Intandudo ti European Court ti Kalintegan ti Maysa nga Ina

Babaen iti mannurat ti Agriingkayo! idiay Francia

IDI Disiembre 16, 2003, natakuatan ti European Court of Human Rights, nga adda idiay Strasbourg, Francia, a nakabasol dagiti korte ti Francia iti panangidumduma iti relihion ni Séraphine Palau-Martínez, a maysa kadagiti Saksi ni Jehova.

Idi 1996, napalubosan ni Séraphine a makidiborsio ken ni lakayna, a nangbaybay-a kenkuana dua a tawenen sakbayna. Naipoder kenkuana ti dua nga annakda. Ngem idi 1997, nga idi a tiempo ket dandanin tallo ket kagudua a tawenen a naipoder ti annak iti inada, din kayat ti ama nga isubli dagiti ubbing idi naturpos ti panawen ti isasarungkarda. Kastoy ti insalaysay ni Séraphine: “Idi dagasek dagiti ubbing iti eskuelaan tapno iyawidko ida, ti prinsipal ket nagayab kadagiti polis. Mapalubosanak laeng a makipagkita kadagiti annakko no adda dagiti polis tapno masigurado a diak kasarita ida maipapan iti pammatik. Kas man la maysaak a kriminal. Imbagada kaniak a mayawidko laeng dagiti ubbing no pirmaak ti maysa a deklarasion a mangpaneknek a diak kasarita idan maipapan iti Dios wenno iti Biblia wenno itugot ida kadagiti Nakristianuan a gimong.”

Nagpatulong ni Séraphine kadagiti korte. Ngem idi 1998, imbilin ti Korte ti Panagapelar iti Nîmes a ti ama ti pakaipoderan dagiti annak. Inkalintegan ti korte ti desisionna babaen iti nakaro ken nalawa ti saklawenna a panangbabalaw kadagiti pagarupenna a prinsipio ti panangisuro dagiti Saksi ni Jehova kadagiti annakda. Malagip ni Séraphine: “Makasair unay ti mapabasol a dangdangrak dagiti annakko, idinto ta ar-aramidek ti amin a kabaelak a mangipaay kadakuada iti pagarupek a kasayaatan para kadakuada​—ti Nakristianuan a panangpadakkel.”

Inkeddeng ni Séraphine nga iyuman ti kasona iti European Court of Human Rights idi nagtunos ti desision ti Cour de Cassation, a korte suprema ti panagapelar iti Francia, ken ti korte a mangreprepaso iti panagapelar. Iti 6-kontra-1 a pangngeddeng, impaulog ti European Court nga “awan duadua iti imatang ti Korte a ti korte ti panagapelar [iti Francia] ket saan a nainkalintegan ti panangtratona kadagiti nagannak sigun iti relihion ti nagapelar. . . . Ti kasta a nagduma a panangtrato ket panangidumduma.” Inkeddengna a ti desision ti korte ti Francia ket saan a naibasar iti kabaelan ni Séraphine a mangaywan kadagiti annakna​—a saan a pulos a nakuestion​—wenno naibasar kadagiti aktual nga ebidensia no di ket iti “kaaduan a pagarupna kadagiti Saksi ni Jehova.” Gapu iti kastoy a panangidumduma iti relihion ken ti pananglabsing kadagiti kalintegan ni Séraphine, imbilin ti Korte nga agbayad ti Francia iti danios ken gastos iti korte.

Maitunos daytoy a desision iti impaulog ti European Court of Human Rights iti umasping a kaso, idi Hunio 1993. Idi nga inkeddeng ti Korte nga indumduma ti Austria ni Ingrid Hoffmann, a maysa kadagiti Saksi ni Jehova, gapu iti relihionna. * “Maitunos iti desision iti kaso ni Hoffmann,” kuna ti magasin a Pranses a La Semaine juridique, “daytoy a desision patalgedanna a saan a mabalin nga idiktar ti desision maipapan iti autoridad ti nagannak a maibasar a nangnangruna iti relihion.” Kinuna ti abogado ni Séraphine: “Nakapatpateg daytoy a desision ta agpapada dagiti linteg nga impasdek ti Korte a mangipaay iti kalintegan dagiti nagannak a Saksi ni Jehova maipapan iti awan idumdumana a pangngeddeng.”

Idi napagsaludsodan maipapan iti desision, kinuna ni Séraphine, nga agnanaed itan idiay Espania: “Naragsakan ken nabang-aranak. Nakarigrigat a suot ti pannakaipanaw dagiti annakko gapu iti relihionko ken ti diak pannakakita kadakuada iti unos ti lima a tawen, ngem kanayon nga inandingaynak ni Jehova. Sapay koma ta daytoy a desision ti makatulong iti dadduma a maipasidong iti kasasaad a napasarak.”

[Footnote]

[Ladawan iti panid 12]

Ni Séraphine