Pananglapped iti Sobra a Kinalukmeg—Adda Kadi Pagimbaganna?
Pananglapped iti Sobra a Kinalukmeg—Adda Kadi Pagimbaganna?
PINAGSALUDSODAN ti Agriingkayo! ti sumagmamano a nangikagumaan a nagpakuttong. Adda kadi pagimbagan ti inaramidda? Ania ti isingasingda iti dadduma nga apektado iti daytoy nga epidemia?
▪ Damagentayo ni Mike nga agtawen iti 46, innem a pie ti katayagna ken 130 a kilo ti timbangna itan. Ti kadagsenan idi a timbangna ket 157 a kilo.
Mike: “Nalukmegakon uray pay idi ubingak. Talaga a pulimi—nalukmeg ni manongko ken amin a manang ken adingko. Ugalimi nga ibusen ti amin a nagyan ti platomi, uray no nakaad-adu. Apay a binalbaliwak ti pannanganko? Imbaga ti doktor kaniak a mabalin nga agdiabetesak! Talaga a nagamakak idi pampanunotek nga agusarakton iti insulin iti inggat’ tungpal biagko. Adu met ti makadangran a kolesterolko isu a masapul nga agtomarak iti agas.
“Masansan a nakatugawak laeng iti trabahok, ket kasta pay laeng agingga ita. Isu a tapno mairemedio, adda regular nga eskediulko nga agehersisio, a pakairamanan ti kaguduat’ oras a panagusarko iti treadmill iti di kumurang a mamitlo iti makalawas. Nasken met nga ilistak ti amin a kanek iti kada aldaw. Gapu ta ammok a linawas a sukimaten ti dietitian ti listaan, nakatulong dayta kaniak nga agteppel. Napanunotko, ‘No dimo kanen, din masapul nga ilistam!’
“Nagbanaganna, 28 a kilo ti naikkat iti napalabas a 15 a bulan, nupay masapul nga adu-adu pay ti ikkatek, ta kayatko a bumaba ti timbangko agingga iti 102 a kilo. Tapno maragpatko daytoy, saanakon a mangmangan kadagiti pangmerienda, potato chips, ken nayurno a karne. Iti nabiit pay a bulbulan, ad-adun ti kanek a salad ken nateng ngem idi!
“Maysa pay a makagapu iti panagpakuttongko ket kas maysa a tsuper ti trak, masapul nga agpadoktorak iti kada tawen tapno mapabarok ti lisensiak. Mabalin a diak mapabaron no agdiabetesak. Ita, nagbalbaliwen ti bambanag.
Saanen a masapul nga agtomarak iti agas tapno makontrol ti kolesterolko. Nababan ti presionko, ket manmanon nga agtomarak iti agas. Nagangganaygayakon, ken saanen a nakaro ti panagsakit ti bukotko. Saanak metten a maibilang a sobra ti kinalukmegna!”Agriingkayo!: “Iti panagpakuttong, makatulong kadi ti asawa a babai?”
Mike: “No agpakpakuttongka, masapul nga adda mangparegta kenka. Idi, pagarup ni baketko nga ipatpategnak no kanayon a bussogennak. Ngem ita, tultulongannakon a mangkontrol iti kaadu ti kanek. Masapul nga agteppelak, ta nalakaak a lumukmeg ket diak mapupuotan a lumuklukmegak manen.”
▪ Usigem ti sabali a lalaki nga agnagan iti Mike, a taga Kansas, E.U.A. Isut’ agtawen iti 43 ket lima a pie ken walo a pulgada ti katayagna. Dinamagmi ti kangatuan a timbangna ken ti nakaigapuan dagiti parikutna gapu iti kinalukmegna.
Mike: “Ti kangatuan idi a timbangko ket 135 a kilo. Kanayon mabannogak ken saanak a naganaygay a mangaramid iti aniaman. Diak makaturog gapu ta maangsanak. Isu a nagpadoktorak, ket naduktalanna a ti sakit nga obstructive sleep apnea * ti maysa kadagiti makagapu iti panaglukmegko. Nakitana met nga adda alta presionko.”
