Apay a Rumbeng nga Agtrabahoak iti Nadagsen?
Agimtuod Dagiti Agtutubo . . .
Apay a Rumbeng nga Agtrabahoak iti Nadagsen?
“Pulos a diak inarapaap ti agtrabaho iti nadagsen unay. Kaykayatko ti agay-ayam iti computer-ko.”—Nathan.
“Dadduma nga agtutubo tagibassitenda dagidiay kas kadakami nga agtartrabaho iti nadagsen, a kas man la dimi ammo ti agobra iti aniaman a trabaho.”—Sarah.
PANAGTRABAHO ITI NADAGSEN—adu ti mangibilang a makauma, narugit, ken di makaay-ayo dayta. Kinuna ti maysa a propesor iti economics maipapan kadagiti obrero: “Saan unay a natan-ok dagita a trabaho iti daytoy lubong a maseknan unay iti kinatan-ok.” Di ngarud pakasdaawan nga adu nga agtutubo ti madi nga agtrabaho iti nadagsen.
Nupay kasta, naiduma ti panangmatmat ti Biblia iti napinget a trabaho. Kinuna ni Ari Solomon: “Iti maysa a tao awanen ti nasaysayaat ngem iti pannanganna ket pudno nga uminum ken ipakitana iti kararuana ti naimbag gapu iti napinget a panagtrabahona.” (Eclesiastes 2:24) Idi panawen ti Biblia, ti Israel ket maysa a kagimongan dagiti mannalon. Ti panagarado, panagapit, ken panagirik ket agkasapulan amin iti kasta unay a panagbannog. Ngem imbaga ni Solomon a ti napinget a panagtrabaho ket mangyeg iti adu a gunggona.
Sinigsiglo kalpasanna, kinuna ni apostol Pablo: “Ti agtatakaw saan koma nga agtakawen, no di ket agtrabaho koma a sipipinget, nga aramidenna babaen kadagiti imana ti aramid a naimbag.” (Efeso 4:28) Ni Pablo a mismo ket nagtrabaho iti nadagsen. Nupay nangato ti adalna, insakadna no dadduma ti panagbiagna babaen ti panagaramidna kadagiti tolda.—Aramid 18:1-3.
Ania ti panangmatmatmo iti pisikal a trabaho? Maamirismo man dayta wenno saan, ti pisikal a trabaho makagunggona kenka iti adu a wagas.
Ti Panagsursuro Tapno Agballigi iti Biag
Makapasalun-at ti panagtrabaho iti nadagsen—panagmartilio man dayta wenno panaggaik. Saan laeng nga agtalinaed a mayat ti pammagim no di ket adu pay ti pagimbaganna. Ammom kadi
no kasano a sukatan ti impes a goma wenno ti asete ti lugan? Kabaelam kadi a tarimaanen ti nadadael a tawa wenno barado a tubo? Kabaelam kadi ti agluto? Madalusam kadi a naimbag ti banio wenno kasilias? Dagitoy a trabaho ti rumbeng a kabesaduen dagiti agtutubo a lallaki ken babbai, ta makatulong kadakuada nga agbiag a sibaballigi a bukbukodda inton agangay.Makapainteres ta ni Jesu-Kristo a mismo ket nabatad a kinabesadona ti dadduma a trabaho idi adda ditoy daga. Nasursurona ti agkarpintero—manipud la ketdi iti agsiuman kenkuana a ni Jose—ta naawagan idi kas karpintero. (Mateo 13:55; Marcos 6:3) Kabaelam met a sursuruen ti adu ken nadumaduma a paglaingan babaen ti panagobram a mismo.
Panangpatanor Kadagiti Makaay-ayo a Kalidad
Ti panagtrabaho iti nadagsen mabalin nga apektaranna met ti panangmatmatmo iti bagim. Iti panagsuratna para iti U.S. National Mental Health and Education Center, imbaga ni Dr. Fred Provenzano a ti panagsursuro kadagiti pisikal a trabaho ket mabalin a mangpasayaat iti “riknam a mapagpannurayam ken mapagtalkam ti bagim” ken “makatulong met a mangparang-ay iti panangdisiplinam iti bagim ken kinaurnos. Dagita ti pundasion iti naballigi a panagtrabaho.” Kinuna ti maysa nga agtutubo a lalaki nga agnagan iti John: “Makatulong kenka ti pisikal a trabaho tapno masursurom ti aganus. Masursurom a risuten dagiti parikut.”
Inlawlawag ni Sarah a nadakamat itay: “Nasursurok ti aggaggaget gapu iti panagtrabahok ti nadagsen. Nasursurok ti agbalin a disiplinado agpadpada iti mental ken iti pisikal.” Makauma kadi ti panagtrabaho iti nadagsen? Kinuna ni Nathan: “Nasursurok a tagiragsaken ti agtrabaho babaen kadagiti imak. Bayat a pinasayaatko dagiti paglaingak, nakitak a simmayaat ti kalidad ti trabahok. Dayta ti nangpapigsa iti panagtalekko iti bagik.”
Mabalin met a masursurom ti mangsagrap iti simple a rag-o no adda magapuanam gapu iti panagtrabahom iti nadagsen. Kastoy ti imbaga ti maysa nga agtutubo a lalaki nga agnagan iti James: “Pagay-ayatko ti agkarpintero. Nupay makabannog no dadduma, kanayon a mapanunotko ti inaramidko isu a maragsakanak iti nagapuanak. Talaga a makapnek dayta.” Umasping iti dayta ti kinuna ni Brian. “Pagay-ayatko ti agtarimaan iti lugan. No ammok a kabaelak a tarimaanen ti maysa a banag a nadadael sa mapagbalinko a kasla kabarbaro manen, pumigsa ti panagtalekko iti bagik ken mapnekak.”
