Ti Panangmatmat ti Biblia

Panangasikaso iti Kasapulan Dagiti Annak

ADDA aya panawen idi ti Anak ti Dios a mangasikaso kadagiti ubbing? Awan, para iti dadduma nga adalanna. Naminsan, pinadasda a pawilan dagiti ubbing nga umasideg ken Jesus. Kinunana kadakuada: “Bay-anyo dagiti ubbing nga umay kaniak; dikay padasen a pawilan ida.” Kalpasanna, siaayat nga inabrasana dagiti ubbing ket kinasaritana ida. (Marcos 10:13-16) Impakita ngarud ni Jesus a sidadaan a mangasikaso kadagiti ubbing. Kasano ita a matulad dagiti nagannak ti ulidanna? Babaen ti umiso a panangsanay kadagiti annakda ken panangiwayada iti panawen a kadua ida.

Siempre, ikagkagumaan dagiti responsable a nagannak nga aywanan a naimbag dagiti annakda ket dida maltratuen ida. Nalabit maikuna pay ketdi a “gagangay” nga ipakita dagiti nagannak ti panagraem ken panangikabilanganda kadagiti annakda. Ngem mamakdaar ti Biblia nga adu iti kaaldawantayo ti awananen iti “nainkasigudan a panagayat.” (2 Timoteo 3:1-3) Nupay kasta, kadagidiay agpayso a kanayon a siaayat a mangas-asikaso kadagiti annakda, kanayon nga adda masursuroda no kasano nga agbalinda nga ad-adda a responsable a nagannak. Makaparagsak ngarud a palagip dagiti sumaganad a prinsipio iti Biblia kadagiti nagannak nga agtarigagay iti kasayaatan para kadagiti annakda.

Panangsanay a Di Makaparurod

Naminsan, kinuna ni Dr. Robert Coles, maysa nga agdinamag a mannursuro ken research psychiatrist: “Tunggal ubbing, adda tumantanor a pannakaawatna kadagiti naimbag a prinsipio. Para kaniak, inted ti Dios dayta, agsipud ta kayat dagiti ubbing ti masursuruan kadagiti naimbag a prinsipio.” Siasino ti mangpennek iti daytoy panagkasapulan iti moral a panangiwanwan?

Iti Efeso 6:4, idagadag kadatayo dagiti Kasuratan: “Dakayo, nga amma, dikay ruroden ti annakyo, no di ket itultuloyyo a padakkelen ida iti disiplina ken panangiturong-panunot ni Jehova.” Nadlawyo kadi a ti teksto nangnangruna nga impabaklayna iti ama ti rebbengen a panangyukuok kadagiti annakna iti panagayat iti Dios ken nauneg a panangapresiar kadagiti nadiosan a pagannurotan? Iti bersikulo 1 ti Efeso kapitulo 6, agpadpada a ti ama ken ina ti tinukoy ni apostol Pablo idi imbagana kadagiti annak nga ‘agtulnogda kadagiti nagannak kadakuada.’ *

Siempre, no awan ti ama, masapul a ti ina ti mangibaklay iti daytoy a rebbengen. Adu nga agsolsolo nga inna ti sibaballigi a nangpadakkel kadagiti annakda iti disiplina ken panangiturong-panunot ni Jehova a Dios. Ngem no makiasawa ti ina, ti Kristiano nga asawa a lalaki ti rumbeng a mangidaulo. Rumbeng ngarud a situtulok a suroten ti ina dayta a panangidaulo iti panangsanay ken panangdisiplina kadagiti annakda.

Kasanom a disiplinaen wenno sanayen dagiti annakmo a dimo ida “marurod”? Awan sekreto a pormula, nangruna ta naiduma ti tunggal ubing. Ngem nasken nga usigen a naimbag dagiti nagannak ti panangdisiplinada, a kanayon nga ipakitada ti ayat ken panagraem kadagiti annakda. Nakadkadlaw ta daytoy saan a panangrurod kadagiti annak ket naulit iti Kasuratan iti Colosas 3:21. Kastoy manen ti naibalakad kadagiti amma: “Dakayo nga amma, dikay rurruroden ti annakyo, tapno saan a maupay ti riknada.”

Dadduma a nagannak bugkawan ken riawanda ti annakda. Di pagduaduaan a mangrurod daytoy kadagiti annakda. Ngem idagadag ti Biblia: “Maikkat koma kadakayo ti isuamin a makadangran a kinapait ken unget ken pungtot ken panagririaw  ken nabassawang a panagsasao.” (Efeso 4:31) Kuna pay ti Biblia a “ti adipen ti Apo saan a kasapulan a makiapa, no di ket kasapulan nga agbalin a naalumamay kadagiti isuamin.”​—2 Timoteo 2:24.

Mangiwayaka iti Panawenmo nga Agpaay Kadakuada

Ti panangasikaso iti kasapulan dagiti annakmo kaipapananna met a situtulokka a mangisakripisio kadagiti pagragsakan ken personal a pagnam-ayam tapno sumayaat ti kasasaad dagiti annakmo. Kuna ti Biblia: “Dagitoy a sasao nga ibilbilinko kenka ita nga aldaw addadanto ita pusom; ket masapul nga iyukuokmo ida iti anakmo ken sawem ti maipapan kadagita no agtugawka iti balaymo ken no magnaka iti dalan ken no agiddaka ken no bumangonka.”​—Deuteronomio 6:6, 7.

Kadagitoy nga aldaw, ti rigat iti panangibaklay kadagiti pinansial a rebbengen ti makagapu a manmano a nagannak ti addaan iti panawen a makikadua kadagiti annakda. Nupay kasta, ipaganetget ti Deuteronomio a dagiti nagannak “masapul” a mangiwayada iti tiempo a makikadua kadagiti annakda. Tapno maaramid dayta, masapul ti nasayaat a panangurnos kadagiti bambanag agraman ti panagsakripisio. Nupay kasta, kasapulan dagiti annak ti kasta a panangasikaso.

Usigem dagiti resulta ti maysa a panagadal iti kabibiag ti nasurok a 12,000 a tin-edyer. Kastoy ti kuna dagiti managsirarak: “Ti kinasinged iti nagannak ti kasayaatan a pammatalged iti kinasalun-at ti tin-edyer ken ti kapigsaan a panglapped kadagiti makadangran a kababalin.” Wen, kayat dagiti annak nga asikasuen ida dagiti dadakkelda. Naminsan, daytoy ti inyimtuod ti maysa nga ina kadagiti annakna, “No mabalinyo nga alaen ti aniaman a kayatyo, ania ti kapatgan kadakayo?” Kastoy ti sungbat ti uppat nga annakna: “Ad-adu a panawen a makaduadakayo ken ni Tatang.”

No kasta, ti panagbalin a responsable a nagannak kaipapananna a siertuenyo a mapennek dagiti kasapulan ti annakyo, agraman ti kasapulanda a naespirituan nga edukasion ken ti nasinged a pannakigayyemda kadakayo kas dadakkelda. Kaipapananna a tulonganyo dagiti annakyo nga agbalin a makabael, managraem, ken napudno a nataengan a naasi kadagiti padada a tattao ken mangyeg iti dayaw iti Namarsua kadakuada. (1 Samuel 2:26) Wen, responsable dagiti nagannak no sanayen ken disiplinaenda ti annakda iti nadiosan a pamay-an.

[Footnote]

[Ladawan iti panid 13]

Maupay ti ubing no bugkawam ken riawam

[Ladawan iti panid 13]

Mangiwayaka iti panawen a kadua dagiti annakmo