Agriingkayo!: “Ania ti solusion iti parikutmo?”
Mike: “Nangireseta ti doktor iti aparato a mangsuplay iti kanayon nga angin iti aangsak bayat a matmaturogak. Iti kasta, saan nga agserra ti karabukobko ken makaangesak iti normal. Kas resultana, nagangganaygayak iti aldaw ken kimmuttongak. Mamitlo met iti kada lawas nga agusarak iti treadmill. Nagdietaak, a kaipapananna nga ibasbassitko ti kanek ken diak naynayonanen dayta. Naikkatko ti 20 a kilo iti nasurok la bassit a makatawen, ngem masapul nga ikkatek pay ti 20 a kilo. Nabannayat, ngem ammok a kabaelak.”
Agriingkayo!: “Ania pay dagiti mangparegta kenka nga agpakuttong?”
Mike: “Masairak no mangngegko a lalaisenda ti langak. Masansan a pagarupen dagiti tattao a sadutak. Dida ammo nga adu ti pakaigapuan ti sobra a kinalukmeg. Patiek a ti natawidko ti maysa a makagapu iti sobra a kinalukmegko. Ngamin, sobra ti kinalukmeg ti kaaduan iti pamiliak.
“Nupay kasta, bigbigek a tapno kumuttongak, masapul nga aktiboak ken kontrolek ti kanek.”
▪ Pinagsaludsodan met ti Agriingkayo! ni Wayne nga agtawen iti 38 a taga Oregon. Idi agtawen iti 31, ti timbangna ket 112 a kilo.
Wayne: “Masansan a nakatugawak laeng iti trabahok ket saanak nga agehersisio. Idi nagpadoktorak, nakigtotak ta adda gayam alta presionko ken mabalin nga agsakit ti pusok. Imbaonnak iti maysa a dietitian. Nainget a pinagehersisionak ken imbilinna a kontrolek ti kanek. Rinugiak ti inaldaw nga awan
sardengna a pannagna iti 5 a kilometro, ken agriingak a nasapa iti kada aldaw tapno agehersisio. Masapul nga agsursuroak manen iti maitutop a pannangan ken iyiinum. Diak metten mangmangan iti naimas ngem di nasustansia ken kinissayak ti tinapay a kanek ken soda nga inumek. Sinukatak dagitoy iti ad-adu a prutas ken nateng. Itan 80 a kilo laengen ti timbangko!”Agriingkayo!: “Ania dagiti pagimbagan a nadlawmo?”
Wayne: “Mariknak a nasalsalun-atak ken talaga a nasarsarantaak manen. Idi, kasla saanak a nasaranta ken awan gaganaygayak. Maysa pay, diak agtomtomaren iti agas para iti alta presion. Mabalinko metten ti makipinnerreng kadagiti tattao, ta ammok a didan ibaga a sobra ti kinalukmegko.”
▪ Innem a pie ken lima a pulgada ti katayag ni Charles (saan a pudno a naganna). Ti kangatuan idi a timbangna ket 168 a kilo.
Charles: “Adda idi nakaro a sakitko, ket kumarkaro dayta. Diak makauli iti agdan. Awan idi ti gaganaygayak a mangiringpas kadagiti trabahok. Masansan a nakatugawak laeng iti trabahok, ket karaman iti trabahok ti panagsukisok ken adu nga annongen. Ammok a masapul nga agpakuttongak, nangruna kalpasan ti panagpadoktorko. Pinakdaarannak a mabalin a maistrokak. Ammokon no ania ti mapasamak. Dayta ti nangkombinsir kaniak a masapul nga agpakuttongak. Nainget nga inaywanan ti doktorko ti ehersisiok iti treadmill, ken inikkannak met iti nainget a listaan dagiti kanek a taraon. Ita, kalpasan ti agarup makatawen, bimmaban ti timbangko iti 136 a kilo, ngem masapul nga ad-adu pay ti ikkatek. Dagiti nakitak a pagimbagan ti nakakombinsirak a makagunggona ti agpakuttong. Makauliakon iti agdan ken nagangganaygayakon.”
