Panangmatmat iti Lubong

Agsakit ti Pusom no Naungetka

“Dagiti lallaki a naunget wenno managpungpungtot nabibiit a makapataudda iti iregular a panagpitik ti puso a maawagan iti atrial fibrillation,” kuna ti Daily News ti New York. Natakuatan dagiti managsirarak a 30 a porsiento nga ad-adda a makapataud iti iregular a panagpitik ti puso dagiti lallaki a managpungpungtot wenno managpudpudot wenno dagiti pagsasawanda ti sabsabali no matungdayda wenno makaungetda no mababalawda. Kinuna ti direktor iti panagadal a ni Elaine Eaker: “Adu ti mamati a mabalin a malapdan dagiti pagdaksanna iti salun-at ti panagpungtot no medmedan imbes nga ipapas dayta. . . . Ngem sigurado a saan a kasta ti kasasaad dagiti lallaki iti daytoy a panagadal​—ad-adda nga agpeggadda saan laeng nga iti atrial fibrillation, no di ket matayda iti dadduma pay a makagapu.”

 Panagasawa ken Diborsio Idiay Britania

Idiay Britania, “kakatlo kadagiti awanan asawa ti agkuna a ‘posible a didanton’ makikallaysa,” kuna ti Daily Telegraph ti London. Ni Jenny Catlin, maysa nga analista para iti Mintel International Group, kunana: “Daytoy ti nalawag a mangipakita a nagbalbaliwen ti kababalin dagiti tattao maipapan iti panagasawa.” Innayonna: “Ad-adu itan ti mayat a makikabbalay ken maaddaan iti annak, nupay dida nagkasar.” Para kadagidiay mayat nga agkasar, ti nangina a gastos​—nga agpromedio itan iti $28,600​—ti makagapu nga umad-adu dagiti mayat nga agkasarda iti sabali a pagilian. Kaykayat itan ti nasurok a 10 a porsiento kadagiti Britano nga agnobio ti agkasar iti ganggannaet a lugar. Gapu ta manmano dagiti sangailida ken nalaklaka ti taraon, mabalin a kakatlo iti magastosda iti mismo a pagilianda. Nupay bumasbassit dagiti agkasar, umad-adu dagiti agdiborsio. “Maminlima itan ti kaadu dagiti agdiborsio kadagiti lallakay ken babbaket ngem idi napalabas a 30 a tawen, ket adu ti madanagan iti agtultuloy nga iyaadu dayta a bilang,” kuna ti Telegraph.

Panangabuso Kadagiti Ubbing Idiay Mexico

Sigun iti departamento ti hustisia ti Mexico City, “1 iti kada 8 nga ubbing a babbai ken 1 iti kada 10 nga ubbing a lallaki ti biktima ti seksual a panangabuso idiay Mexico City,” kuna ti periodiko nga El Universal. Ti departamento ti hustisia ket mangiwarwaras kadagiti pampleta a mamakdaar kadagiti nagannak maipapan iti seksual a panangabuso ken mangisingasing kadagiti rumbeng nga aramiden no mapasamak dayta. Adtoy ti sumagmamano kadagiti naisingasing: (1) Patien ken tulonganyo ti anakyo no impulongna kadakayo nga adda seksual a nangabuso kenkuana. (2) Ilawlawagyo iti anakyo a saanna a basol ti napasamak. (3) Ipakaammoyo iti anakyo a ti napasamak ket maibusor iti linteg isu a rumbeng a maipulong iti polisia tapno saanton a maulit.

Panangikkat Kadagiti Tato

“Sigun iti dadduma a surbey, kayat ti 80 agingga iti 90 a porsiento nga ipaikkat dagiti tatoda inton agangay,” kuna ti Vancouver Sun ti Canada. “Immadu ti kayat nga ipatato dagiti tattao, isu nga immadu met dagiti mayat a mangipaikkat iti dayta,” kinuna ti maysa a dermatologo. Ti gagangay a pagarigan ket ti agtawen iti 27 a ni Dan, a nangipaikkat iti natayengteng ti kinaberdena a marka iti takiagna. Kinunana: “Saannan nga irepresentar ti kinataok.” Ngem uray no mausar ti moderno a laser, ti panangikkat iti tato ket mabalin a naut-ot, nangina, ken mangibus iti tiempo. “Uray ti panangikkat iti bassit a tato ket mabalin nga aggatad iti $1,400,” kinuna ti periodiko. Kinunana pay: “Dagiti mas moderno, namaris a tato, nangruna no dakkel, ket dandani imposiblen a maikkat.”

