Dagiti Agbuybuya a Nalaka a Madangran

BABAEN ITI MANNURAT TI AGRIINGKAYO! IDIAY FINLAND

PARA iti adu nga ubbing, dagiti pelikula, telebision, video, DVD, elektroniko nga ay-ayam, ken ti Internet ket gagangay a paset ti panagbiag. Kinuna ti nabiit pay a damag nga impablaak ti Finnish Board of Film Classification a “sigun iti dadduma a pattapatta, ti oras a binusbos dagiti ubbing nga agbuybuya iti media ket 20 agingga iti 30 a napapaut ngem iti pannakikaduada iti pamiliada.” * Nakalkaldaang ta daytoy ti mangimpluensia kadagiti ubbing iti kaaduan a makadangran a bubuyaen.

Iti dadduma a pagilian, ikagkagumaan dagiti autoridad a salakniban dagiti ubbing babaen ti panangikeddengda iti edad a maipalubos ti panagbuyada ken ti klase dagiti maipalubos a buyaenda. Ngem sigun iti damag, saan a kanayon a maawatan dagiti ubbing ken nagannak dagiti naikeddeng a klase, wenno adda pagannayasanda a mangtagibassit kadagitoy. Kanayonanna, adu a pagsinean ken pagabangan iti video ti di mangikankano kadagiti naikeddeng nga edad dagiti agabang. Malaksid iti dayta, saan man la a naklaseklase ti dadduma a programa ken pelikula.

Kinuna ti maysa kadagiti napagsaludsodan a mannursuro: “Kasla saan a kanayon nga ibilang dagiti estudiante a naranggas ti maysa a bubuyaen no awan ti mapapatay iti dayta.” Adu a video ken computer game​—ken uray dagiti cartoon a nadisenio a nangnangruna kadagiti annak​—ti aglaon kadagiti posible a makadangran a material.

Sigun iti report, tunggal sangakabbalayan ti addaan iti “kangrunaan a rebbengen a mangusig kadagiti pelikula ken programa iti telebision a buybuyaen dagiti annakda.” Nagngudo babaen iti mamagpanunot a saludsod: “Kas natataengan, kayattayo aya, natured aya ti nakemtayo, ken addaantayo aya kadagiti pamay-an a mangsalaknib iti annaktayo manipud kadagiti makadangran nga epekto ti media?”

[Footnote]