Ti Panangmatmat ti Biblia

Adda Aya ti Dios iti Amin a Disso?

TI Dios ket maitutop a madeskribir kas mannakabalin amin ken ammona ti amin. Ngem no kayatda nga ad-adda pay a deskribiren ti kinatan-ok ti Dios, patien ti dadduma a ti Dios ket adda iti amin a disso.

Dagiti Nainkasuratan a pannursuro silalawag a suportaranda ti immuna a dua a termino. (Genesis 17:1; Hebreo 4:13; Apocalipsis 11:17) Pudno nga awan inggana ti pannakabalin ti Dios ken ammona ti amin iti anag nga awan ti mailimed kenkuana. Ngem adda aya ti Dios iti amin a disso wenno maysa aya a persona nga addaan iti masinunuo a pagnanaedan?

Ayan ti Dios?

Iti sumagmamano a bersikulo iti Biblia, “ti langlangit” ket nadakamat kas ‘naipasdek a disso a pagnanaedan’ ti Dios. (1 Ar-ari 8:39, 43, 49; 2 Cronicas 6:33, 39) Nupay kasta, deskribiren ti maysa a salaysay ti Biblia ti kinatan-ok ni Jehova a Dios babaen kadagitoy a sasao: “Ngem pudpudno kadi a makipagnaedto ti Dios iti sangatauan iti rabaw ti daga? Adtoy! Ti langit, wen, ti langit ti langlangit, saannaka a malaon.”​—2 Cronicas 6:18.

“Ti Dios maysa nga Espiritu,” kuna ti Biblia. (Juan 4:24) No kasta, isu ket agnanaed iti naespirituan a disso a naisina iti pisikal nga uniberso. No tukoyen ti Biblia “ti langlangit” kas pagnanaedan ti Dios, tuktukoyenna ti kinatan-ok ti lugar a pagnanaedanna a maisupadi iti aglawlaw a pagnanaedantayo. Kinapudnona, isursuro ti Biblia a ti taeng ti Dios ket talaga a naiduma iti pisikal nga uniberso ngem espesipiko unay dayta a lugar.​—Job 2:1-2.

Maysa a Persona ti Dios

Nasao ni Jesus ti maipapan iti pagnanaedan ni Jehova idi imbagana kadagiti adalanna: “Idiay balay ni Amak adu ti pagyanan. . . . Mapanak tapno mangisaganaak iti lugar a maipaay kadakayo.” (Juan 14:2) Napanan ni Jesus? Idi agangay, “simrek . . . idiay langit a mismo, tapno agparang ita iti sanguanan a mismo ti Dios maipaay kadatayo.” (Hebreo 9:24) Isursuro daytoy a salaysay kadatayo ti dua a napateg a kinapudno maipapan ken Jehova a Dios. Umuna, adda literal a pagnanaedanna, ken maikadua, isu ket maysa a persona, saan a maysa laeng a di mailadawan a puersa nga agnanaed iti sadinoman a disso.

 Dayta ti makagapu nga insuro ni Jesus kadagiti pasurotna nga ikararagda ti kastoy: “Amami nga adda iti langlangit,” nga iturongda dagiti kararagda iti maysa a persona, a ni Jehova, nga adda iti maysa a lugar, nga isu ti naespirituan a langlangit. (Mateo 6:9; 12:50) Maitunos daytoy a pannursuro iti naisuro iti ili ti Dios nga ikararagda iti nasurok a 1,500 a tawen. Dagiti kabayaganen a surat nga impaltiing ti Dios ket naglaon iti sumaganad a kararag: “Tumannawagka manipud nasantuan a pagnanaedam, ti langlangit, ket bendisionam ti ilim.”​—Deuteronomio 26:15.

Ti Nasantuan nga Espiritu ti Dios

Nupay ti Biblia kanayon a tukoyenna ti Dios kas addaan iti espesipiko a pagnanaedan, masansan a dakamatenna ti nasantuan nga espirituna nga adda iti amin a disso. “Sadino ti mabalinko a papanan manipud espiritum, ket sadino ti mabalinko a pagtarayan manipud rupam?” inyimtuod ni salmista a David. (Salmo 139:7) Mariro ti dadduma gapu kadagita a reperensia ken mabalin nga ipapanda nga adda ti Dios iti amin a disso. Ngem no usigenda ti konteksto daytoy ken ti dadduma pay a teksto, nalawag a ti nasantuan nga espiritu​—wenno aktibo a pannakabalin​—​ket mabalin a maisaknap manipud iti piho a lugarna iti aniaman a lugar iti material nga uniberso.

Kas iti ima ti ama a mangliwliwa ken tumulong kadagiti annakna, ti ima ni Jehova​—wenno ti nasantuan nga espiritu​—ket mabalin a makadanon iti aniaman a paset ti lubong dagiti espiritu wenno ti pisikal nga uniberso tapno maibanag ti panggepna. Gapuna, naikuna ti salmista: “No koma alaek dagiti payak ti bannawag, tapno makapagtaengak iti kaadaywan a baybay, sadiay, met, ti bukodmo nga ima iturongnak ket ti makannawan nga imam tenglennak.”​—Salmo 139:9, 10.

Mabalinmo ti Makigayyem iti Dios

Sipapakumbaba ken siaayat nga ipalpalubos ni Jehova a Dios a madeskribir ti bagina ken ti pagnanaedanna kadagiti us-usaren ti tattao a termino a nainaig unay iti pagnanaedan ken personalidadna. Gapu iti daytoy ken iti dadduma pay a wagas, kayariganna “agpakumbaba tapno kumita iti langit ken daga.” (Salmo 113:6) Nupay kasta, talaga a di naan-anay a maawatan ti tao ti kasasaad ti Dios.

Ngamin, nakadaydayag, nakatantan-ok, ken nakaskasdaaw unay ni Jehova tapno naan-anay a madeskribir kadagiti termino a maawatan ti tao. Isu a nupay saritaen dagiti Kasuratan ti nailangitan a pagnanaedanna kas lugar nga addaan iti espesipiko a disso, imposible a naan-anay a maawatan ti tattao ti kasta a naespirituan a taengna.​—Salmo 139:6.

Kaskasdi, makaliwliwa unay ti maaddaan iti kalkalainganna a pannakaawat iti pudno a kasasaad ni Jehova, nga isu ket saan a maysa a di maawatan, awan personalidadna a puersa a maisaksaknap iti intero nga uniberso. Imbes ketdi, isu ket maysa nga indibidual, nga addaan iti espesipiko a pagnanaedan, ken addaan personalidad a ti ayat ken kinadungngo ti kangrunaan a pakabigbiganna. Gapu iti kasta a pannakaammo, mabalin a maaddaan ti amin a tattao iti nakaskasdaaw ken naranga a gundaway​—ti gundaway a maaddaan iti manayon a personal a pannakigayyem iti Mannakabalin-amin a Soberano iti uniberso.​—Santiago 4:8.