Kaanonto nga Agpatingga ti AIDS?

Manipud iti kinaubing, kanayon a mabuybuya wenno mangmangngeg dagiti agtutubo dagiti mensahe a mangiparparegta iti seksual a kinalulok. Nasaknap met ti panagdroga a maipadalan iti urat, ti sabali pay a pamay-an a mangyakar iti HIV. No kasla awan ti dakes a pagbanagan ti nalulok a kababalin dagiti tattao itatta, nalabit mapampanunotyo no agpatingganto pay ngata ti AIDS.

MAITUTOP ti panangipatuldo dagiti mangngagas a nasken ti panagbalbaliw iti kababalin tapno maparmek ti AIDS. Kuna ti Centers for Disease Control and Prevention: “Tunggal maysa ken amin a kaputotan dagiti agtutubo kasapulanda ti naan-anay ken agtultuloy a pakaammo ken panangisuro. Daytoy ti makatulong kadakuada a mangpatanor iti inggat’ tungpal-biag a kinasigo, tapno maliklikanda dagiti kababalin a pakaigapuan ti pannakaimpeksion iti HIV. Ti kasta a naan-anay a panangisuro masapul nga iramanna dagiti nagannak ken mannursuro.”

Nabatad a masapul nga isuro dagiti nagannak ti annakda maipapan kadagitoy a peggad sakbay a maammuanda ti di umiso nga impormasion kadagiti kapatadanda wenno iti sabsabali. Saan a kanayon a nalaka nga aramiden daytoy. Ngem maispalna ti biag ti anakmo. Ti panangisuro kadagiti annak maipapan iti sekso ken droga di masapul nga ikkatenna ti kinainosenteda. Kinapudnona, dayta ti mangsalaknib kadakuada manipud iti pannakapukaw ti kinainosenteda.

Nasken ti Panangsanay Dagiti Nagannak

Kadagiti nagkauna nga ili ti Dios, manamnama nga isuro dagiti nagannak ti annakda maipapan iti pannakidenna ken no kasano a masalakniban ti salun-atda. Makapainteres ta dagiti linteg kadagiti nagkauna nga Israelita inramanna dagiti nabatad a moral nga alagaden ken dagiti aramid a nangsalaknib kadakuada manipud iti impeksion. (Levitico 18:22, 23; 19:29; Deuteronomio 23:12, 13) Kasano a naisuro dagitoy a linteg kadagiti tattao? Imbaga ni Jehova a Dios kadagiti Israelita: ‘Dagitoy  a sasao nga ibilbilinko kadakayo ita nga aldaw addadanto ita pusoyo.’ Umuna, masapul a maawatan ti nagannak dagiti pagimbagan ti panagtulnog ken dagiti pagbanagan ti isusukir kadagitoy a linteg. Kalpasanna, kastoy ti naibilin kadakuada: “Masapul nga iyukuokmo ida iti anakmo ken sawem ti maipapan kadagita no agtugawka iti balaymo ken no magnaka iti dalan ken no agiddaka ken no bumangonka.”​—Deuteronomio 6:6, 7.

Depinaren ti maysa a diksionario ti “iyukuok” kas “panangisuro ken panangipasagepsep babaen iti masansan a panangulit wenno panangbalakad.” Nabatad a kasapulan ti panawen. Dagiti nagannak a mangilasin iti tiempo tapno suruanda ti annakda kadagiti pagpeggadan ti panagdroga ken di rumbeng a pannakidenna talaga a dakdakkel ti posibilidad a liklikan ti annakda dagiti aramid a pakaakaranda iti HIV ken dadduma pay a sakit. *

Liwliwa Kadagiti Agsagsagaba iti HIV/AIDS

Nalabit a dagiti panangikagumaan a manglapped ket saan unay a makaliwliwa iti minilion nga addaanen iti HIV/AIDS. Malaksid iti panagsagaba kadagiti epekto ti sakit iti bagi, masansan a maibabain ken mailaksidda gapu iti kasasaadda. Apay? Ti kadawyan, ngem di umiso a pannakaammo ket mabalin a mayakar ti HIV babaen iti gagangay a pannakilangen. Maawatan a maamaktayo a maakaran iti HIV/AIDS, ta agpada a makaakar ken makapapatay. Dadduma ket di nainkalintegan ti panagamakda kadagiti addaan iti kasta a sakit gapu ta kaamakda ti sakit. Saan a maagasan dagiti agsagsagaba, mailaksidda iti simbaan, ken marautda pay a siraranggas.

