Nakallalagip a Panagpasiar Idiay Ngorongoro Crater

Babaen iti mannurat ti Agriingkayo! idiay Tanzania

“NO RINETRATO koma dagiti anghel ti Minuyongan ti Eden, saan koma a nagpaiduma unay dagiti atap nga animal a naretratoda kadagiti makitam ita iti Ngorongoro Crater.” Kasta ti insurat ni Reinhard Künkel iti librona maipapan iti daytoy makakayaw a lugar idiay Tanzania. Talaga a napintas ti Ngorongoro Crater, ken aduan iti rinibu nga atap nga animal. Kuyogendakami ket agpennektayo kadagiti napintas a buya!

Makapaamanga a Buya

Kalpasan ti uppat nga oras a panagbiahetayo kadagiti natapok a kalsada, nakadanontayo met laengen iti ngarab ti Ngorongoro Crater. Makitatayo ti makapaamanga a buya manipud iti balkon ti otel a pagdagusantayo. Talaga a nagpaiduma ti buya. Inawagan pay ketdi dayta dagiti naturalista a ti “maikawalo a pagsidsiddaawan iti lubong,” ket maawatantayo no apay.

Nagtaudan ti nagan a Ngorongoro? Awan ti makasierto. Sigun iti Conservation Corporation of East Africa, kuna ti dadduma a ti Ngorongoro ket nagan ti maysa a Masai nga agnanaed idi iti lungog ti natay a bulkan ken agar-aramid iti kampanilia para kadagiti baka. Kuna met ti dadduma a nagan kano dayta ti natured a grupo dagiti mannakigubat a Datogo nga inabak dagiti Masai iti panaggugubat iti lungog ti natay a bulkan 150 a tawenen ti napalabas. Pagammuan ta malipatantayon ti aniaman a nainaig iti nagtaudan ti nagan ta makakitatayon iti sumagmamano a zebra nga agar-arab iti asideg ti paradaan. Bayat a nakalugantayo, maasitgantay ida, ngem kasla didatay madlaw. Sumalogtayo iti lungog ti natay a bulkan ta kitaentayo ti ad-adu pay nga atap nga animal.

 Ti lungog ti natay a bulkan ket 2,236 a metro iti patar ti baybay. Dayta ti kadakkelan a di nadadael wenno di nargaay a wangawangan ti natay a bulkan iti lubong. Ti diametrona ket 19.2 a kilometro ken 304 a kilometro kuadrado ti kalawana. Agin-inayadtayo a sumalog iti 610 a metro ti kangatona a pannakadiding ti natay a bulkan. Tuman-awtayo tapno maretratotayo ti aglawlaw. Itay addatayo iti ngarabna, nalamiis ken presko ti angin. Ngem ita ta addatayon iti lungog ti natay a bulkan, nakadagdagaangen.

Kabayatan ti nabannayat a panangipasiar kadatayo ti draybertayo iti aglawlaw ti tukok ti natay a bulkan, malabsantayo ti bassit ken naapgad a dan-aw agraman ti nagadu a maris rosas a flamingo. Nupay adayo, gapu iti asul a langit, nalawag a makitatayo itan ti ngarab ti natay a bulkan, isu a kasta unay ti ragsak ken siddaawtayo bayat a mangmangngegtayo ti uni dagiti zebra ken wildebeest agraman ti dadduma pay a karkarna nga uni. Talaga a paraiso daytoy a lugar!

Dagiti Atap nga Animal iti Crater

Iti Ngorongoro Crater, segseggaantayo a makita dagiti atap a nuang, elepante, zebra, wildebeest, gasela, black rhinoceros, ken kita ti sunggo a napanaganan iti vervet monkey. Ita, aktual a makitatayo idan. Agdakdakiwas met dagiti agkaan kadagiti padada nga animal a kas kadagiti cheetah, hyena, chacal, ken leon a nangisit ti burborna. Iti bassit a libtong, agpalpalamiis dagiti hipopotamo. Kasla awan balena kadakuada uray no retratuentayo ida.

Pagammuan ta nagsardeng ti draybertayo! Itudtudona ti maysa a black rhinoceros a bumalballasiw sumagmamano la a metro iti masungadtayo.  Kasla kaay-ayona ti agnaed iti natay a bulkan ket manmano a maranaantayo ti kasta a kaasideg iti daytoy gagangay a pagnanaedanna. Dandanin maungaw dagitoy makapaamanga nga animal; mapattapatta a kurang payen a 20 ti bilangda ditoy. Nakatiliwda idin kadagiti mangnganup a nangpapatay kadagiti rhinoceros ditoy gapu kadagiti sarada, a maipuslit a mailako tapno pangagas ken pagaramid kadagiti putan dagiti imuko. Kanayon nga agpatrolia dagiti montero tapno saan a makastrek dagiti mangnganup.

Ti maysa a tao a managayat iti tumatayab ket mabalin a makakita iti agsasabali ken nagpipintas a nagpayak a parsua, agraman dagiti abestrus, kori bustard, crested crane wenno kita ti tipor, egret, heron wenno kita ti kannaway, secretary bird, red-billed oxpecker, ken nagadu a pink lesser flamingo. Ti lungog ti natay a bulkan ti ayan ti nasurok a sangagasut a kita ti tumatayab nga awan iti kabangibangna a Serengeti National Park. Adda dagiti imingan a woodpecker, yellow-breasted apalis, brubrus, ken paradise flycatcher. Ti rosy-breasted longclaw ket makita kadagiti kaliddaan, ken uray ti manmano a Cape rook.

Nupay dandani kaaduan kadagiti animal didatayo ikankano, masapul nga agtalinaedtayo iti lugantayo. Ngem dagiti umili a Masai, nga agnanaed kadagiti kalapawda a naaramid iti pitak ken naatapen iti pan-aw iti ruar laeng ti natay a bulkan, makapagdakiwasda iti lungog a kadua dagiti pangenda. Kasla naamo ken nairuam kadakuadan dagiti atap nga animal.

Talaga a nagpaiduma ti kinapintas ken kinatalinaay ti Ngorongoro Crater ket pagamangaennatayo. Ditayto pulos malipatan ti panagpasiartayo sadiay.

[Ladawan iti panid 15]

Rhinoceros

[Ladawan iti panid 15]

Dagiti agpaspastor a Masai iti igid ti natay a bulkan

[Ladawan iti panid 15]

Babai a Masai

[Ladawan iti panid 16]

Dagiti cheetah

[Ladawan iti panid 16]

Crested crane

[Ladawan iti panid 16]

Dagiti flamingo

[Ladawan iti panid 16]

Hipopotamo

[Ladawan iti panid 16, 17]

Ngorongoro Crater

[Ladawan iti panid 17]

Dagiti zebra

[Ladawan iti panid 17]

Atap a nuang

[Ladawan iti panid 17]

Dagiti elepante

[Ladawan iti panid 17]

Vervet monkey