Mabalin Pay a Masalbar ti Planeta a Daga!

INLAWLAWAG dagiti immuna nga artikulo a saan a mabalin nga itultuloy ti tao nga usaren ti nakaisigudan a gameng ti daga iti agdama a kapartak. Agpayso a makomendaran dagiti agtuturay ti lubong iti panangikagumaanda a mangpasardeng iti polusion, pannakakalbo dagiti kabakiran, ken dadduma  pay a problema ti aglawlaw. Sipud idi naaramid ti UN Conference on Human Environment idi 1972, ken dagiti simmaruno pay a regular a komperensia, addan 163 a pagilian a nagtataripnong tapno iyebkas ti suportada kadagiti plano a naikeddeng a maipatungpal. Ngem ania dagiti resultana? “Nakalkaldaang ta daytoy nagadu a tulagan, plano a naikeddeng a maipatungpal, ken dadduma pay a tulagan dida napasayaat ti kasasaad ti sangalubongan nga aglawlaw,” kuna ni David Hunter, a direktor ehekutibo ti Center for International Environmental Law. Kinapudnona, kinuna ni Hunter, “nakarkaro ti ipamatmat ti dandani amin a kangrunaan a pakakitaan iti kasasaad ngem iti Komperensia ti UN idi 1992.”

Apay a nagbassit ti irarang-ay kalpasan ti nasurok a 30 a tawen a panangrisut kadagiti parikut ti aglawlaw? Ti irarang-ay ti ekonomia ti maysa a makagapu. Agpannuray ti ekonomia dagiti pagilian iti panagusar dagiti aggatang. Dagiti negosio ket masapul nga agpartuat kadagiti produkto, ket gapu iti dayta, masapul nga agusarda kadagiti di pay naproseso a material. Agrikrikus laeng dayta a proseso isu nga inton agangay, agsagaba ti aglawlaw. Ania ngarud ti solusion?

Di Umiso a Pannakaiturong Dagiti Addang

Ilawlawag ti Biblia no apay a nakalkaldaang ti panangikagumaan ti tao a mangituray iti bagina. Kinuna ni mammadto a Jeremias: “Pagaammok unay, O Jehova, a saan a kukua ti naindagaan a tao ti dalanna. Saan a kukua ti tao a magmagna uray ti panangiturong iti addangna.” (Jeremias 10:23) Talaga a napaneknekan a pudno dagitoy a sasao!

Nakapanka kadin iti maysa a hardin wenno parke? Anian a ragsaktayo a makakita kadagiti nagpintas ti pannakaurnosda a kaykayo, mulmula, ken sabsabong! Ngem saan a basta rimsua ti nakaur-urnos a hardin. Adu nga oras ti binusbos dagiti nalaing a hardinero a nangarbas kadagiti kayo, karuotan, ken nangtaripato kadagiti sabsabong tapno pumintas dagitoy. Panunotem ti pagbalinan ti naindagaan a pagnanaedantayo no nataripato koma a naimbag ti intero a globo a kas iti pannakataripato ti maysa a hardin.

Kinapudnona, pinanggep ti Namarsua kadatayo a kasta ti pannakataripato ti planetatayo. Sigun iti salaysay ti panamarsua iti naipaltiing a Sao ti Dios, “ni Jehova a Dios innalana ti tao ket insaadna iti minuyongan ti Eden tapno talonenna dayta ken tapno aywananna.” (Genesis 2:15) Maysa pay, nabilin ti natauan a pamilia a saanda laeng nga aywanan ti Eden no di ket palawaenda ti orihinal a paraiso agingga a saknapanna ti intero a daga.​—Genesis 1:28.

Ngem nakalkaldaang ta gapu iti panagsukirda, nagbalin nga imperpekto da Adan ken Eva ket napukawda ti gundaway a mangaywan ken mangpalawa kadagiti beddeng ti Paraiso. (Genesis 3:1-6, 23) Kas annak ti immuna a natauan a pagassawaan, natawidtayo ti basol ken kinaimperpekto. (Roma 5:12) Ti di umiso a panangaywan kadagiti nakaisigudan a gameng ti daga ket maysa laeng a pagarigan ti di umiso a pannakaiturong dagiti panangikagumaan ti tao a mangituray iti bagina. Nabatad a saan a kabaelan ti tao a solbaren dagiti parikutna. Kasapulanna ti tulong.

Ti Pamuspusan a Mangsolbar iti Parikut

Idi adda ditoy daga, insuro ni Jesus dagiti adalanna nga agkararag: “Umay koma ti pagariam. Maaramid koma ti pagayatam, kas sadi langit, kasta met ditoy daga.” (Mateo 6:10) Isuro ti Biblia nga iti sidong ti nailangitan a Pagarian ti Dios, agbalinto a paraiso ti daga. (Salmo 37:10, 11) Iti dayta a tiempo, aglaplapusananto ti bunga dagiti kayo ken mulmula iti nadalus nga aglawlaw. (Salmo 72:16) Iti sidong ti panangiturong ti Dios, madalusanto ti daga iti polusion, ket ti sangatauan sursuruennanto ti agbiag a naan-anay a maitunos iti aglawlaw. Kasano a masiguradotayo dayta?

Kuna ti Biblia a ti daga ‘saanto a mapagdiwengdiweng agingga iti tiempo a di nakedngan, wenno iti agnanayon.’ (Salmo 104:5) Iti umiso a tiempo ti Dios, amin dagidiay sibibiag sagrapendanto dagiti agnanayon a bendision, agraman ti kinasalun-at, nawadwad a taraon, ken napintas a balbalay. Kayatmo kadi a maammuan ti ad-adu pay maipapan kadagiti panggep ti Dios? Makisaritaka iti siasinoman kadagiti Saksi ni Jehova. Maragsakandanto a tumulong kenka tapno maammuam manipud iti Biblia no kasano a mabalin pay a masalbar ti planeta a Daga ken masalbarto!

[Dagiti Ladawan iti panid 10]

Ubing a babai ken mannalon: © Jeremy Horner/Panos Pictures

[Credit Line]

Babaen ti panangiwanwan ti Dios, agbiagto ti sangatauan a maitunos iti aglawlaw