Maragsakan a “Mapan iti Kanayonan a Milia”

KAS INSALAYSAY NI CLAIRE VAVY

TI Madagascar, nga agarup 400 a kilometro ti kaadayona manipud iti Mozambique a pagilian iti Makindaya nga Africa, ket maysa nga isla a kabambantayan ken addaan kadagiti nasamek a kabakiran. Nayanakak iti makindaya a paset ti isla, iti bassit a purok ti Betoko II. Idi 1987, idi agtawenak iti 15, immakarak tapno ageskuela iti ili ti Mahanoro a masarakan iti kosta.

Kaduak a nagnaed idiay Mahanoro ti manongko a ni Celestin, a nangrugi a nakipagadal iti Biblia kadagiti Saksi ni Jehova. Dua a tawen kalpasanna, nagbalinak a Saksi. Determinadoak nga agserbi a naan-anay ken ni Jehova a Dios agingga iti kabaelak.

Dagiti Panangikagumaak a Mangragpat Kadagiti Kalatko

Ti panangtulongko iti pamiliak idiay Betoko II ti maysa kadagiti immuna a kalatko, ket kanayon nga inkararagko dayta ken ni Jehova. Ngem saak la makasubli sadiay no bakasion ti eskuela. Narigat ti agbiahe iti 100 a kilometro. Madanon ti lugan ti umuna nga 40 a kilometro, ngem pagnaen ti nabatbati nga 60 a kilometro ta dayta ket akikid laeng a desdes iti bantay.

Masapul a sang-atek ti adu a turod, ken akikid ti dadduma a paset ti desdes a kas iti kaatiddog laeng ti sakak. No rugiak ti magna iti parbangon agingga a rumiwet, masansan a daliasatek ti agarup 40 a kilometro. Agawitak kadagiti suplay a nasurok a 15 a kilo ti kadagsenna​—dadduma ti susuonek, ikaratayko ti dadduma, ken dadduma ti bitbitek. Dagiti naibatay iti Biblia a literatura ti kangrunaan nga awitko, nga iranudko kadagiti kabagiak ken dadduma nga interesado. Iti dalan, awagandak iti “kargador.”

Idi damo, iti laksid ti panagreggetko, nagkedked ti pamiliak nga umimdeng maipapan kadagiti kabbaro a patpatiek. Ngem di nagbayag, nagbalbaliwda ken nagadu ti saludsodda. No dadduma, agpapatangkami agingga iti alas dos ti parbangon.

Nakallalagip a Panagbisita

Idi Disiembre 24, 1990, nagbakasionak iti lugarmi idiay Betoko II. Naragsakan ti pamiliak ta nakitadak, ta pagarupda nga immayak makirambak iti Krismas. Naupayda idi inlawlawagko no apay a  diak mabalin ti makiraman iti panangrambakda iti Krismas. Mabainda a mangilawlawag iti dayta kadagiti kapurokanmi a nasinged iti maysa ken maysa. Gapuna, siak ti nagtignay tapno mailawlawag dayta. Ngem kasano?

Agpangpangaduaak, nangruna ta agtutuboak pay. Pagduaduaak no umiso nga ilawlawagko ti patpatiek bayat ti misa dagiti pumurok iti simmaganad nga aldaw. Sipapasnek ken napaut a nagkararagak ken ni Jehova, a nagkiddaw iti panangiwanwanna. Kalpasanna, inyimtuodko ken manongko a Paul, a maysa a mangisursuro iti simbaan: “Iti panagkunam, nasayaat ngata no ilawlawagko kadagiti makimisa inton bigat no apay a diak rambakan ti Krismas?” Nakiuman kadagiti sabsabali, ket immanamongda iti singasingko.

