Maapresiar Unay a Libro Agpaay Kadagiti Agtutubo

NAGSURAT ti prinsipal iti Tigoni Academy for Girls idiay Limuru, Kenya, iti sanga nga opisina dagiti Saksi ni Jehova iti dayta a pagilian. Nagkiddaw kadagiti kopia ti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo. Kinunana: “Kas iti ammoyo, makakarit ti makilangen kadagiti tin-edyer. Adda dua a kopiami iti libroyo, a nakatulongen agpadpada kadagiti mannursuro ken estudiante. Umdas dagiti impormasion a linaonna ken maitutop kadagiti kasapulanmi ken kasapulan dagiti tin-edyer iti eskuelaanmi.”

Kalpasanna, kinuna ti prinsipal: “Kayat ti administrasion [ti eskuelaan] nga usarenmi daytoy makatulong a libro iti panangisuromi kadagiti estudiante iti eskuelaanmi. Magustuanda unay ti libro. Anamongan dagiti nagannak ti amin a panagregget a makatulong kadagiti annakda. Iti panagkunami, umdasen ti 25 a kopia dayta a libro.”

Ti libro nga Iyimtuod ti Agtutubo sukimatenna a naimbag dagiti kapanunotan ken rikna dagiti agtutubo. Paregtaenna ti makagunggona a saritaan maipapan kadagiti suheto a kas iti: “Kasano a Maallukoyko Dagiti Dadakkelko nga Ikkandak iti Ad-adu Pay a Wayawaya?,” “Rebbeng Aya a Pumanawak iti Balay?,” “Kasanoak a Maaddaan iti Pudpudno a Gagayyem?,” “Ania a Karera ti Rebbeng a Piliek?,” “Ti Ngay Panagdenna Sakbay ti Panagasawa?,” ken “Kasanok a Masierto No Pudno nga Ayat Dayta?”

Dagita ket sumagmamano laeng kadagiti paulo dagiti kapitulo. Kadagiti 39 a kapitulona, salaysayen met ti libro ti adu pay a suheto. No kayatmo ti agkiddaw iti kopia, suratam ti naipakuyog a kupon ken ibusonmo dayta iti adres a makita iti kupon wenno iti maitutop nga adres iti panid 5 daytoy a magasin.

□ Kayatko ti maaddaan iti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo.

□ Interesadoak iti libre a panagadal iti Biblia.