Makapapatay a Pagsungrod

“Ti asuk nga aggapu iti dalikan iti uneg ti balay ti pakatayan ti maysa a tao iti kada 20 a segundo kadagiti napanglaw a pagilian,” kuna ti magasin a Down to Earth iti New Delhi, India. “Ad-adu nga amang ti bilang dagiti matay gapu iti asuk ngem kadagiti natay iti malaria, ken kapada dayta a bilang dagiti natay gapu iti kontaminado a danum ken kinarugit.” No saan a nasayaat ti bentilasion dagiti siled ken mausar a pagsungrod ti karbon ken material nga aggapu kadagiti animal ken mula, masansan nga apektaranda dagiti sangakabbalayan iti polusion a 100 a daras a narugrugit ngem iti kabaelan nga ibturan a kaadu dagiti narugit nga angin. Dagitoy a mangrugit ti pakaigapuan met ti kanser iti bara, angkit, sarut, ken nakaro a bronkitis. Kuna dagiti eksperto manipud iti Intermediate Technology Development Group, maysa nga organisasion dagiti managsirarak, dagiti tattao a di makabael a gumatang iti nadaldalus a pagsungrod mabalin a maksayanda iti inggat’ 80 a porsiento ti malang-abda a makadangran nga asuk wenno angot no agusarda kadagiti nasayaat ti pannakadisenioda a simburio wenno pangagsep iti asuk. Kadagiti 1.6 a milion a matay iti kada tawen gapu iti polusion iti angin iti uneg ti balay, dandani maysa a milion ti ubbing.

Mangmangged a Lallakay ken Babbaket

Umad-adu dagiti mangmangged pay laeng a taga Canada a nasuroken nga 65 ti tawenda​—ti gagangay nga edad ti panagretiro idiay Canada, kuna ti The Globe and Mail. Iti nasurok a lima a tawen, immadu iti 11 a porsiento ti bilang dagiti lallakay ken babbaket, ngem dandani 20 a porsiento ti immaduan ti bilang dagiti agtartrabaho a lallakay ken babbaket. Apay a nagadu ti mangitantan iti panagretiroda? “Nasalsalun-at dagiti tattao ita,” kuna ti analista iti Statistics Canada a ni Doreen Duchesne. “Napapaut ti panagbiagda.” Dagiti nadakamat met a makagapu ket ti pannakasapulda iti kuarta ken panagsikor. Sigun iti maysa a report, mangmangged latta ti 6 a porsiento kadagiti agtawen iti nasuroken a 80. Ti panagtalon ti kangrunaan a panggedan dagiti lallakay ken babbaket, a sarunuen dagiti trabaho iti opisina ken panaglako.

Adu ti Agsigsigarilio Idiay Europa

Nakadanonen iti 40 a porsiento iti populasion ti bilang dagiti agsigsigarilio iti European Union, kuna ti Espaniol a periodiko nga El País. Ti Grecia, nga adda 44 a porsiento iti populasion ti agsigarilio, ti pagilian iti Europa a kaaduan kadagiti mannigarilio. Ti patauden ti Grecia nga 40,000 a tonelada a tabako iti kada tawen ti makagapu a dayta met ti kadakkelan nga agpatpataud iti tabako iti Europa. Karaman ti Portugal kadagiti pagilian iti Europa a kabassitan iti porsiento kadagiti mannigarilio, agraman dagiti pasaray agsigarilio. Nasurok la bassit a 29 a porsiento ti mannigarilio sadiay uray no ti presio ti tabako idiay Portugal ti kalakaan iti European Union. Ti maysa a posible a makagapu iti daytoy a bassit a bilang dagiti mannigarilio ket sipud idi 1982, iparit ti baro a linteg ti Portugal ti panangyanunsio kadagiti sigarilio agraman ti panagsigarilio kadagiti pangpubliko a lugar.

Ti Libro a Kangrunaan a Maipatpatarus

Ti Biblia ti agtultuloy a kangrunaan a maipatpatarus a libro iti lubong. Masarakan ti intero wenno paspasetna iti 2,355 a pagsasao iti agarup 6,500 a pagsasao nga adda ita. Magun-odan itan ti Biblia iti 665 a pagsasao idiay Africa, sarunuen ti 585 iti Asia, 414 iti Oceania, 404 iti Latin America ken Caribe, 209 iti Europa, ken 75 iti Amianan nga America. Madama a tumultulong ti United Bible Societies kadagiti proyekto a panagipatarus iti Biblia iti agarup 600 a pagsasao.