Manipud Kadagiti Agbasbasa

Dagiti Taraken Pagyamanan unay iti serye a “Dagiti Taraken​—Kasano ti Panangmatmatmo Kadakuada?” (Pebrero 22, 2004) Apresiarek a nangnangruna ti pannakaisurat dagiti artikuloyo, a mangipakita iti ayat ken panangigaga kadagiti animal. Ikkakto iti kopia daytoy a magasin ti beterinariok. Sapay koma ta dagiti artikulo a kas iti daytoy ti mangtignay kadagiti kaay-ayoda dagiti animal nga agbalin a nasingsinged ken Jehova.

O. M., Italia

Nabiit pay a nangrugiak nga agsolsolo nga agbibiag, isu nga agtartarakenak iti dua a kuting. Kaay-ayok ida, ngem naawatak met ti kinapateg ti di panangibilang kadakuada a kas man la tattaoda. Impaawat kaniak daytoy nga artikulo a nasken a natimbengak no maipapan kadagiti taraken.

K. O., Japan

Pagyamanan unay. Tallo a lawas ti napalabasen sipud idi inkeddengko a mapapatay ti asok nga agtawenen iti 13 tapno agpatinggan ti panagsagabana. Daydi ti maysa kadagiti karirigatan a desision nga inaramidko. Iti dayta nga agsapa, binasak manen ti serye maipapan kadagiti taraken. Naasi, mannakaawat, ken makatulong dayta.

S. G., Estados Unidos

Empleadonak ti maysa a tao nga agdinamag gapu kadagiti naitulongna iti moderno nga industria ti taraon para kadagiti animal. Imbatik ti serye maipapan kadagiti taraken iti asideg ti computer-ko. Idi napanak nangaldaw, nakitana ti magasin, binasana dayta, ken nagustuanna unay isu a kayatnan ti regular a makaawat iti Agriingkayo!

L. W., Estados Unidos

Nagsayaat dagiti artikulo ken tinulongandak a mangbalanse kadagiti riknak maipapan kadagiti taraken. Kayatko a dakamaten a no mangisangpet ti maysa a tao iti pusa wenno aso iti pagtaenganna, rumbeng nga ipakaponna dayta. Ngamin, ti maysa a makagapu a nagadu nga aso ken pusa ti mapapatay iti kada tawen ket kurang dagiti pagtaengan a pakataraknanda.

C. B., Estados Unidos

Sungbat ti “Agriingkayo!”: Pagyamanan iti panangipaawatyo iti daytoy kadagiti agbasbasa.

Sigun iti artikuloyo, idiay baro a lubong ti Dios, ‘amin nga animal, agpada dagiti naamo ken atap, agkakapiadanton.’ Nainkalintegan kadi a patien nga awanton dagiti animal nga agkaan kadagiti padada nga animal?

D. B., Canada

Sungbat ti “Agriingkayo!”: Sipud idi nagbasol ti tao, adu ti saanen a balanse iti planetatayo. Panawen laeng ti makaibaga no kasano ti eksakto a pannakatungpal dagiti padto ti Biblia a nangdakamat iti panagtutunos dagiti animal idiay Paraiso. Ngem makapagtalektayo a naan-anay nga ikkatento ti Namarsua kadatayo ti amin a makadangran manipud iti planetatayo.​—Salmo 37:10, 11.

Pannagna Pagyamanan iti artikulo nga “Apay a Rumbeng a Magnaka?” (Pebrero 22, 2004) Nasayaat a maammuan a makissayan ti maysa a tao ti peggad nga agsakit ti pusona ken maistrok babaen laeng ti pannagnana! Ti artikulo ti nangipaamiris kaniak a nabayagen a masansan a nakatugaw ti estilo ti panagbiagko. Surotekto ti balakad a regular a magnaak.

L. B., Sweden

Phone Sex Kayatko nga iyebkas ti panagyamanko iti artikulo nga “Agimtuod Dagiti Agtutubo . . . Ania ti Pagdaksan ti Phone Sex?” (Pebrero 22, 2004) Nasaem ti kapadasak iti panangtamingko iti daytoy nakaro a parikut. Gapu iti dayta, nadangran ti espiritualidadko, isu a nakaaramidak kadagiti nadagdagsen a basol ken napukawko dagiti pribilehiok iti kongregasion Kristiano. Sapay koma ta maaddaankayo iti kinasirib ni Jehova bayat a mangipablaakkayo kadagiti artikulo a makatulong kadakami nga agtalinaed a nabileg iti naespirituan.

J. H., Espania