Iti simmaganad nga aldaw, naayabanak agsipud ta nalpasen ti misa. Kalpasan ti panagkararagko manen ken ni Jehova, nangalaak kadagiti naibatay iti Biblia a literatura. Kalpasan ti introduksionko, nagyamanak kadakuada amin gapu ta tinulongandak a maaddaan iti nauneg a panagraem iti Biblia. Inlawlawagko nga intultuloyko ti nagadal iti Biblia idi napanak iti sabali nga ili. Imbagak a naammuak ti adu a kinapudno iti Biblia a saan pay a naisuro kadakami.

Ginundawayak ti nangilawlawag iti ipampanamnama ti Biblia a biag nga agnanayon iti paraiso a daga (Salmo 37:29; Apocalipsis 21:3, 4), ti rason no apay nga adda bassit a bilang dagiti matalek ditoy daga ti mapan idiay langit (Juan 14:2, 3; Apocalipsis 5:9, 10; 14:1, 3), ken ti pannursuro ti Biblia a dagiti natay ket awanan puot a kaasping ti matmaturog ken saanda nga agsagsagaba (Eclesiastes 9:5, 10; Juan 11:11-14, 38-44). Impakitak met a dagiti nagkauna a Kristiano saanda a rinambakan ti Krismas ken dayta a rambak ket namunganay iti pagano.

Kalpasan ti palawagko, adu iti grupo ti nakabigbig a pudno dagiti imbagak. Dadduma ti nagimtuod pay iti kanayonan a saludsod. Kalpasanna, impakitak kadakuada dagiti awitko a publikasion ken inlawlawagko a dagita ket katulongan iti panagadal iti Biblia nga impablaak dagiti Saksi ni Jehova. Imbagak kadakuada a sidadaanak a tumulong iti siasinoman nga agtarigagay nga agadal iti Biblia. Adu ti immawat kadagiti kopia ti literatura a naibatay iti Biblia.

Naammuak ti Diak Ninamnama

Maysa a babai a diak am-ammo ti immasideg ket kinunana “Karelihionam ti adingko a babai nga agnanaed iti sabali a purok.” Nasdaawak, isu nga inyimtuodko, “Ayanna?”

“Adda idiay Andranomafana,” insungbatna. Dayta a purok ket agarup 30 a kilometro manipud Betoko II.

Imbagak iti babai a nalabit a sabali ti relihion ti kabsatna, agsipud ta agaammo amin dagiti Saksi iti lugar. Ngem impetteng ti babai nga insuro kenkuana ti kabsatna dagiti isu met laeng a banag nga inlawlawagko iti simbaan. Kiniddawko ti nagan ken adres ti kabsat ti babai, ta magagaranak a mapan a dagus iti dayta a purok. Ngem indagadag ni nanangko a palabsek pay ti sumagmamano nga aldaw, agsipud ta makabannog ti mapan sadiay ta masapul a magmagnakami. Dua nga aldaw kalpasanna, nagdaliasatkami ken manongko a Charles a nagturong idiay Andranomafana.

Idi simmangpetkami, inyimtuodmi a dagus kadagiti pumurok, “Adda kadi Saksi ni Jehova ditoy?” Naupayak idi insungbatda, “Dagiti  laeng relihion a Katoliko, Pentecostal, ken Independiente ti adda ditoy a purok.”

Kalpasanna, maysa a babai ti nangibaga, “No sapsapulenyo dagiti Saksi ni Jehova, nalabit a ni Marceline ken ti pamiliana.” Isu dayta ti nagan a naibaga a sapulek!

Adda nangayab ken ni Marceline. Simmangpet di nagbayag ngem medio maamak. Immaribungbong kadakami ti nagadu a pumurok, nga impapanda a maysakami nga opisial nga immay mangpalutpot kenkuana. Naammuak idi agangay a naidadanes ni Marceline ken ti pamiliana iti purok gapu ta ‘sabali ti relihionda.’

