Naisangsangayan a Pareha

Iti umuna a gundaway, dagiti sientista a marino nga agbatbatok iti rabii kadagiti adalem a danum iti Great Barrier Reef iti Australia, nabiit pay a nakakitada iti sibibiag a kalakian a kurita a maawagan iti blanket octopus. Ania ti naisangsangayan unay iti daytoy?

Nainkalintegan ti rason a nadeskribir daytoy a blanket octopus kas “ti animal iti lubong a nagpaiduma ti maris, kadakkel, ken kalidad ti kalakian ken kabaian.” Dumakkel ti kabaian agingga iti dua a metro ken agtimbang iti agingga ti sangapulo a kilo. Ngem tallo la a sentimetro ti kalakian ken agtimbang iti 0.3 a kilo! Kinapudnona, ti kalakian ket kas iti kadakkel laeng ti alintatao ti mata ti kabaian. Kayatna a sawen a mamin-40,000 a nadagdagsen ti kabaian ngem iti kalakian, maysa a nakaro unay a nagdumaan kadagiti dadakkel nga animal. Daytoy a kurita ket agbiag iti taaw, ket agingga ita dagiti pay la kabaian ken natay a kalakian a nakalap iti iket ti napaliiw.

Kasano nga agpaadu dagitoy a parsua a kasta unay ti nagdumaan ti kadakkelda? Lungog ti maysa kadagiti walo a takiag ti kalakian. No mabirokanen ti kalakian ti kabaian, mapno iti semilia ti takiagna. Kalpasanna, maisinan ti takiag ket sumrek iti mantle cavity, a maysa a dakkel a lungog iti bagi ti kabaian. Agtalinaed sadiay agingga a mapertilisado ti kabaian dagiti itlogna babaen iti panangiwarasna kadagiti semilia kadagitoy.

Tapno masalakniban uray nagbassit, ikanawa ti kalakian ti bagina babaen kadagiti mangsilud a gamat a nalawag nga innalana manipud iti karominas a maawagan iti Portuguese man-of-war jellyfish sana ikebbeng ti makinngato a takiagna. Ngem saan latta a makaisalakan kenkuana dagitoy a gamat, ta no matungpalnan ti rebbengenna iti asawana, matayen. Di ngarud pakasdaawan a nasdaaw dagiti sientista iti nasarakanda!

Aniaman ti makagapu iti nagdakkel a nagdumaan dagitoy karkarna a kurita, sigurado nga agpayso ti sasao ti Biblia: “No maipapan iti daytoy baybay a dakkel ken nalawa unay, sadiay adda aggargaraw a bambanag nga awanan bilang, sibibiag a parparsua, babassit kasta met ti dadakkel.”​—Salmo 104:25.

[Dagiti Ladawan iti panid 31]

Kabaian: agingga iti dua a metro ti kaatiddogna; agtimbang iti sangapulo a kilo

Aktual a kadakkelna no idilig iti kabaian

Kalakian: tallo a sentimetro ti kaatiddogna; agtimbang iti 0.3 a kilo

[Credit Lines]

Kabaian: Retrato: P. Wirtz; kalakian: Retrato: D. Paul