Manipud Kadagiti Agbasbasa

Kurang a Turog Agyamanak gapu iti serye a “Kurang Aya ti Turogmo?” (Pebrero 8, 2004) Kanayon a makagun-od dagiti agbasbasa iti Agriingkayo! iti nagadu a makaisuro nga impormasion ken liwliwa. Agarup dua ket kagudua a tawenen nga agsagsagabaak iti sleep apnea. Idi damo, ammok nga adda depekto ti bagik, ngem diak ammo no ania dayta. Kalpasan ti pannakadayagnosko, naammuak ti dakes nga epekto ti makurangan iti turog! Daytoy a magasin ti nakatulong kaniak a mangilawlawag iti kasasaadko kadagiti gagayyemko.

W. M., Estados Unidos

Nainaig kadagiti computer ti trabahok ket gapu iti eskediulko, saan a regular ti oras ti pannaturogko. Tapno makamakamko ti naikeddeng a petsa, nabiit pay a sumagmamano a rabii a nagtrabahoak a bassit laeng ti turogko. Di nagbayag kalpasanna, idi madama nga agpalpalawagak idiay Kingdom Hall iti lugarmi, medio nariroak. Naibagak ti eksakto a kasungani ti rumbeng koma nga ibagak! Talaga a nagdanagak idi nabasak iti daytoy a magasin ken naammuak ti makadangran a resulta ti kurang a turog. Nalawag a panawenen tapno baliwak manen ti pannaturogko.

T. I., Japan

Diak malapdan ti kinatiweng dagiti sakak no nakaturogak kas iti nadakamat iti serye. Nupay addan dadduma a makatulong nga inaramidko tapno umimbag ti an-annayek, agtalekak iti kari ti Biblia a masarakan iti Isaias 33:24 a nakaas-asidegen ti tiempo inton “awanto ti agtataeng nga agkuna: ‘Masakitak.’”

L.O.G., Espania

Adda sumagmamano a di umiso nga impormasion iti artikuloyo maipapan iti restless leg syndrome wenno di malapdan a kinatiweng dagiti saka. Agsagsagabaak iti nakaro a kita dayta a sakit, ket di umiso dagiti imbagayo a pakaigapuanna. Sakit daytoy a nainaig kadagiti urat ken masel.

Y. J., Estados Unidos

Sungbat ti “Agriingkayo!”: Saan a detalyado ti panangilawlawag ti artikulomi kadagiti medikal a pakaigapuan daytoy a sakit. Imbes ketdi, dinakamatna ti dadduma a patien dagiti managsukisok a mabalin a pakaigapuan dayta. Nupay kasta, kas impamatmat ti footnote iti dayta nga artikulo, ad-adu ti pannakailawlawag ti di malapdan a kinatiweng dagiti saka iti Nobiembre 22, 2000 a ruarmi. Kinuna dayta nga artikulo: “Nupay bigbigen dagiti eksperto iti RLS a sakit dayta a nainaig kadagiti neuron, narigat nga ammuen ti makagapu.”

Kawes Dagiti Mexicano Binasak buyogen iti kasta unay a panaginteres ti artikulo nga “Apresiarenmi Dagiti Kawesmi.” (Pebrero 8, 2004) Naragsakanak unay ta nadakamatyo dagiti Chontal iti Oaxaca, uray no bassitda no idilig ti dadduma nga etniko a grupo. Chontal ni apongko ken ti apongko iti tumeng, ket para kaniak, nadayaw unay ti pannakaisalaysay dayta nga impormasion.

A. L., Mexico

Dagiti artikulo a kas iti daytoy ti makatulong kadakami tapno maam-ammomi a naimbag ti dadduma a kultura ken puli. Pangngaasiyo ta itultuloyyo ti mangipablaak kadagiti kasta a nagsayaat nga impormasion, ta ti panagbasa iti dayta ket maysa a pamay-an tapno masarungkaranmi dagiti tattao ken lugar yantangay saanmi a kabaelan ti agdaliasat a mismo a mapan sadiay.

M.L.E., Mexico

Dagiti Pusa Agtawenak iti 13, ket talaga a kaay-ayok ti agbasa iti Agriingkayo! Nagustuak ti artikulo a “No Agbalin a Naatap Dagiti Pusa.” (Pebrero 8, 2004) Kaay-ayok amin nga animal nangruna dagiti pusa. Segseggaak unay ti sumaganad a ruar!

Z. B., Russia

Tudo Agyamanak unay iti artikulo nga “Agtudtudo Manen!” (Pebrero 8, 2004) Adun a tawen a pampanunotek no kasano a maurnong iti tangatang ti minilion a tonelada a danum. Gapu iti Agriingkayo!, nasungbatan met laengen ti saludsodko.

G. D., Francia