Medio inyadayonakami ni Marceline manipud kadagiti nagaaripuno a tattao, tapno makapagsaritakami a nasayaat. Idi inyimtuodko no isu ket maysa kadagiti Saksi ni Jehova, inaklonna dayta. Napan nangala iti kopia ti Ti Kinapudno a Mangiturong iti Biag nga Awan Inggana, maysa a libro nga us-usaren idi dagiti Saksi ni Jehova kas katulongan iti panagadal iti Biblia, agraman dagiti nabayagen nga isyu ti Ti Pagwanawanan. Daan ken pisang-pisangen amin dagitoy. “Ania ti naudi a magasin nga inadalyo idi Domingo?” Inimtuodko.

“Dagitoy laeng dagiti isyu nga adda kadakami,” insungbatna, “ket dagitoy ti maulit-ulit nga adalenmi.” Iti dayta a kanito nga imbagak ken ni Marceline a maysaak a Saksi. Naragsakan unay! Idi imbagak a kayatko a maam-ammo ti mangidadaulo kadagiti gimong, inlawlawagna nga adayo ti pagnanaedan ti kabsat.

Sabali Pay a Makaparagsak a Naammuak

Kabigatanna, nagdaliasatkami ken ni Marceline tapno bisitaenmi ti lalaki a mangidadaulo. Idi simmangpetkami, nasorpresa ken naragsakan unay daytoy a kabsat a makakita kadakami. Kinapudnona, naammuak nga isu ket maysa a Saksi a naggapu iti kosta nga ili ti Toamasina, nasurok a 200 a kilometro iti amianan a daya. Napilitanda a sangapamiliaan nga agsubli iti dayta a lugar sumagmamano a tawen ti napalabasen idi di ninamnama a naikkat iti trabahona. Idi nakaawid iti lugarna, rinugianna ti nangasaba, nangikondukta kadagiti panagadal iti Biblia, ken nangidaulo kadagiti gimong.

Kasta unay ti ragsak daytoy a Saksi ken ti pamiliana idi makitada dagiti kaudian a ruar ti magasin a Pagwanawanan nga awitko. Impakitak met kadakuada ti libro a Mabalinyo ti Agbiag nga Agnanayon iti Paraiso a Daga, nga us-usarentayo idi a kangrunaan a katulongan  iti panagadal iti Biblia. Isu dayta ti damo a pannakakitada iti dayta. Iti simmaganad a Domingo, nagsubliak idiay Andranomafana tapno makigimong a kadua ida. Pinaregtak ida a pakaammuanda ti sanga nga opisina dagiti Saksi ni Jehova iti kabesera a siudad ti Antananarivo, gapu ta saan nga ammo ti opisina ti kaadda ti bassit a grupoda.

Dandani kada bulan, nangrugi idi Enero 1991, nga agdaliasatak a mapan idiay Andranomafana manipud Mahanoro tapno idanonko kadakuada dagiti kaudian a kopia ti Ti Pagwanawanan ken dadduma pay a publikasion. Maysa dayta a panagdaliasat nga agarup 130 a kilometro ti kaadayona kada ipapan, a nasurok a 90 a kilometro a pannagna​—a sumang-at ken sumalog kadagiti turod, a lumasat kadagiti nasamek a kabakiran. No agtudo, anusak ti napitak ken nagalis a dalan.

Dimmagsen ti awitko bayat nga immadu ti bilang dagiti agkasapulan iti literatura ken magasin. Ngem iti ngudo ti tunggal panagdaliasat, kasta unay ti pannakapnek ken ragsakko nupay nabannogak ken nasakit ti bagik. Anian a rag-ok a makita ti kasta unay a gagar ti grupo a mangawat iti tunggal baro a publikasion ken masaksian ti panangyaplikarda kadagiti kinapudno iti Biblia!

Iseserrek iti Amin-Tiempo a Ministerio

Idi Setiembre 1, 1992, nadutokanak kas payunir, kas panangawag dagiti Saksi kadagiti amin-tiempo a ministroda. Nagpayunirak idiay Mahanoro ngem babaen ti surat kinaskasabaak latta dagiti kakabagiak idiay Betoko II. Idi agangay, nangrugida a makipagadal kaniak babaen ti surat ket kiniddawda nga agsubliak iti purokmi tapno tulongak ida. Sidadaanak a mangaramid iti dayta, ngem kayatko a siguraduen nga umuna a napasnekda iti pangngeddengda nga agadal iti Biblia ken rumang-ayda iti naespirituan. Gapuna, intultuloyko pay la ti nagpayunir idiay Mahanoro.

