“Makapagbalbaliw Kadi Dagiti Balud?”

Dayta ti nayimtuod iti akkub ti “Agriingkayo!” iti Mayo 8, 2001 a ruar. Adu nga agbasbasa ti nangapresiar iti daytoy a serye dagiti artikulo, a nakairamanan ti report maipapan iti naibasar iti Biblia a programa a panangisuro nga ar-aramiden dagiti Saksi ni Jehova iti pagbaludan ti gobierno idiay Atlanta, Georgia, E.U.A. Adtoy ti ababa a naadaw iti adu a surat a naawat.

▪ “Gapu iti pannakaibaludko iti napalabas a walo a tawen, makitak a talaga a naballigi ti panangisuro iti Biblia nga ar-aramiden dagiti Saksi ni Jehova kadagiti pagbaludan. Idi naibaludak idiay Atlanta, naaddaanak iti gundaway a nakipagtrabaho iti lima kadagiti nadakamat iti artikuloyo. Agyamanak unay iti ayat ken pannarabayda. Agyamanak iti kakabsat a kas kadagitoy, a nangipakita iti ayat kadagidiay nagkamali ngem ikagkagumaanda nga aturen dayta ken agbalin a nasaysayaat a tattao.”​—R. J.

▪ “Addaak iti pagbaludan ket nabaelan dagiti kakabsat iti lokal a Kingdom Hall ti nangipasdek iti programa a panangisuro ditoy. Nagbanaganna, nabautisaran ti maysa a padak a balud ken nakasubliakon, nupay nailaksidak idi iti kongregasion Kristiano. Adu pay a balud ti agad-adal iti Biblia. Makaparegta a maammuan a pasetnatayo ti panangisuro a maar-aramid iti intero a lubong. Anian a nagsayaat ti agserbi ken Jehova, sadinoman ti ayantayo!”​—J. M.

▪ “Idi 1970, naibaludak iti 14 a tawen gapu iti krimen a diak inaramid. Idi addaak iti pagbaludan, rinugiak ti nakipagadal iti Biblia kadagiti Saksi ni Jehova. Nagustuak unay ti kinamapagpiaran ken pannakaseknanda. Idi nawayawayaanakon, intultuloyko ti nakipagadal ket di nagbayag, nabautisaranak. Adda panawen a maupay ken makapungtotak pay laeng gapu iti kinaawan hustisia nga inibturak. Ngem palpalagipak ti bagik nga asidegen a pagpatinggaen ni Jehova ti amin a kinaawan hustisia ken panagsagaba. Makapagbalbaliw dagiti balud no surotenda dagiti pannursuro iti Biblia. Makapagyamanda met iti panangikagumaan dagiti nagaget a kakabsattayo a mangipapaay iti tiempoda a tumulong kadakuada. Agyamanak met!”​—R. S.

▪ “Idi simrekak iti pagbaludan agsigarilioak, agdroga, agsao iti dakes, ken diak pagraeman dagiti autoridad. Miembroak met idi ti maysa a grupo dagiti kriminal. Maysa pay, nailaksidak iti kongregasion Kristiano. Ita, nakasubliakon isu a nasayaaten ti irarang-ayko. Gapu iti kinapudno, mariknak a siwayawayaakon!”​—I. G.