Naammuanna Manipud iti Agriingkayo!
Naammuanna Manipud iti Agriingkayo!
TI AGTAWEN iti walo a ni Perla iti Veracruz nga estado ti Mexico ket adda iti maikadua a grado. Naminsan, sinaludsod ti maestrana no adda siasinoman a makaammo iti kaatiddog ti balyena. Idi damo, awan ti simmungbat. Kalpasanna, intayag ni Perla ti imana ket kinunana, “Ti gray whale ket mabalin a dumakkel agingga iti 14 a metro ken agdagsen iti 16 a tonelada.”
Gapu ta nasdaaw, inyimtuod ti maestra, “Nakaammuam iti dayta?”
“Manipud iti magasin nga Agriingkayo!,” kinunana. “No palubosandak, mabalin nga ipakitak kadakayo.” Kadawyan a mangitugot ni Perla iti kaudian a ruar ti Agriingkayo! iti bagna tapno mairanudna iti sabsabali. Naiparna nga intugotna ti Setiembre 8, 2003, a ruar nga addaan iti artikulo a “Nakaay-ayat a Panagrana Kadagiti Gray Whale.”
Naragsakan ti maestra ni Perla a makaawat iti kopia ti magasin. Saanna laeng a binasa no di ket kayatna a kukuanan dayta. Kayat met ti dadduma nga estudiante ti maaddaan iti kopia, isu a nangala ni Perla iti siam a kopia. Kasta unay ti panangpadayaw ti maestra ken ni Perla, a mangipapaima kenkuana iti tunggal isyu ti Agriingkayo!
Kalpasan la unay daytoy a kapadasan, timmabuno ni Perla iti kombension distrito dagiti Saksi ni Jehova. Sakbay a pimmanaw ni Perla, imbaga ti maestrana a maragsakanto nga umawat iti regalo manipud iti kombension. Isu nga inikkan ni Perla iti maysa a kopia ti libro nga Agsursuroka Manipud iti Naindaklan a Mannursuro, a nairuar iti dayta a kombension.
Kalpasanna, imbaga ti maestra iti dadduma nga estudiantena, “Mangipakpakita ni Perla iti nagsayaat a pagwadan, ta saan laeng nga interesado kadagiti librona iti eskuelaan no di ket ad-adalenna met ti dadduma a makagunggona nga impormasion ken iranranudna pay dayta kadatayo.”