Ti Kueba Dagiti Marmol

BABAEN ITI MANNURAT TI AGRIINGKAYO! IDIAY MEXICO

BAYAT ti panagtakderna iti nagadu a “marmol” a kunam la no alpombra a nayaplag iti suelo ti kueba, kastoy ti di nagawidan a kinuna ti maysa a managsukisok iti kueba nga Americano a sientista, “Agyamanak, O Dios ta inikkannak iti biag tapno makitak daytoy a pagsidsiddaawan!” Paspasiarenna idi ti Kueba Dagiti Marmol, maysa nga agkakanaig a kueba iti abagatan a daya a Mexico a 529 a metro ti kaatiddogna ken 17 a metro ti kaunegna. Iti uneg, makitam ti nakaay-ayat a pannakaporma dagiti bato. Gapu ta nadamagmin ti kueba, kayatmi a makita a mismo.

Adda ti kueba iti pribado a rantso isu a naimbag laengen ta naam-ammomi ti asawa ti makinkukua. Bayat a limmasatkami iti pagserkan a mapan iti ayan dagiti marmol, nakakitakami iti agarup 200 a milion a perlas iti kueba (calcite balls). Sinaknapan dagitoy ti suelo agingga iti kauneg a 12 a sentimetro iti kalawa a dandani 50 a metro. Saan a magawidan ti maysa nga akupen dagiti perlas ken palubosan dagiti babassit​—a kas iti kadakkel ti lentehas​—a matnag kadagiti ramayna. Dagiti kadakkelan ket kas iti kadakkel ti bassit a kahel. No maiwalin dagiti marmol tapno maarikap ti suelo, makita ti nausiuso a dayta ket buklen ti agpapareho a natangken a perlas.

Kasano a naporma dagiti perlas iti kueba? Napigsa ti panagtedted ti danum kadagiti libtong. Daytoy a panagtedted ti mangisina iti maysa a kita ti mineral a maawagan iti calcite, a mangkalupkop kadagiti bambanag a kas ti darat, tulang, wenno uray dagiti straw a pagsusop iti inumen. Isu a no in-inut a manaynayonan iti calcite, maporma dagiti perlas.

Nupay adu a tawenen a nadamag dagiti agindeg sadiay daytoy a kueba, ita laeng nga adda dagiti espesialista a naggapu iti sabali a pagilian a nagpasiar iti dayta gapu ta naallukoyda iti kinaadu dagiti perlas. Madama ti pannakasukimat daytoy naisangsangayan a kueba tapno mataginayon dayta.

Dagiti lugar a kas ti Kueba Dagiti Marmol ipalagipna kadatayo ti nadakamat iti Salmo 111:2: “Naindaklan ti ar-aramid ni Jehova, suksukimaten dagidiay amin a maragragsakan kadakuada.”