Manipud Kadagiti Agbasbasa

Ubing a Nadadael ti Rupana Natukay unay ti riknak iti kapadasan ni Mailyn. (“Baro a Rupa Para ken Mailyn,” Mayo 22, 2004) Naparegtaak idi nabasak no kasano a daytoy a 11 ti tawenna nga ubing a nakidangadang iti nakaro a sakit ket kaskasdi nga isarsaritana kadagiti sabsabali ti naibatay iti Biblia a namnamana.

M. B., Italia

Makaparegta unay kaniak ti positibo a panangmatmat ni Mailyn ken ti pamiliana. Iti agdama a lubong, nalabes ti panangipaganetget ti media iti kinapateg ti personal a panaglanglanga. Mabalin a makapaupay dayta. Kayatko a maammuan ni Mailyn a nakitak ti pudno a kinapintasna. Namnamaek a makipagrag-oakto kenkuana inton ikkan ni Jehova iti baro a rupa idiay baro a lubongna. Napabilegak iti pammatina.

M. S., Estados Unidos

Asidegen a maoperaak tapno maikkat ti susok. No madadael ti itsuram gapu iti maysa a sakit, masapul a natibker ken naturedka tapno saanka a maupay. Napabilegak iti tured ken kinapositibo ni Mailyn. Kastoy ti maikunak ken Mailyn: Maited koma kenka ti kasayaatan. Para kaniak napintaska!

G. R., Francia

Nayanakak a gusab. Masmasdaaw a kumitkita kaniak dagiti dadduma nga ubbing idiay eskuelaan. Tupraandak pay dagiti dadduma. Patiek a ti insuro kaniak ni nanangko manipud iti Biblia ti nakatulong kaniak a maaddaan iti tured ken panagtalek iti bagik. Ita ta agtawenakon iti 31, masnaayanak pay laeng iti langak. Isu a natukay unay ti riknak iti kapadasan ni Mailyn. Patiek a babaen ti tulong ni Jehova, madaeranmi ti aniaman a karit a maipasangonto kadakami.

T. S., Japan

Gapu ken ni Mailyn nakombinsirak a saan a ti pisikal a langa ti mangted iti ragsak ken kinakontento iti biag. Magun-od laeng dayta no agserserbi ken ay-ayatentayo ti Diostayo. Inspirasionko ti ehemplo ni Mailyn.

A. T., Pilipinas

Abusado a Relasion Agyamanak iti artikulo nga “Agimtuod Dagiti Agtutubo . . . Apay a Nagdakes ti Panangtratona Kaniak?” (Mayo 22, 2004) Abusado ti nobiok. No adda ti dimi pagkinnaawatan, kanayon nga ibagana a basolko. Dimmakkelak iti pamilia a naranggas ken nabassawang ti panagsasaona isu a kasla gagangay kaniak ti kababalinna. Naragsakak itan ta nagsinakamin; impakitana kaniak nga isu ket saan a nasayaat a pakiasawaan.

Impailimedna ti naganna, Belize

Natulongannak ti artikulo a mangyebkas iti riknak. Sakbay ken bayat ti panagasawak, napasarak dagiti kasasaad nga inladawanyo. Napukaw ti panagraemko iti bagik gapu iti napadasak a mental ken emosional a kinaranggas. Sapay koma ta ti artikulo matignayna ti adu a mangsukimat iti relasionda bayat ti pannakinobioda. Nainsiriban unay nga am-ammuenyo ti maysa ken maysa sakbay nga agkasarkayo tapno maliklikanyo dagita a parikut.

M. M., Alemania

Agdaldaliasat a Bukbukel Agyamanak iti panangipablaakyo iti artikulo a “Bukel nga Aglayag iti Baybay.” (Mayo 22, 2004) Sumagmamano a tawen ti napalabasen, nakapidutak iti maysa kadagita a bukel iti aplaya nga asideg iti balayko, ngem diak impagarup a bukel dayta. Idi nabasak ti artikulo, nasdaawak ta naammuak a nakapidutak iti bukel a mabalin a naglayag manipud Sentral wenno Makinlaud nga Africa! Agyamanak unay iti panangisaganayo kadagita a makapainteres nga artikulo.

M. K., Japan