Manipud Kadagiti Agbasbasa

Moises Kabasbasak ti serye a “Moises​—Nagbiag Idi Wenno Sarsarita?” (Abril 8, 2004) Nasken nga aminek a diak idi ninamnama a makakitaak iti nagadu nga impormasion kas sungbat iti panangipapilit dagiti eskolar a sarsarita laeng ni Moises! Siguradoak a para kadagiti napasnek a tattao, umdasen ti panangbasada iti maysa la a paset daytoy a serye tapno mapabileg ti pammatida ken Jehova.

Y. M., Russia

Oras Agyamanak unay gapu iti artikulo a “Dika Agladladaw!” (Abril 8, 2004) Nagadu a tiempo ti mabusbosko iti panagserbik iti kongregasion, panagbalinko nga ulo ti pamilia, ken panagtrabahok iti sekular. Inyaplikarkon dagiti napalabas a singasing kadagiti magasin, ngem nasayaat a mabasa manen ti maysa nga artikulo a kas iti daytoy. Nagustuak a nangnangruna ti sasao a “Pinanggep ti Namarsua kadatayo nga agbalintayo a sipapanunot ken manangipateg iti oras.” Talaga a dayta ti nanglawlawag kaniak kadagiti bambanag. Pangngaasiyo ta itultuloyyo ti agsurat kadagiti praktikal nga artikulo a kas iti daytoy.

J. S., Estados Unidos

Naladawak nga agririing isu a kaaduanna, aramidek laeng dagiti bambanag inton agap-apuraakon, nupay saanak a managladladaw. Namin-adun a nagpeggadak gapu iti panagap-apurak. Daytoy nga artikulo ti nangparegta kaniak a mangted iti ad-adu a pawayway iti tiempok.

Y. W., Japan

Agtawenak iti 18. Gapu ta maysaak nga amin-tiempo a managebanghelio ken ages-eskuelaak met, kanayon a makumikomak. Kasapulak ti tiempo nga agpaay iti panangasaba ken agpaay kadagiti homework ken personal a panagadalko. Tinulongannak ti artikulo a mangurnos a naimbag iti tiempok tapno agbalinak a managsapsapa kadagiti Nakristianuan a gimong ken dadduma pay nga aktibidad, agraman idiay eskuelaan. Diak kayaten ti maladaw. Agyamanak unay!

J. H., Estados Unidos

Kanayon idi a maladawak kadagiti gimong. Inkararagko dayta ket maragsakanak ta sinungbatan ni Jehova ti kararagko. Pinadasko dagiti singasing iti artikulo, ket nagkurrida. Ita, saanakon a managladladaw. Ti gayam ayat ti mangtignay iti maysa a tao tapno saan nga agladladaw.

J. A., Nigeria

Dagiti Dakes nga Ugali Nagsuratak tapno iyebkasko ti panangapresiarko iti artikulo a “Ti Panangmatmat ti Biblia: Maparmek Aya Dagiti Bisio ken Dakes nga Ugali?” (Abril 8, 2004) Medio nabayag metten a problemak ti kinalukmegko. Nagpakuttongak ngem limmukmegak manen. Nupay saan a dayta ti espesipiko nga insalaysay ti artikulo, agaplikar kaniak ti impormasion. Tinulongannak a mangusig kadagiti dakes nga ugalik, tapno maawatak no kasano nga adda naaramidan dagita iti ilulukmegko. Pagyamanan unay gapu iti panangipalagipyo kadakami a sisisiput ken maseknan ni Jehova kadagiti personal a pakidangdangadanganmi.

M. S., Estados Unidos

Dagiti Karuburuban Agyamanak unay gapu iti artikulo a “Dagiti Nakaskasdaaw a Karuburuban ti Poland.” (Marso 22, 2004) Gapu ta masansan idi a pasiarek ti Słowiński National Park ken apresiarek ti kinapintasna, ti artikulo ti nangtukay unay kaniak. Maikari ni Jehova iti pammadayaw gapu iti panangisaganana kadagita a pagsidsiddaawan iti nakaparsuaan nga agpaay kadatayo. Makaparagsak unay ti artikulo, agsipud ta naipasngay ni nanangko sumagmamano la a kilometro manipud iti parke.

I. L., Alemania

Daytoy nga artikulo ti nakatulong kaniak a mangamiris kadagiti il-iliwek a kasasaad iti baro a lubong ti Dios. Para kaniak, no mapanak iti Słowiński National Park, mapadasak ti “agaliwaksay” kas iti dinakamat ti artikulo. Iti sidong ti panagturay ti Pagarian ti Dios, kastanto ti mapasarantayo a makapabang-ar nga epekto iti intero a planetatayo! Pagyamanan unay iti daytoy nagsayaat ti pannakaisuratna nga impormasion!

J. G., Poland