespirituan,” kinuna ni Ramón.

Di pagduaduaan a panawen ti kasapulan amin dagiti biktima tapno madaeranda ti pisikal ken emosional a pannakadidigrada. Nakalkaldaang ta agbibiagtayo iti panawen a mabalin a mapasamak ti minamaag a kinaranggas iti sadinoman a lugar. Ket nupay mabalin a makatulong dagiti naespirituan a prinsipio kadagiti biktima tapno madaeranda ti pannakadidigrada, ti laeng Pagarian ti Dios ti naan-anay a mangpukaw kadagitoy a trahedia.​—Apocalipsis 21:3, 4.

[Kahon/Dagiti Ladawan iti panid 15]

NAESPIRITUAN A PAMMABILEG A MANGDAER ITI PANNAKADIDIGRA

Manuel Suárez

“Nupay mabutbutengak pay laeng, ken agur-urayak idi a maipan idiay ospital, sangkalagipko ti Proverbio 18:10: ‘Ti nagan ni Jehova ket napigsa a torre. Iti dayta nga agtaray ti nalinteg ket maipaayan iti salaknib.’ Dayta ti nangpabileg kaniak.”

Aroa San Juan

“No mapasaram ti kas iti daytoy, ad-adda a maamirismo a dagitoyen dagiti maud-udi nga aldaw isu a dagiti naespirituan a prinsipio ti nasken nga ipangpangrunatayo. Gapu iti amin-tiempo a ministeriotayo, in-inut a madadaerakon ti pannakadidigrak.”

Fermín Jesús Mozas

“Agpapan pay kadagiti dunor iti ulok, natulongak ken napapigsak ti pakinakem ti dadduma a padak a nadunor a pasahero. Para kaniak, ti panagungar nga impanamnama kadatayo ti Dios ti nakatulong kaniak nga agtalinaed a kalmado. Dayta a namnama ti mangpabileg kadatayo kadagiti kanito a kas iti dayta.”

Pedro Carrasquilla

“Idi naidalitak iti intensive care unit, gapu iti nakaro a panagut-ot ti barukongko, sangkalagipko ti 1 Timoteo 6:19. Dayta ti mangparegta kadatayo nga agurnong iti nasayaat a pamuon maipaay iti masanguanan, tapno mapetpetantayo a sititibker ti pudpudno a biag. Daytoy a bersikulo ti nangipalagip kaniak iti namnama a Paraiso, nga inkari ti Dios kadagidiay agay-ayat kenkuana. Dayta a kalat ti kayattayo a maragpat.”

[Ladawan iti panid 13]

Ngato: As-asikasuen dagiti immarayat ti nagadu a nasugatan ken agngangabit ken patay kadagiti riles iti ruar ti estasion ti Atocha

[Credit Line]

Ngato: CORDON PRESS

[Ladawan iti panid 13]

Kanawan: Binalbalinda a pakalaglagipan