Sagrado a Serbisio
Kadagiti Kristiano nga agtutubo, ti panagtrabaho iti nadagsen ket makatulong iti panagserbida iti Dios. Idi naipaannong ken Ari Solomon ti panagibangon iti nangayed a templo ni Jehova, naamirisna nga agkasapulan dayta iti kasta unay a panagregget ken kinasigo. Kuna ti Biblia: “Ni Ari Solomon nagbaon ket pinasukonna ni Hiram manipud Tiro. Isu ti anak ti maysa a nabalo a babai manipud tribu ni Neftali, ket ti amana maysa a lalaki a taga Tiro, trabahador iti gambang; ket isu napnuan ti sirib ken ti pannakaawat ken ti pannakaammo iti panangaramid iti tunggal kita ti trabaho iti gambang. Iti kasta isu dimteng ken Ari Solomon ket rinugianna nga aramiden ti isuamin a trabahona.”—1 Ar-ari 7:13, 14.
Anian a pribilehio ni Hiram ta inusarna dagiti paglainganna a mangitandudo iti panagdayaw ken Jehova! Ti kapadasan ni Hiram ti mangitampok iti kinapudno ti kinuna ti Biblia iti Proverbio 22:29: “Nakakitaka kadi iti tao a nasigo iti trabahona? Iti sanguanan ti ar-ari ti pagsaadannanto; saanto nga agsaad iti sanguanan dagiti kadawyan a tattao.”
Kadagitoy nga aldaw, uray dagiti agtutubo nga addaan iti bassit wenno awanan kapadasan iti panagibangon ti naaddaan iti pribilehio a makipaset iti panagibangon kadagiti Kingdom Hall. Gapu iti pannakipasetda kadagita a proyekto, dadduma ti nakasursuro kadagiti makatulong a trabaho, kas iti panagbalinda nga elektrisian, tubero, mason, ken karpintero. Nalabit mabalin a makisaritaka kadagiti panglakayen iti lugaryo no mabalin met a makipasetka iti panagibangon kadagiti Kingdom Hall.
Kastoy ti kinuna ni James, a timmulongen a nagibangon iti sumagmamano a Kingdom Hall: “Adu a miembro iti kongregasion ti mabalin nga awan ti panawen wenno abilidadda a tumulong. Isu a no tumulongka, ti intero a kongregasion ti tultulongam.” Ni Nathan a nakasursuro nga agsemento, natakuatanna a daytoy a paglainganna ti nangted kenkuana iti sabali pay a pribilehio iti panagserbi iti Dios. Kastoy ti malagipna: “Nakapanak idiay Zimbabwe tapno usarek dagiti paglaingak a tumulong iti panagibangon iti sanga nga opisina dagiti Saksi ni Jehova. Tallo a bulan a nagtrabahoak sadiay, ket daydi ti maysa kadagiti kasayaatan a kapadasak iti biag.” Para iti dadduma nga agtutubo, ti kinatulokda nga agtrabaho iti nadagsen ti nangtignay kadakuada nga agboluntario iti sanga nga opisina dagiti Saksi ni Jehova iti lugarda.
Ti panagbalin a nalaing iti pisikal a trabaho ti mabalin met a mangiparikna kenka iti “pannakapnek.” (1 Timoteo 6:6) Adu nga agtutubo kadagiti Saksi ni Jehova ti agserserbi kas payunir, wenno amin-tiempo nga ebanghelisador. Ti panagsursuro iti maysa a trabaho ti nakatulong iti dadduma tapno suportaranda ti bagida iti pinansial a din kasapulan nga ageskuelada iti napaut wenno aggastoda iti adu a kuarta.
No Kasano a Sursuruen
Nalawag, interesadoka man a mangged kas maysa nga artesano wenno kayatmo laeng nga usaren dagiti paglaingam iti pagtaenganyo, nagadu dagiti pagimbagan ti panagsursurom no kasano ti agtrabaho iti nadagsen. Mabalin a mangituktukon ti eskuelaan iti lugarmo iti dadduma a kurso iti nadumaduma a trabaho. Mabalin a makasursuroka met a mismo iti pagtaenganyo. Kasano? Babaen ti panagaramidmo kadagiti trabaho iti balay. Kastoy ti insurat ti nadakamat itay a ni Dr. Provenzano: “Dagiti inaldaw a trabaho ket napateg kadagiti agtutubo agsipud ta isuroda dagiti kangrunaan a ‘paglaingan iti panagbiag’ a makatulongto kadakuada nga agbiag a naballigi ken manakem inton suminadan kadagiti nagannakda.” Isu a nasiputka koma no ania ti maitulongmo iti pagtaenganyo. Adda kadi arubayanyo a masapul a magaikan wenno estante a rumbeng a matarimaan?
Imbes a tagibassitem, ti pisikal a trabaho gunggonaannaka iti adu a wagas. Dimo liklikan dayta! Imbes ketdi, ikagumaam a ‘kitaen ti imbag’ iti nagbannogam, ta kuna ti Eclesiastes 3:13 a, “sagut ti Dios” dayta.
[Blurb iti panid 21]
Ti panagsursuro iti maysa a trabaho ti nakatulong iti adu nga agtutubo tapno mapalawada ti panagserbida iti Dios
[Dagiti Ladawan iti panid 22]
Masansan a maisurodaka dagiti dadakkelmo kadagiti kangrunaan a paglaingan