Idi arinunos ti 1993, naikkanak iti pribilehio a mairaman iti dua a lawas a panagadal para kadagiti payunir idiay Antananarivo. Kalpasanna, naawisak nga agaplikar kas special pioneer, a mabalin a kaipapananna ti pannakaibaon iti sadinoman iti pagilian. Ngem nagpangaduaak a nangawat iti dayta nga awis, agsipud ta tarigagayak a tulongan dagiti kabagiak idiay Betoko II, nga adayo iti kaasitgan a kongregasion. Gapuna, intuloyko ti panagpayunirko idiay Mahanoro.

Kamaudiananna, idi bimmisita ti agdaldaliasat a manangaywan dagiti Saksi ni Jehova, kiniddawko kenkuana ti panagawidko tapno tulongak dagiti kabagiak. Adda nabuangay idin a kongregasion idiay Andranomafana, isu nga insingasingna a mapanak sadiay tapno tumulong iti kongregasion ken mangasaba iti teritoria ti Betoko II. Rinugiak ti nagserbi sadiay idi Setiembre 1, 1994. Iti dayta a bulan, naangay ti maysa a kombension distrito. Timmabunokami a dua ken ni manongko a Paul, a maysa a relihioso a mannursuro. Di nagbayag, addan 30 a makiramraman iti panangasaba idiay Andranomafana, ken iti Domingo adda promedio nga 65 a makigimgimong.

Nagtultuloy ti Pannagnak

Di nagbayag kalpasan ti panagsublik idiay Betoko II, uppat kadagiti lallaki ken babbai a kabsatko iti lasag ti nakakualipikar a makiraman iti ministerio dagiti Saksi ni Jehova, ken di nagbayag kalpasanna nagbautisarda. Kalpasan ti panagsublik idiay Betoko II, regular a napanak idiay Anosibe An’ala tapno agala iti literatura ken magasin, a nagnaak iti agarup 50 a kilometro kada ipapan. Nupay makabannog dayta a panagdaliasat, makagunggona gapu iti rag-o nga itdenna no makitak ti naespirituan nga irarang-ay iti dayta a lugar.

Ita, addan narang-ay a kongregasion idiay Betoko II, ket agarup 45 ti promedio a bilang dagiti makigimgimong no Domingo. Bin-ig a Saksi dagiti asideg a kabagiak iti lugarmi, ken regular pioneer ti kaaduan kadakuada. Ni adingko ket maysan nga special pioneer. Idi Nobiembre 1, 2001, nadutokanak met kas special pioneer, ket naibaonak iti purok ti Antanambao-Manampotsy. Ngem naragsakak a pimmanaw iti Betoko II.

Idi mangrugi a maammuak dagiti kinapudno iti Biblia idi 1987, nakurang a 3,000 dagiti Saksi idiay Madagascar. Ita, addan ti nasurok a 14,000. Kas iti nagadu kadagitoy, agyamanak iti pribilehio a kabaelak nga usaren ti pigsak a “mapan iti kanayonan a milia” tapno tumulong iti sabsabali. Agyamanak met ken ni Jehova ta binendisionanna dagiti panangikagumaak a mangaramid iti dayta.

[Dagiti Ladawan iti panid 24, 25]

Agdagsen iti nasurok a 15 a kilo a literatura ti masansan nga awitek iti panagdaliasatko iti 60 a kilometro nga agturong iti purokmi

[Ladawan iti panid 25]

Ni manongko a Paul

[Ladawan iti panid 26]

Ni manongko a Charles

[Ladawan iti panid 26]

Dakami kadagiti dadduma a kapamiliak a bin-ig a Saksi ni Jehova