Ti Panangmatmat ti Biblia

Kinakapuy Aya ti Kinaalumamay?

“Ti adipen ti Apo saan a kasapulan a makiapa, no di ket kasapulan nga agbalin a naalumamay kadagiti isuamin.”​—2 TIMOTEO 2:24.

NABAYAGEN sakbay pay a naipasngaytayo, ti tumantanor a kudiltayo ket sensitibon iti panangsagid. Sipud pannakaipasngaytayo, tartarigagayantayo ti panangapros ni nanangtayo. Kabayatan ti kinaubingtayo, ti nabuslon a panangdungngo kadatayo ti dadakkeltayo ti nangpatanor iti pagannayasantayo nga umisem, iti abilidadtayo a mangpatanor iti riknatayo, ken uray iti tarigagaytayo nga agbalin a nalaing a makikomunikar.

Nupay kasta, impadto ti Biblia a kadagiti maudi nga aldaw, dagiti tattao ket agbalin a “nasukir kadagiti nagannak, saan a managyaman, saan a nasungdo, awanan nainkasigudan a panagayat.” Manmanon a maipakita dagiti naalumamay a kualidad a kas iti kinaasi, agsipud ta dagiti tattao ket ‘managayat iti bagbagida’ ken “narungsot, awanan panagayat iti kinaimbag.”​—2 Timoteo 3:1-3.

Patien ita ti adu a rumbeng nga agbalintayo a nagubsang ken di mannakipagrikna.  Kunada a ti kinaalumamay ket pakakitaan ti kinakapuy. Ngem agpayso aya dayta?

Naalumamay, Ngem Mannakabalin

Ni Jehova a Dios ket nailadawan kas “malalaki a mannakigubat.” (Exodo 15:3) Isu ti kangrunaan a Gubuayan ti amin a pannakabalin. (Salmo 62:11; Roma 1:20) Nupay kasta, ti kinabileg ni Jehova ti di manglapped kenkuana nga agbalin a “nadungngo unay iti panagayat ken naasi” idi ginunggonaanna ti matalek a ni Job. (Santiago 5:11) Kadagiti pannakilangenna iti Israel, inladawan ni Jehova ti kasingedan a relasion babaen ti panangyarigna iti riknana iti agpaspasuso nga ina a maasian iti “anak ti tianna.”​—Isaias 49:15.

Umasping iti dayta, agpadpada a nabileg ken naalumamay ni Jesus. Kasta unay ti panangkondenarna kadagiti managinsisingpet a panguluen ti relihion idi kaaldawanna. (Mateo 23:1-33) Pinaruarna met dagiti naagum nga agsuksukat iti kuarta idiay templo. (Mateo 21:12, 13) Ngem ti aya pananggura ni Jesus iti kinarinuker ken kinaagum ti namagbalin kenkuana a di mannakipagrikna? Saan a pulos! Nagdinamag ni Jesus a naalumamay iti sabsabali. Kinapudnona, inyaspingna pay ti bagina iti upa a “mangummong iti pangen dagiti piekna iti sirok dagiti payakna.”​—Lucas 13:34.

Nabileg iti Makinruar Wenno iti Makin-uneg?

Maiparparegta kadagiti pudno a Kristiano a tuladenda ni Kristo babaen ti panangikawesda iti “baro a personalidad a naparsua maitunos iti pagayatan ti Dios.” (Efeso 4:20-24) Naibilin met nga ‘uksobentayo ti daan a personalidad agraman dagiti aramidna,’ a kas iti rasa nga aglupos iti daan a balayna tapno masukatan iti baro. (Colosas 3:9) Nupay kasta, saan a kas iti rasa a tumangkento manen ti balayna kalpasan a naglupos, naibilin a permanente a kawesantayo ti bagitayo iti “kinalailo ti pannakipagrikna, kinamanangngaasi, . . . ken mabayag a panagitured.” (Colosas 3:12) Ngarud, ti kinaalumamay ti rumbeng a maysa kadagiti kangrunaan a galadtayo.

Ti panangikawestayo kadagiti naalumamay a kualidad ket saan a pagilasinan iti kinakapuy. Imbes ketdi, rumbeng a ‘mapabilegtayo iti kinataotayo iti uneg buyogen ti pannakabalin babaen ti espiritu ni Jehova.’ (Efeso 3:16) Kas pagarigan, kinuna ti maysa a lalaki nga agnagan iti Lee: “Naulpit ken dakesak idi. Nakabutbuteng uray ti langak, gapu ta adda dagiti alahas a naitudok iti bagik. Determinadoak idi a maaddaan iti adu a kuarta isu a diak mabain nga agsao iti dakes ken mangranggas tapno maalak ti kayatko. Bimmato ti pusok.” Nupay kasta, rinugian ni Lee ti nakipagadal iti Biblia iti maysa a katrabahuanna isu a naam-ammo ken inayatna ni Jehova a Dios. Inuksobna ti daan a personalidadna ken nasursurona ti agteppel. Ita, ipakpakitanan ti panagayatna kadagiti tattao babaen ti panagboluntariona a tumulong kadakuada nga agadal iti Biblia.

“Nakuspag” met idi ni apostol Pablo a nangusar iti kinaranggas tapno maibanagna dagiti kalatna. (1 Timoteo 1:13; Aramid 9:1, 2) Nupay kasta, naapresiar ni Pablo ti asi ken ayat nga impakita kenkuana da Jehova a Dios ken ni Jesu-Kristo isu a sinubadanna dayta babaen ti panangikagumaanna a mangtulad kadagita a kualidad. (1 Corinto 11:1) Nupay intakderan ni Pablo dagiti Nakristianuan a prinsipio, nasursurona ti makilangen a siaalumamay iti sabsabali. Kinapudnona, sibubuslon nga impakita ni Pablo ti kinadungngona kadagiti kakabsatna.​—Aramid 20:31, 36-38; Filemon 12.

Pananggun-od iti Bileg Tapno Agbalintayo a Naalumamay

Kas ipakita dagiti kapadasan da Lee ken ni apostol Pablo, ti panagsursuro a makilangen a siaalumamay iti sabsabali dina kasapulan nga agbalin a nakapuy ti kinatao ti maysa. Imbes ketdi, kasapulan ti pudno a kinabileg tapno mabalbaliwan ti maysa a tao dagiti panunot ken aramidna ken maparmekna ti nainlasagan a tarigagayna a “subadan ti dakes iti dakes.”​—Roma 12:2, 17.

Mabalintay met a sursuruen ti agbalin a naasi babaen ti regular a panagbasatayo iti Sao ti Dios ken panangmennamennatayo iti ayat ken asi nga impakita da Jehova a Dios ken ni Jesu-Kristo kadatayo. No aramidentayo dayta, ipalpalubostayo a ti pannakabalin ti Sao ti Dios ti mangpalukneng iti pusotayo. (2 Cronicas 34:26, 27; Hebreo 4:12) Aniaman ti pamilia a nagtaudantayo wenno kasano man kasaem dagiti napasarantayo iti biag, kabaelantayo a sursuruen ti agbalin a “naalumamay kadagiti isuamin.”​—2 Timoteo 2:24.

[Ladawan iti panid 18]

Ti naimbag nga ama ket naalumamay kadagiti annakna