Dagiti Bantay​—Asino ti Mangispal Kadagitoy?

ITI uppat nga aldaw idi 2002, naangay ti Global Mountain Summit idiay Bishkek, Kyrgyzstan (sentral Asia). Dayta ti kaunaan nga internasional a komperensia a naipamaysa kadagiti parikut iti kabambantayan. Ninamnama dagiti nangisponsor a ti 2002 ti tawen “a pangrugian ti baro a panawen, tawen a makabigbig iti pudno a kinapateg dagiti kabambantayan.”

Dagiti timmabuno iti dayta a komperensia nagkaykaysada a nagaramid iti “Bishkek Mountain Platform,” a naglaon kadagiti pagannurotan ti tunggal maseknan iti pannakasalaknib dagiti bantay. Ti naibaga a kalatna ket “pasayaaten ti pagbiagan dagiti agnanaed iti kabambantayan, salakniban dagiti sistema ti ekolohia iti kabambantayan ken ti ad-adda a nainsiriban a panagusar kadagiti gameng ti bantay.”

Addan naaramid a nagrang-ayan. Naipasdeken dagiti nasional a parke iti intero a lubong a mangsalsalaknib kadagiti lugar a naisangsangayan ti kinapintasda ken aduan iti nadumaduma a sibibiag a parsua. Iti adu a paset ti daga, ti pannakadadael ti aglawlaw ket medio napasardengen dagiti grupo a mangsalsalaknib iti dayta. Ti napinget a tulagan a mangdalus iti nuklear a basura a naitambak iti kabambantayan ti Kyrgyzstan ti maysa kadagiti plano ti Mountain Summit idiay Bishkek. Daytoy a makasabidong unay a basura ti mamagpeggad iti danum a suplay ti 20 a porsiento iti tattao iti sentral Asia.

Ngem nagrigat latta a parmeken dagiti parikut a nainaig iti panangsalaknib kadagiti kabambantayan iti lubong. Kas pagarigan, idi 1995, impaulog dagiti autoridad iti Canada ti “Forest Practices Code” tapno masalakniban dagiti nabatbati a napuskol a kabakiran ti British Columbia. Ngem impalgak ti simmaganad nga imbestigasion a kaaduan kadagiti kompania nga agtrostroso ti nanglabsing iti linteg ket intultuloyda ti nagpukan kadagiti kayo uray kadagiti napasdok unay a bakras. Idi 1997, nabaliwan ti linteg, ta kuna ti industria ti panagtroso a nainget unay dayta.

Saan laeng a dagiti pagimbagan ti komersio ti makalapped. Binigbig ti naudi a deklarasion ti Komperensia iti Bishkek a ti gubat, kinapanglaw, ken bisin degdeganda pay ti awan sardayna a panagkapuy ti sistema ti ekolohia iti kabambantayan. Dagiti kabambantayan, agraman ti dadduma a paset ti planeta, agtultuloyto a madadael agingga nga agpatingga ti amin a kangrunaan a makagapu iti pannakadadael ti pagnanaedan dagiti animal ken pagtubtubuan dagiti mula.

Pannakaseknan ti Dios iti Pinarsuana

Nupay makapaupay daytoy a kasasaad, adda gapu a manginanamatayo. Saan a malipatan ti Mannakabalin-amin a Dios ti mapaspasamak iti pinarsuana. Isu ket deskribiren ti Biblia kas Daydiay “makinkukua kadagiti alimpatok ti bambantay.” (Salmo 95:4) Maseknan met kadagiti animal iti kabambantayan. Sigun iti Salmo 50:10, 11, kuna ni Jehova: “Kukuak ti tunggal atap nga animal ti bakir, dagiti animal iti rabaw ti sangaribu a bantay. Pagaammok unay ti tunggal nagpayak a parsua iti bambantay, ket dagiti bunggoy ti an-animal iti nawayang a tay-ak addada kaniak.”

Adda kadi pamay-an ti Dios a mangispal iti madaddadael nga aglawlaw? Wen, adda! Kuna ti Biblia nga isu ‘mangipasdekto iti maysa a pagarian a saanto a pulos madadael.’ (Daniel 2:44) Ni Jesu-Kristo a nadutokan nga agturay iti daytoy nailangitan a gobierno ket maseknan unay iti daga ken kadagiti tattao nga agnanaed iti dayta. (Proverbio 8:31) Ti turayna ti mangipasdek iti talna ditoy daga, mamagpatingga iti amin a panangrarit, ken mangtarimaan iti nadadael iti daytoy a planeta.​—Apocalipsis 11:18.

No segseggaam ti kasta a solusion, sigurado nga itultuloymo nga ikararag nga ‘umay koma ti Pagarian ti Dios.’ (Mateo 6:9, 10) Masungbatanto dagita a kararag. Din agbayag, pagpatinggaenton ti pagarian ti Dios ti kinaawan hustisia ken tarimaanenna daytoy nadadael a planeta. Inton mapasamak daytoy, piguratibo a dagiti bantay ‘agdir-ida a sirarag-o.’​—Salmo 98:8.