Panangsapul iti Gubuayan ti Amin nga Enerhia

TI INIT ti kangrunaan a gubuayan ti enerhia ti daga. Mamati ti adu a sientista a dagiti marunrunot a tedda dagiti kayo ken mula a nakaagsep iti enerhia manipud iti init ti nagbalin a karbon ken langis. * Iti damo, ti danum nga agayus kadagiti puttot a gubuayan ti koriente ket naggapu iti taaw babaen iti pudot ti init sa nagpatangatang kas ulep. Dagiti napudot a silnag ti init iduronna met ti angin a mangpaandar kadagiti generator. Ngem napattapatta nga agarup kagudua laeng iti kakasangabilion nga enerhia ti init ti makagteng iti daga.

Nupay nakaskasdaaw ti bituen a pagaammotayo kas init, maysa laeng dayta kadagiti binilion a dadakkel a gubuayan ti enerhia iti uniberso. Ania ti nangnangruna a nagtaudan amin dagitoy a bileg? Iti panangtukoyna kadagiti bituen, kinuna ti mannurat ti Biblia a ni Isaias: “Itangadyo dagiti matayo sadi ngato ket kitaenyo. Siasino ti namarsua kadagitoy a banag? Isu Daydiay mangiruruar iti buyotda sigun a mismo iti bilang, isuda amin awaganna sigun a mismo iti nagan. Gapu iti kinaruay iti dinamiko nga enerhia, kasta met a yantangay isu nakired iti pannakabalin, awan uray maysa kadakuada ti mapukpukaw.”​—Isaias 40:26.

No ut-utobentayo ti bileg dagiti bituen, mabalin a masdaawtayo​—ken ad-adda pay a masdaawtayo no panunotentayo ti Namarsua kadagitoy. Nupay kasta, paregtaennatayo ti Biblia: “Umadanikayo iti Dios, ket isu umadaninto kadakayo.” (Santiago 4:8) Wen, ti Namarsua iti daga ken dagiti aglaplapusanan a gubuayan ti enerhiana, daydiay nangted kadatayo iti biag, mabalin a masarakan dagidiay mangbirok kenkuana.​—Genesis 2:7; Salmo 36:9.

No makitada a marugrugitan ti daga ken dagiti gamengna ken di umiso ti pannakaiwarasna, mabalin a di mamati ti dadduma a tattao a ti Dios ket interesado iti daga ken kadagiti tattao iti dayta. Nupay kasta, ipasigurado ti Biblia kadatayo nga asidegen ti panagbalbaliw. Inkarina ti dakkel a panagbalbaliw iti pamay-an ti pannakaiwaras dagiti gamengna ken iti wagas ti pannakaiturayna. (Daniel 2:44; Mateo 6:9, 10) Babaen ti panangipasdekna iti maymaysa a nailangitan a sangalubongan a gobierno iti sidong ti panangiturong ti Anakna, ni Kristo Jesus, ipanamnama ni Jehova a Dios a tunggal nabiag agpapadanto ti bingayda iti nawadwad a gameng ti daga. (Mikias 4:2-4) ‘Dadaelennanto met dagidiay mangdaddadael iti daga,’ kayatna a sawen, dagidiay mangdadael iti aglawlaw ti daga, iti man naespirituan wenno pisikal.​—Apocalipsis 11:18.

Iti dayta a tiempo, matungpalton ti kari a nailanad iti Isaias 40:29-31, iti naespirituan ken iti pisikal: “Isu mangted iti bileg iti daydiay nabannog; ket iti daydiay awanan dinamiko nga enerhia paaduenna ti naan-anay a pannakabalin. Ti ubbing a lallaki agpadpada a mabannog ken mapakildanto, ket dagiti met laeng agtutubo a lallaki di bumurong a maitibkoldanto, ngem dagidiay mangin-inanama ken Jehova mapasublidanto ti bilegda. Agpangatodanto a sipapayak a kas kadagiti agila. Agtaraydanto ket saanda a mapakil; magnadanto ket saanda a mabannog.” Mabalinmo met nga ammuen ti ad-adu pay maipapan iti Gubuayan ti amin nga enerhia ken ti solusion kadagiti parikut maipapan iti enerhia ti daga no mangiwayaka iti tiempo nga agadal iti Biblia.

[Footnote]