Manipud Kadagiti Agbasbasa

Siensia ken Dios Naragsakanak a nangbasa iti serye a “Matulongannaka Aya ti Siensia a Mangbirok iti Dios?” (Hunio 22, 2004) Pinatulodak iti kopia ti buridek a kasiumanko a maysa a nuklear a pisiko. Husto unay dagiti artikulo maipapan iti panangimpluensia dagiti kakadua iti nasientipikuan a komunidad isu a nagbalinda nga ateista. Patiek a ti ateismo ti nagbalin a relihion ti nasientipikuan a lubong gapu ta dagiti relihioso a dogmatiko nagdakes ti panangipapanda iti Biblia. Agyamanak unay iti panangilawlawagyo kadagitoy a suheto.

A. B., Estados Unidos

Dagiti serye ket nagsayaat manen nga artikulo. Dagiti nagpintas a ladawan ti nangpasayaat iti pannakaawatmi kadagiti uppat a kangrunaan a pisikal a puersa a mamagbalin a posible ti biag ditoy dagatayo. Dagiti met saludsodyo kadagiti relihionista ti nangipalgak iti moral a pagkapuyanda no maipapan iti kinatarnaw ken kinaemma. Pangngaasiyo ta awatenyo ti panagyamanko iti intero a serye dagiti artikulo.

F. W., Estados Unidos

Concorde Agtawenak iti 16, ket kayatko ti agyaman gapu iti artikulo a “Ti Concorde Nagsardengen ti Panagtayabna.” (Hunio 22, 2004) Sipud pay idi bassitak, kaay-ayokon daytoy ‘flying racer.’ Nakaskasdaaw a makita a kabaelan ti tao ti agpartuat, gapu iti kinasaririt ken sirib nga inted ti Dios kenkuana.

T.D.C., Francia

Napadasakon ti naglugan iti Concorde. Nangruna a nagustuak a binuya ti “isisingising” ti init iti laud kalpasan a nagrubuatkami idiay London iti rabii ken nagdissokami tallo nga oras kalpasanna iti naraniag a malem idiay New York!

R. M., Estados Unidos

Abusado a Nobio Agyamanak gapu iti artikulo nga “Agimtuod Dagiti Agtutubo . . . Kasano a Mapasardengko ti Nobiok iti Panangmaltratona Kaniak?” (Hunio 22, 2004) Simrekak idi iti relasion a napeggad iti pisikal ken emosional. Mabutbutengak ngamin idi iti nobiok, isu a pimmaut ti abusado a relasionmi. Naimbag laengen ta nabaelak a ginuped ti relasionmi gapu iti tulong ti dadakkelko, dagiti Kristiano nga panglakayen, ken ni Jehova a Dios. Makagunggonanto daytoy nga artikulo kadagidiay agkasapulan unay iti tulong.

J. A., Estados Unidos

Sapay koma ta makatulong daytoy nga artikulo tapno saan a makiasawa ti maysa a babai iti lalaki a mangmaltrato kenkuana. Ti berbal, emosional, ken pisikal a panangabuso ket rumbeng a saan a mapasamak sipud pay iti damo! Dayta ti nasursurok manipud iti nasaem a kapadasak.

T. G., Canada

Simmingpet nga Amo Lima a tawenen nga agtartrabahoak iti nasingpet ken naasi a lalaki. Idi agangay, nailako ti kompania, ket adda naisaad a baro nga amo. Kanayon a pagsasawannak. Inaldaw a pabainan, insultuen, ken ulbodannak. Malmaldaang ken maburiboranak unay idi. Kalpasanna, naawatko ti Mayo 8, 2004 a ruar nga addaan serye a “No Mairurumenka iti Panggedan​—Ania ti Maaramidam?” Nangibatiak iti kopia iti lamisaanko tapno makita ken basaenna dayta no kayatna. Kasta nga agpayso ti inaramidna. Sipud idi, nagdakkel ti namalbaliwannan. Dinak pabpabainanen. Kinunana pay ketdi a simmayaat ti panagtrabahok. Nabang-aranak unay!

K.D.A., Côte d’Ivoire

Kinaliday Naisangsangayan ti serye ti akkub nga “Agsolsolo Ngem Saan a Naliday.” (Hunio 8, 2004) Nagustuak a nangnangruna dagitoy a singasing a nailista iti kahon iti panid 7, “No Kasano a Madaeram ti Kinaliday.” Inusarko ti adu kadagitoy a singasing, ket ammok a dagitoy ket dakkelto a gubuayan ti pammaregta iti sabsabali.

E. M., Estados Unidos