Manipud Kadagiti Agbasbasa

Namnama Daytoy ti ababa laeng a surat a mangyebkas iti nauneg a panagyamanmi gapu iti serye a “Namnama​—Pakasarakam iti Dayta?” (Abril 22, 2004) Binasami a sangapamiliaan, ket nakasangitkami apaman a naungpotmi. Nagpintas a kitaen ti ladawan a sabong.

H. H. ken L. H., Estados Unidos

Natay ni nanangko makalawas sakbay a naawatko daytoy a ruar, isu a naliwliwaak iti sasao a “Dagiti natay addada iti katalgedan a kasasaad a mapanunottayo, kas iti maladaga a nasalakniban iti aanakan ni inana.” Maladladingitanak pay laeng gapu iti ipapatay ni nanangko, ngem maragsakanak ta natalged ti kasasaadna iti lagip ni Jehova.

V. L., Estados Unidos

Dandanin 50 a tawen nga agbasbasaak iti Agriingkayo!, ket kanayon a masdaawak ta makaputarkayo iti suheto a namin-adun a naisuratyo ngem kaskasdi a mailawlawagyo dayta iti baro ken naiduma a wagas. Talaga a nagsayaat nga usigen ti nasirarakyo maipapan iti kinanegatibo.

T. H., Estados Unidos

Adda sakitko a din maagasan. Ikagkagumaak ti agtalinaed a positibo, ngem nariingak ita a malmaldaang. Isu nga inulit-ulitko a binasa dagiti artikulo. Impasimudaag dagiti artikulo ti nauneg a pannakaawat, isu a naliwliwaak.

B. J., Britania

Makidangdangadang ni lakayko iti kanser. Marigatanak unay a mangaywan kadagiti annakmi. Nasesanteak met iti trabahok. Ngem napabilegak gapu iti benneg a “Dagiti Pakaigapuan ti Namnama.” Kayatko nga iranud daytoy nga artikulo iti adu a tattao.

Y. N., Japan

Matarantaak no adda dakes a mapasamak kaniak. Dagitoy nga artikulo ti sungbat ti kararagko! Espesipiko unay dagiti pamuspusan tapno maliklikak ti kinanegatibo ta no makapanunotak iti negatibo, mabalinko a saggaysa nga iyaplikar dagiti addang. Iduldulinko daytoy a magasin iti iddak tapno inaldaw a basaek.

S. T., Japan

Agpappapintas a Tumatayab Masansan a makitak dagiti agpappapintas a tumatayab iti lugar a pagnanaedak. Gapu ta nabasakon ti artikulo nga “Agpappapintasda Laeng Aya?” (Abril 22, 2004), maapresiarko itan ti adu a pagimbagan ti panagpapintas dagiti tumatayab. Kayatko ti agyaman gapu iti makaisuro a wagas ti panangipakaammoyo kadagiti nagpaiduma a parsua ti Dios.

F. K., Nigeria

Maragsakanak a mangbasa kadagiti artikulo maipapan kadagiti mula, animal, ken tumatayab. Nasursurok iti daytoy nga artikulo a para kadagiti tumatayab, biag ken ipapatay ti kaipapanan ti kinamanagdaldalusda. Diak man la impagarup a kasta.

K. G., Russia

Nightclub Dagiti Agtutubo Pagyamanan gapu iti artikulo nga “Agimtuod Dagiti Agtutubo . . . Kasano ti Rumbeng a Panangmatmatko Kadagiti Nightclub Dagiti Agtutubo?” (Abril 22, 2004) Umanamongak a dagita a club ket saan nga agpaay kadagiti Kristiano. Ladingitek ta diak pay naam-ammo ni Jehova idi mapmapanak kadagita a club.

L., Indonesia

Kinapudnona, napanakon kadagiti lugar a rumbeng a diak koma papanan. Kaay-ayok ti agsala, ket kanayon nga adda pagpambarko. Kabigatanna, nakonsiensiaak. Saan met ketdi a gapu ta nakaaramidak iti dakes no di ket gapu iti ar-aramiden ti amin nga adda iti aglawlawko! Imbutaktak ti artikulo ti kinapudno maipapan kadagiti night club dagiti agtutubo​—a napeggad ken imoral ti adu kadagitoy.

D. K., Australia