“Naragsakan Unay Dagiti Propesorko”

Kasta ti insurat ti maysa nga agad-adal iti kinadoktor nga adda iti umuna a tawenna idiay Tbilisi State Medical University iti pagilian ti Georgia kadagiti nangipablaak iti Agriingkayo! Apay a nagsurat daytoy nga estudiante iti Agriingkayo!?

“Sipud pay idi 1998 agbasbasaakon kadagiti pagiwarnakyo. . . . Talaga a tultulongandak iti panagadalko. Kanayon a naintiempuan dagiti artikulo ken aduan iti mapagtalkan nga impormasion. Nabiit pay nga inusarko ti impormasion iti serye a ‘Dagiti Stem Cell​—Aglablabes Kadin ti Siensia?’ iti Nobiembre 22, 2002 a ruar ti magasin nga Agriingkayo! para iti inaramidko a salaysay maipapan iti ‘Cloning ken Dagiti Kita ti Stem Cell.’ Naragsakan unay dagiti propesorko ket inikkandak iti kangatuan a grado.

“Maragsakanak unay ta agipabpablaakkayo kadagiti artikulo maipapan kadagita a makapainteres a suheto, nangruna maipapan iti medisina. Nupay saankami a Saksi ni Jehova a sangapamiliaan, kaay-ayomi a basaen dagiti pagiwarnakyo, ta makatulongda a mangpalawa iti pannakaawatmi iti lubong iti aglawlawmi.”

Mabalin a masdaawka a makaammo a ti Biblia ket addaan iti praktikal a panangiwanwan a mangitandudo iti pisikal ken mental a salun-at. Naitampok daytoy iti 32 ti panidna a naisangsangayan a broshur a Libro Para iti Amin a Tao. Mabalinmo ti agkiddaw iti daytoy no suratam ti naipakuyog a kupon ken ibusonmo dayta iti adres a makita iti kupon wenno iti maitutop nga adres iti panid 5 daytoy a magasin.

□ Kayatko ti maaddaan iti broshur a Libro Para iti Amin a Tao.

□ Interesadoak iti libre a panagadal iti Biblia.