“Basura” a DNA?
“Basura” a DNA?
ADU a managsirarak ti mangusig iti tay-ak ti biolohia, genetiko, ken dadduma pay a nainaig a bambanag sigun iti panangmatmat ti teoria ti ebolusion. Masansan a ti kasta a panangmatmat ti pakaigapuan dagiti di umiso a konklusionda. Kas pagarigan, dagiti nagkauna a Darwinista ibilangda a basura ti ebolusion ti dadduma nga organo, kas iti apendisitis, pituitary gland, ken tonsil, gapu ta awan ti usarda. Ngem idi agangay, natakuatan met laeng ti napateg nga akem dagita nga organo. Nagbanaganna, binaliwan dagiti ebolusionista ti dati a panangmatmatda.
Nabiit pay nga adda umasping a pasamak iti tay-ak ti genetiko. Ipamatmat dagiti immun-una a panagadal nga awan ti usar ti agarup 98 a porsiento ti DNA ti tao ken dadduma nga organismo. Gapuna, ti adu a tattao a naimpluensiaan iti teoria ti ebolusion patienda a ti DNA ket “basura ti ebolusion”—maysa a panangmatmat a dagus a naakseptar.
Ngem napaneknekan manen a kamali dayta a konklusion a namunganay iti Darwinismo. Nabiit pay a natakuatan dagiti sientista a ti “basura” a DNA adda napateg nga akemna iti bagi babaen ti panangpataudna kadagiti naisangsangayan a kita ti RNA (ribonucleic acid) a napateg iti biag. Para ken ni John S. Mattick, direktor iti Institute for Molecular Bioscience iti University of Queensland idiay Australia, ti dinadarasudos a panangakseptar iti teoria a “basura” ti DNA ket “maysa a kadawyan a pagarigan a ti panangipetteng lattan iti maysa a nabangonan nga opinion dadaelenna ti natimbeng a panangsukimat kadagiti impormasion. Iti daytoy a kaso, iti unos ti 25 a tawen.” Dayta a kamali, innayonna, “ti maibilang kas maysa kadagiti kadakkelan a biddut iti pakasaritaan ti biolohia mainaig iti molekula.”
Saan kadi nga ad-adda a nainsiriban a panunoten nga adda nasaririt a Nangdisenio iti DNA? Dagiti tattao a mamati iti dayta ammoda a mailawlawagto met laeng dagiti sungbat kadagiti mamagpanunot nga aspeto dagiti gapuanan ti Dios. Imbes a maupayda, dagiti kakasta a takuat ti ad-adda a mamagsiddaaw kadakuada.—Proverbio 1:7; Eclesiastes 3:11.
[Picture Credit Lines iti panid 21]
DNA: Retrato: www.comstock.com; nagsukisok: Agricultural Research Service, USDA