Manipud Kadagiti Agbasbasa

Panagsagaba Pagyamanan unay gapu iti artikulo nga “Agimtuod Dagiti Agtutubo . . . Apay nga Ipalpalubos ti Dios nga Agsagabatayo?” (Marso 22, 2004) Agtawenak iti 14, ket nabiit pay a pimmusay ti dua a nasinged kaniak​—da lolok ken ni ikitko. Ammok a saan a basol ti Dios ti ipapatayda. Ni Satanas ti makimbasol, ket ababa laengen ti natda a panawenna. Talaga a liniwliwanak daytoy nga artikulo. Pangngaasiyo ta itultuloyyo ti agsurat kadagiti kasta nga artikulo. Ulitek ti agyaman unay.

B. B., Estados Unidos

Gapu iti aksidente iti lugan, nabiit pay a natay ti babai nga ikallaysak koma. Nasaem a trahedia dayta​—para kaniak, iti kongregasion, ken nangruna iti dadakkelna. Agyamanak ken Jehova ta tinulongannak a mangiliwliwag iti nakaro a ladingitko. Agyamanak met iti artikuloyo nga “Apay nga Ipalpalubos ti Dios nga Agsagabatayo?” Dimteng iti umiso a tiempo.

I. D., Alemania

Idi damo, diak kayat a basaen daytoy nga artikulo. Impagarupko no makapaladingit dagiti linaonna. Dua a tawen ti napalabas, natay ni manongko gapu iti sakit, isu nga agingga ita, kasta unay pay laeng ti ladingitko. Ngem impalagipna kaniak a ni Jehova ti Manangted kadagiti naimbag a banag. Nariknak a nagbiit a nailiwliwagko dagiti nasaem a riknak, isu a timmuredak nga agbiag iti daytoy nariribuk a lubong.

S. H., Japan

Asukar Adun a tao ti nangibaga kaniak a ti artikulo a “Dagiti Asukar a Napateg nga Elemento ti Biag” (Marso 22, 2004) ti mangitantandudo iti nalatak a produkto a mangpasalun-at ken maipagarup a mangagas kadagiti sakit agraman iti kanser. Diak kayat a babalawen ti artikuloyo ngem madanaganak kadagiti mangus-usar iti dayta tapno panguartaanda wenno tapno mangitandudo kadagiti kapanunotanda.

P. K., Australia

Sungbat ti “Agriingkayo!”: Ti artikulo a “Dagiti Asukar a Napateg nga Elemento ti Biag” impadamagna laeng ti nasirarakan dagiti biologo maipapan iti napateg a maaramidan ti asukar iti salun-at. Saan a pulos a nairanta dayta a mangyendorso iti partikular a produkto. No agipadpadamag ti “Agriingkayo!” kadagiti banag a nainaig iti salun-at, dina isingsingasing kadagiti agbasbasa ti aniaman a partikular a kita ti panangagas. Makaammo dagiti Kristiano a mangsierto nga aniaman a panangagas a pilienda ti mangipakita a nasimbeng ti panunotda ken saan a maikontra dayta kadagiti prinsipio ti Biblia.

Lactose Intolerance Adun a tawen nga agsagsagabaak kadagiti sintoma a nadakamat iti artikulo a “Pannakaawat iti Lactose Intolerance.” (Marso 22, 2004) Dayta ti makagapu a naipasidongak iti hydrogen breath test, a nangipakita nga agsagsagabaak iti lactose intolerance. Idi impakitak daytoy nga artikulo iti maysa nga espesialista a doktor, imbagana a nagsayaat ti pannakasirarak dayta, ket pinaregtanak nga agyaman kadakayo gapu iti panagsuratyo iti kasta a nagsayaat nga artikulo. Dina malagip no nakabasa idin iti Agriingkayo!

E. S., Alemania

Nalabes a Panaginum Pagyamanan gapu iti artikulo a “Ti Panangmatmat ti Biblia: Talaga Aya a Dakes ti Nalabes a Panaginum?” (Marso 8, 2004) Maamirisko itan a ti panaginumko iti naingel ti puon dagiti ririmi idi ken ni baketko, isu a naamirisko a nagadun ti sinayangko a kuarta gapu iti panaginumko. Ita, saggabassit laengen ti in-inumek ken manmanon nga uminumak iti naingel.

G. K., Tanzania

Dagiti Crossword Puzzle Kaay-ayok nga aramiden dagiti crossword puzzle a naipablaak iti Awake! Makaisuroda. Idi damo, masansan a sukimatek ti Biblia tapno masarakak ti umiso a sao. Ngem ita, manmanon nga aramidek dayta gapu ta kanayon nga agadalak iti Biblia. Dagiti crossword puzzle met ti nangparegta kaniak nga agadal iti Biblia!

W. K., Poland

Sungbat ti “Agriingkayo!”: Iti dadduma a pagsasao, ti pannubok iti Biblia a napauluan iti “Ammoyo Kadi?” ti sandi ti crossword puzzle a masarakan iti “Awake!”