Ti Pangallukoy ti Panagkalap iti Kaniebian
Ti Pangallukoy ti Panagkalap iti Kaniebian
Babaen iti mannurat ti Agriingkayo! idiay Finland
TI NAPINTAS nga al-aldaw iti tiempo ti lam-ek iti Amianan ti mangipaay iti nagadu a gundaway para kadagiti aktibidad iti ruar ti balay. Tapno matagiragsakda ti kaniebian ken ti presko nga angin, dagiti tattao ket mapanda nga agpagnapagna, ag-ski, ag-skating, wenno agsakay iti lugan para iti kaniebian. Adda met dagidiay kaykayatda ti agkalap iti kaniebian. Nabayagen a pampanunotek, ‘Apay a makaallukoy unay ti panagkalap iti kaniebian?’ Isu a kiniddawko iti gayyemko a ni Martti, maysa nga aduan kapadasanen a mangngalap iti kaniebian, nga ikuyognak nga agkalap.
Agbannawagen idi nagkitakami ken ni Martti iti sango ti balayna. Nayempakenan ti amin a kasapulan: banniit, appan, pangayaw, pagtugawan, ken ti kangrunaan nga alikamen—maysa a dakkel a barrena ti yelo a pagabut iti kaniebian. Ti laeng maitutop a pagkawesko ti nasken nga itugotko. Masapul a nabengbeng ken naimeng dagiti kawesmi. Ti mangngalap iti kaniebian ket nakatugaw iti napaut a tiempo, ken mabalin a makapaketter ti angin kadagiti nawayang a lugar iti baybay ken dan-aw. Dandani kanayon nga agkalap ni Martti iti baybay agsipud ta asideg dayta iti pagnanaedanna. No iti uneg koma ti pagilian, nalabit kaay-ayona ti agkalap iti dan-aw wenno iti karayan.
Idi nakadanonkami iti igid ti baybay ken bimmaddekkamin iti kaniebian, kinunak iti bagik, ‘Natalged ngata ti magna iti baybay a nagbalin a kaniebian?’ Iti daytoy a tiempo, talaga a natalged. Gapu iti makapaketter a temperatura iti rugrugi ti tiempo ti lam-ek, talaga a nagpaiduma ti kinapuskol ita ti yelo. Ngem rumbeng latta nga agannadkami no addakami iti kaniebian. Iti dadduma a disso, mabalin a naingpis ti yelo uray no nakaro ti tiempo ti lam-ek. Nasken nga ammomi ti kasasaad ti yelo ken dagiti kakuykuyogna a peggad ken rumbeng a nakabalankami a naimbag. Kalpasan ti apagbiit a pannagnami, nangrugin a nagabut ni Martti iti kaniebian. Kas man la keso dayta para iti barrena, isu a nagbiit a nakaabutkami iti 70 a sentimetro a kauneg. Inusar ni Martti ti kasla aklo nga adu ti abutna, a pinangdalusna iti abut ken ti nadanum a kaniebian. Kalpasanna, nagtugaw iti maaw-awit a pagtugawan, insaganana ti banniitna, sana impauyaoy iti kaniebian.
Nupay kasla simple ti agkalap iti kaniebian—abutam laeng dayta sa mangrugikan nga agkalap—nalaklaka no adda bassit a pannakaammom maipapan iti dayta. Kas pagarigan, napateg ti panangpili iti umiso a lugar. Yantangay saan unay a makaadayo dagiti ikan tapno agsapul iti taraonda no tiempo ti lam-ek, napateg a maammuan no sadino ti paguummongan dagiti ikan. Iti napalabas a panagkalap ni Martti, inkeddengnan ti rumbeng a papananmi ita. No napankami koma kadagiti dina kabesado a paset ti baybay, nalabit nangaramidkami iti naannad a panangsurbey iti mapa ken implanomi a nasaksakbay no pagkalapanmi. Ti mangngalap iti kaniebian masapul a paliiwenna met ti paniempo ken dagiti epekto dayta iti panagdakiwas dagiti ikan. Mabalinna ti agsapul iti ikan babaen ti panagabutna iti nadumaduma a disso iti kaniebian. Kabayatan ti aldaw, mabalin nga adu ti abutan ti mangngalap.
Ita, kasla aglemlemmeng dagiti ikan wenno saanda a mabisin. Aniaman ti kasasaad, saanmi a problema dayta. Ngamin, nasursurok no ania ti pudno a makaallukoy iti panagkalap iti kaniebian. Napatpateg ti kaaddami iti ruar a mangtagiragsak iti nakaparsuaan ngem iti panagkalap. Kastoy ti pananggupgop ni Martti iti dayta: “Nangruna kadagiti agnanaed iti siudad, kasla panagbakasion dayta. Malipatam ti amin a pakasikoram.”
[Ladawan iti panid 27]
Panangabut iti yelo
[Ladawan iti panid 27]
Barrena iti yelo