▪ Nadanon idi ni Marta a taga El Salvador ti timbang a 83 a kilo. Maibilang a sobra ti kinalukmegna iti katayagna a lima a pie ken lima a pulgada.
Marta: “Nagpadoktorak ket inyunay-unayna a masapul nga agpakuttongak. Pinatik ti imbagana. Imbaonnak iti nutrisionista tapno agpabalakad. Inlawlawag ti nutrisionista no apay a masapul a surotek dagiti isingasingna nga aramidek tapno sumalun-atak. Impakitana no kasano a limitarak ti kanek ken no kasano nga agteppelak iti kankanek. Idi damo, masapul a linawas nga agkonsultaak kenkuana; kalpasanna, binulan, tapno makitana no adda nagbalbaliwak. Agpada ti doktor ken ti nutrisionista a nangparegta kaniak iti nasayaat a panagprogresok. Idi agangay, naikkatko ti 12 a kilo ket tagtaginayonek ti timbang nga agarup 68 a kilo.”
Agriingkayo!: “Ti ngay panagehersisio ken panagtomar ti agas?”
Marta: “Awan ti problema iti kolesterolko, isu nga awan ti masapul a tomarek. Ngem rinugiak ti masansan a pannagna iti napartak iti kada aldaw.”
Agriingkayo!: “Ania ti aramidem no sumarungkarka kadagiti gagayyemmo ket ipapilitda a kaaduem ti kanem?”
Marta: “Ibagak laeng kadakuada a ‘kayat ti doktorko a surotek ti panagdietak gapu iti salun-atko,’ isu a masansan a didakon piliten.”
Isu a no nalukmegka wenno sobra ti kinalukmegmo, ania ti aramidem? Agpayso ti nabayagen a pagkukuna, “No adda pakinakem, adda pamuspusan.” Determinadoka kadi ken napigsa ti pakinakemmo a mangaramid iti dayta? Kas nalukmeg nga ubing ken nataengan, ania ti ikeddengmo? Agpakuttongka wenno paababaem ti kapaut ti biagmo? Pagbalinem nga aktibo ti estilo ti panagbiagmo, ket mapnekka iti gapuanam—uray kadagiti babassit a banag, kas iti basbassit a rukod ti kawesmo!
[Footnote]
^ par. 11 Para iti adu-adu nga impormasion maipapan iti sleep apnea, kitaem ti Agriingkayo! a Pebrero 8, 2004, panid 10-12.
[Kahon iti panid 11]
Ti kadi liposuction ti solusion para kenka?
Ania ti liposuction? Kastoy ti panangdepinar ti maysa a diksionario: “Gagangay nga operasion a pagpapintas a mangikkat iti sobra a taba manipud iti espesipiko a paset ti bagi, kas iti luppo wenno tian, babaen iti panangsusop. Maawagan met a suction lipectomy.” (American Heritage Dictionary) Ngem dayta kadi ti remedio iti sobra a kinalukmeg?
Kuna ti Mayo Clinic on Healthy Weight a ti liposuction ket maysa nga operasion a pagpapintas. Saan a pagpakuttong dayta. Masusop dagiti selula ti taba iti bagi babaen iti naingpis a tubo a maitudok iti kudil. Sumagmamano a kilo ti maikkat iti maminsan a sesion. Nupay kasta, “ti operasion ket saan a remedio ti sobra a kinalukmeg.” Natalged kadi dayta? “Dagiti tattao nga addaan iti sakit a mainaig iti kinalukmeg, agraman dagiti diabetiko ken addaan sakit ti puso, kumaro ti peggad nga agsagabada kadagiti komplikasion manipud iti liposuction.”