Kuna ti dadduma a tattao a ti AIDS ket lunod ti Dios kadagiti nadangkes. Agpayso a ti panangipangag kadagiti pagalagadan ti Biblia maipapan iti kababalin iti sekso, panagdroga, ken dara ket nalapdanna koma ti panagsakit dagiti agsagsagaba. (Aramid 15:28, 29; 2 Corinto 7:1) Nupay kasta, ipakita ti Kasuratan a ti sakit ket saan nga ebidensia ti panangdusa ti Dios iti espesipiko a nagbasolan. Imbes ketdi, kuna ti Biblia: “Iti dakes a bambanag saan a mabalin a suoten ti Dios ket isu saanna met a suoten ti asinoman.” (Santiago 1:13; Juan 9:1-3) Ti maysa a tao nga addaan iti HIV wenno AIDS gapu ta dina impangag dagiti Nainkasuratan a pagalagadan ngem binaliwannan ti kababalinna ket makasigurado a saan a baybay-an ti Dios.

Makita ti pannakaseknan ken ayat ti Dios kadagiti nakaro a masaksakit idi immay ditoy daga ti Anakna a ni Jesus. Idi nasabetna ti maysa nga agkukutel iti panagdaliasatna, ‘simnek ti asi ni Jesus ket inunnatna ti imana ket sinagidna.’ Inusar ni Jesus ti namilagruan a pannakabalinna ket inagasanna ti agkukutel. (Marcos 1:40-42) Saan a linais ni Jesus dagiti masakit. Ti ayat nga impakitana kadakuada ti naan-anay a mangiparangarang iti ayat ti nailangitan nga Amana.​—Lucas 10:22.

Asidegen nga Adda Agas ti AIDS!

Dagiti namilagruan a panangagas ni Jesus saanda laeng nga ipasigurado manen ti panagayat ti Dios kadatayo. Ibaga kadatayo ti Biblia nga agturturayen ni Jesus-Kristo kas nailangitan nga Ari. (Apocalipsis 11:15) Pinaneknekan ti ministeriona idi ditoy daga nga adda pannakabalinna ken kayatna nga agasan ti aniaman nga an-annayen ti sangatauan. Dayta ti apag-isu nga aramidennanto.

Ipasigurado kadatayo dagiti padto ti Biblia nga asidegen nga “awanto ti agtataeng nga agkuna: ‘Masakitak.’” (Isaias 33:24) Nupay saan a napasardeng ti sangatauan ti panagsaknap ti AIDS wenno di nakaipaay iti nasamay nga agas kadagiti amin nga agsagsagaba, makapagtalektayo a mapukawto a naan-anay ti AIDS. Kinuna ni David: “Bendituem ni Jehova, O kararuak, ket dika lipaten dagiti amin nga aramidna, isu a mangpakpakawan iti isuamin a biddutmo, a mangpapaimbag kadagiti amin a sakitmo.”​—Salmo 103:2, 3.

Kaanonto a mapasamak daytoy? Ania dagiti kalikaguman ti Dios kadagiti manginanama nga agsagrap kadagita a bendision? Awisendaka a makiuman kadagiti Saksi ni Jehova tapno maammuam ti ad-adu pay maipapan kadagiti makaparagsak a kari ti Biblia.

[Footnote]

[Blurb iti panid 11]

Ipasigurado kadatayo dagiti padto ti Biblia nga asidegen nga “awanto ti agtataeng nga agkuna: ‘Masakitak’”

[Ladawan iti panid 10]

Ti panangisurom kadagiti annakmo maipapan iti sekso ken panagdroga ti mabalin a mangsalaknib kadakuada

[Ladawan iti panid 10]

Ti pannakabalin ni Jesus ken ti dina panagkedked a mangagas kadagiti masakit ti mangipakita no anianto ti aramidenna iti masanguanan