Ti Panangmatmat ti Biblia

Anamongan Kadi ti Dios ti Panagasawa ti Agkasekso?

KABAYATAN ti maysa a seremonia iti kapilia, adda dua a lallaki a nagtakder ken naginniggem iti imatang ti nalatak nga obispo dagiti Episcopal. “Nagtulagda . . . iti imatang ti Dios ken iti relihionda.” Iti imatang ti publiko, ti panagasawa dagitoy ket binendisionan ti obispo a nakakawes iti puraw nga abito a naarkosan iti balitok. Kalpasanna, naginnarakup ken naginnungngoda sa timmakder ti intero a tallaong kas panagraem kadakuada. Sigun iti obispo, ti kasta a homoseksual a relasion “ket nasantuan ken maikari a mabendisionan, . . . maikari a maawagan iti sagrado.”

Nupay kasta, busoren ti dadduma a panguluen ti relihion ti panagkasar dagiti agkasekso. “Mariribukankami unay iti daytoy a desision ti [obispo],” kinuna ni Cynthia Brust, pannakangiwat ti American Anglican Council, maysa a grupo dagiti konserbatibo a kameng ti Episcopal. “Ti pananganamong iti agkasekso ket maikontra iti nalawag a pannursuro iti Biblia maipapan iti panagasawa ken seksualidad,” sa kinunana pay, “a ti seksualidad . . . ket maipalubos laeng iti nagkallaysan a lalaki ken babai.”

Saan laeng nga iti relihion a nakaro a mapagsusupiatan daytoy nga isyu. Iti intero a lubong, kumarkaro dagiti nabara a napolitikaan a debate, agsipud ta dakkel ti epekto daytoy iti kagimongan, politika, ken ekonomia a pakairamanan dagiti pension, pannakaikadua ti asawa iti insurance a mausar iti pannakaasikaso ti salun-at, ken buis.

 Masansan a komplikado unay ken saan nga agtutunos ti panangmatmat ti publiko kadagiti isyu a pakairamanan ti kalintegan dagiti sibilian ken ti legal a panangbigbig. Masapul a taginayonen dagiti pudno a Kristiano ti neutralidadda babaen ti dida pannakiraman kadagiti napolitikaan a debate. (Juan 17:16) * Nupay kasta, mariro ti dadduma a mangap-apresiar iti Biblia maipapan iti panagkasar dagiti agkasekso ken ti homoseksualidad. Kasano ti panangmatmatmo iti panagkasar dagiti agkasekso? Ania ti pagalagadan ti Dios iti panagasawa? Ania ti epekto ti panangmatmatmo iti relasionmo ti Dios?

Ti Namarsua Kadatayo Nagaramid iti Pagannurotan

Nabayagen a nagaramid ti Namarsua kadatayo kadagiti pagalagadan a mangtarawidwid iti panagasawa sakbay pay a rinugian dagiti gobierno a tarawidwidan ti panagasawa. Kastoy ti kuna kadatayo ti umuna a libro iti Biblia: “Ti maysa a lalaki panawannanto ti amana ken ti inana ket masapul a makitipon iti asawana ket masapul nga agbalinda a maymaysa a lasag.” (Genesis 2:24) Ti Hebreo a sao nga “asawa,” sigun iti Vine’s Expository Dictionary of Biblical Words, “ipatuldona ti maysa a babai.” Pinasingkedan ni Jesus a dagidiay agkasar ket rumbeng a “lalaki ken babai.”​—Mateo 19:4.

No kasta, pinanggep ti Dios a permanente ti panagasawa ken nasinged a singgalut ti maysa a lalaki ken babai. Dagiti lallaki ken babbai ket nadisenioda nga agtinnulong tapno mapennekda ti emosional, espiritual, ken seksual a kasapulan ken tarigagayda.

Ti agdinamag a salaysay ti Biblia maipapan iti Sodoma ken Gomorra ipalgakna ti panangmatmat ti Dios iti homoseksualidad. Kinuna ti Dios: “Ti ikkis ti panagreklamo maipapan ti Sodoma ken Gomorra, wen, natbag dayta, ket ti basolda, wen, nadagsen unay.” (Genesis 18:20) Nabatad ti nakaro a kinalulokda iti moral iti dayta a tiempo idi sinarungkaran ti dua a sangaili ti nalinteg a tao a ni Lot. “Dagiti lallaki ti Sodoma . . . pinalikmutanda ti balay, manipud ubing agingga iti lakay, amin dagiti tattao kas maymaysa a bunggoy dagiti managderraaw. Ket nagpukpukkawda ken Lot ket kinunkunada kenkuana: ‘Sadino ti ayan dagiti lallaki a simmangbay kenka ita a rabii? Iruarmo ida kadakami tapno makidennakami kadakuada.’” (Genesis 19:4, 5) Kinuna ti Biblia: “Dagiti lallaki ti Sodoma dakesda ken nakaroda a managbasol maikaniwas ken Jehova.”​—Genesis 13:13.

Dagiti lallaki “simgedda a sidadawel iti derrepda iti maysa ken maysa, lallaki iti lallaki.” (Roma 1:27) “Simmurotda iti lasag maipaay iti di nakaisigudan a pannakausar.” (Judas 7) Kadagiti pagilian a nasaknap ti pannakaitandudo dagiti kalintegan ken kampania dagiti homoseksual, mabalin a di kayat ti dadduma nga usaren ti sao a “di nakaisigudan” a mangdeskribir iti homoseksual a kababalin. Nupay kasta, saan kadi a ti Dios ti maudi a mangikeddeng no ania ti maitunos iti nainkasigudan? Kastoy ti imbilinna kadagiti nagkauna a tattaona: “Dika makikaidda iti maysa a lalaki a kas ti pannakikaiddam iti maysa a babai. Nakarimrimon a banag dayta.”​—Levitico 18:22.

Manungsungbatka iti Dios

Nabatad ti Biblia: Saan nga anamongan ti Dios wenno dina panuynoyan ti homoseksual nga aramid. Saanna met nga anamongan dagiti tattao a ‘makikanunong pay kadagidiay mangan-annurot kadagita.’ (Roma 1:32) Ket ti “panagasawa” dina mapagbalin a nadayaw ti homoseksualidad. Ti bilin ti Dios a ti “panagasawa nadayaw koma iti tengnga dagiti isuamin” ilaksidna ti panagasawa dagiti homoseksual, nga ibilangna a makarimon.​—Hebreo 13:4.

Kaskasdi, babaen iti tulong ti Dios, mabalin a sursuruen ti siasinoman nga ‘adaywan ti pannakiabig,’ a pakairamanan dagiti homoseksual nga aramid, ken “ikutan ti bukodna a basehas iti pannakasantipikar ken dayaw.” (1 Tesalonica 4:3, 4) Wen, saan a kanayon a nalaka daytoy. Kastoy ti kinuna ni Nathan * a dati a homoseksual ti panagbiagna: “Impagarupko idi no diak maisardeng.” Ngem nagbalbaliw gapu iti tulong “ti espiritu ti Diostayo.” (1 Corinto 6:11) Kas natakuatan ni Nathan, awan ti parikut a di marisut ni Jehova, a makaipaay iti bileg ken tulong tapno maragpattayo dagiti pagalagadanna ken masagraptayo dagiti bendisionna.​—Salmo 46:1.

[Footnotes]

[Picture Credit Line iti panid 26]

Rinetrato ni Chris Hondros/Getty Images