Ti Kapatgan a Kita ti Kinapintas

MAGUSTUAN ti tattao dagidiay ibilangda a napintas. Ngem ania a talaga ti mangpapintas kenka? Ngamin, bassit ti maaramidantayo tapno sitatalged a mabalbaliwan ti natawidtayo a langa. Kasta met nga agkupas ti pisikal a kinapintas, ta awan ita ti makalapped kadagiti epekto ti panaglakay wenno panagbaket agraman sakit. Adda pay kadi napatpateg, napapaut, ken mabalin a magun-odan a sabali a kita ti kinapintas?

Ti Kinapateg ti Makin-uneg a Kinapintas

Ipasigurado kadatayo ti Namarsua a ni Jehova a Dios, nga ipatpategna ti makin-uneg a kinapintas. Amirisem ti sumagmamano a pagarigan.

Idi imbaga ni Jehova ken mammadto a Samuel a mangpili iti ari ti Israel manipud kadagiti annak ni Jesse, naallukoy ti mammadto iti kinaguapo ni Eliab. ‘Awan duadua a daytoy a lalaki ti pinili ti Apo,’ kinuna ni Samuel. Ngem kinuna ni Jehova ken Samuel: “Dimo kitaen ti kinaguapo ken kinatayagna. Saan nga isu ti pinilik. Ti pagbatayak ket saan a ti pagbatayan ti tao. Kitaen ti tao ti akinruar a langa, ngem siak, kitaek ti puso.”​—1 Samuel 16:6, 7, Ti Baro a Naimbag a Damag Biblia.

Ti napili nga agbalinto nga ari isu ti buridek a ni David. Nupay makuna a “napintas dagiti matana” ken “nataer ti langana,” mabalin a ni David saan a kas ti kaguapo dagiti natataengan a kakabsatna. Ngem “ti espiritu ni Jehova nangrugi nga agtignay ken David manipud iti dayta nga aldaw ken agpatpatuloy.” Nupay imperpekto ken nakaaramid iti sumagmamano a nadagsen a basol, nagdinamag nga addaan iti nasayaat ken naimbag a puso ken matalek nga adipen ti Dios inggat’ tungpal-biagna. (1 Samuel 16:12, 13) Awan duadua a makaay-ayo iti imatang ti Dios a nangnangruna gapu iti makin-uneg a kinapintasna.

Maisupadi iti dayta, usigem ni Absalom, a maysa kadagiti annak ni David. Nagbalin a di makaay-ayo a tao nupay naguapo. Kuna ti Biblia maipapan kenkuana: “Ita no maidilig ken Absalom awan idi ti lalaki a nakaliblibnos iti intero nga Israel tapno maidaydayaw iti kasta unay. Manipud dapan ti sakana agingga iti kuppokuppona isu awanan idi iti pilaw.” (2 Samuel 14:25) Nupay kasta, ti ambision ni Absalom ti nangtignay kenkuana nga umalsa ken amana ken mangagaw iti trono. Rinamesna pay dagiti kamalala ni amana. Nagbanaganna, nakapungtot ti Dios ken ni Absalom isu a nagsagaba iti nasaem nga ipapatay.​—2 Samuel 15:10-14; 16:13-22; 17:14; 18:9, 15.

 Magustuam aya ni Absalom? Siempre saan. No usigem, dakes ti kababalinna. Ti naisangsangayan a kinaguapona ket saan a maibagay iti kinatangsit ken iti kinagulibna, saan met a nakalapped dayta iti pannakadadaelna. Iti kasumbangirna, addaan ti Biblia iti adu a pagarigan maipapan kadagiti masirib ken makaay-ayo a tattao uray awan ti naibaga maipapan iti pisikal a langada. Nabatad a ti makin-uneg a kinapintasda ti kapatgan.

Makaay-ayo ti Makin-uneg a Kinapintas

Makaay-ayo kadi iti sabsabali ti makin-uneg a kinapintas? Kuna ni Georgina, a naasawaanen iti dandanin sangapulo a tawen: “Iti panaglabas dagiti tawen, simmingedak ken ni lakayko gapu iti kinapudno ken kinapasnekna kaniak. Ti panangparagsak iti Dios ti kapatgan iti biagna. Daytoy ti nakatulong tapno agbalin a nakonsiderasion ken nadungngo. Ikabkabilangannak no agdesision ket mariknak nga ipatpategnak. Ammok a talaga nga ay-ayatennak.”

Kuna ni Daniel a kasadon sipud pay idi 1987: “Para kaniak, napintas ni baketko. Saanak laeng a maay-ayo iti pisikal a kinapintasna no di ket ad-adda pay nga ay-ayatek gapu iti personalidadna. Sangkapanunotna ti sabsabali ken agar-aramid kadagiti makaparagsak kadakuada. Nagsayaat dagiti Nakristianuan a kalidadna. Maragsakanak a makikadua kenkuana gapu iti daytoy.”

Iti daytoy a napammarang a lubong, masapul a saan laeng a ti makinruar ti kitaentayo. Masapul a bigbigentayo a narigat a ragpaten ti “kapintasan” a langa​—no di man imposible​—ken saan nga agpaut ti pategna. Nupay kasta, mabalin a maaddaantayo kadagiti makaay-ayo a kababalin a makaipaay iti pudno a makin-uneg a kinapintas. Kuna ti Biblia: “Ti kayaw mabalin nga ulbod, ken ti kinalibnos mabalin nga ubbaw; ngem ti babai nga agbuteng ken Jehova isu ti makagun-od iti dayaw maipaay iti bagina.” Maisupadi iti dayta, mamakdaar ti Kasuratan: “Kas iti balitok nga aritos ti agong iti subsob ti baboy, kasta ti babai a nalibnos ngem ad-adaywanna ti kinasimbeng.”​—Proverbio 11:22; 31:30.

Tulongannatayo ti Sao ti Dios a mangipateg “iti nalimed a kinatao ti puso iti di agrupsa a pagan-anay ti naulimek ken naalumamay nga espiritu, nga addaan dakkel a pateg iti imatang ti Dios.” (1 Pedro 3:4) Pudno unay nga adayo a napatpateg ti kasta a makin-uneg a kinapintas ngem iti pisikal a kinapintas. Kasta met a daytat’ mabalin a gun-oden ti amin a tattao.

[Ladawan iti panid 8, 9]

Ad-adda a papintasennaka dagiti naimbag a kababalin ngem iti aniaman a pisikal a pagpapintas