Manipud Kadagiti Agbasbasa

Kinaagtutubo Pagyamanan iti serye a “Panangsaranget Kadagiti Karit iti Kinaagtutubo.” (Hulio 8, 2004) Nabiit pay a nagtengak ti kinaagtutubo ket adda sumagmamano a problemak a pakakonkonsiensiaak. Gapu kadagitoy nga artikulo, nagun-odak ti kasapulan a balakad a makatulong kaniak a manglagip iti Naindaklan a Namarsua kaniak. Sapay koma ta mapagballigiak dagiti karit iti kinaagtutubo a diak sagabaen dagiti rigat nga ipaay daytoy a lubong.

R. R., Albania

Idi ubingak, adu ti gagayyemko a kapatadak. Ngem bayat a dumakdakkelak, saankamin nga agsasarita. Kalpasan dagiti Nakristianuan a gimong, agtugawak iti kotse a diak man la makisaritan iti siasinoman. Nabang-aranak idi nabasak a gagangay nga agkakanat ti marikna dagiti agtutubo ken ti maysa kadagiti kasayaatan a pangsumra iti kinaliday isu ti panangipakita iti interes iti sabsabali​—agraman kadagidiay saanmo a kapatadan. Iti dayta nga aldaw ti gimong, nakisaritaakon iti sabsabali, aniaman ti edadda, isu a naragsakanak. Pagyamanan unay!

M. K., Japan

Agtawenak iti 15, ket kasapulak unay daytoy nga impormasion. Impaawat kaniak ti nadakamat nga agtutubo a saan la a sisiak ti makapaspasar kadagiti nasaem a rikna, ken mabalin a maparmek dagitoy. Daytoy ti nangpabileg ken nangparegta kaniak!

L. R., Ukraine

Pagyamanan kadagitoy a serye. Makaliwliwa a maammuan a mabalin a daeran daytoy nariribuk a panawen. Sapay koma ta dagitoy nga artikulo ti makatulong iti dadduma nga agtutubo a mangtaming a sititimbeng iti daytoy a paset ti panagbiagda.

R. V., Italia

Daytoy a serye ket nabayagen a sapsapulek. Masansan a maragsakan ken maladingitanak ket no dadduma, madanagan ken nalidayak. Sangkapanunotko idi a basolko no apay a kastoy ti riknak. Ngem ti maudi nga artikulo iti serye kinunana: “Kayat ni Jehova a Dios nga agragsakka​—talaga a maragsakan. Saan laeng a parparawpaw a ragsak dayta a mangabbong iti nakalemmeng a panagliday.” Idi nabasak dagitoy a sasao, nakasangitak. Nadakamat met ti artikulo nga inton agangay, mabalin nga aglabas dagitoy a rikna. Talaga a daytoy ti nangliwliwa kaniak. Napabilegak manen. Pagyamanan unay!

H. T., Japan

Idi nakitak daytoy a magasin idiay Kingdom Hall, dagus nga inukagko. Idi basbasaek idiay balay, kayatko a basaen ti intero nga artikulo. Naupayak unay idi naungpotko agsipud ta kayatko nga adda pay koma nayon ti artikulo! Itultuloyyo ti agsurat kadagiti artikulo a kas iti daytoy!

K. C., Estados Unidos

Dagiti Piano Agtawenak iti 12. Pagyamanan gapu iti artikulo a “Panagtokar Babaen Kadagiti Ramaymo.” (Hulio 8, 2004) Gimmatangak iti libro maipapan kadagiti instrumento iti musika, a nangilawlawag met maipapan kadagiti instrumento nga addaan iti teklado. Nailawlawag dagiti detalye ti teklado ngem nalawlawag ti panangisalaysay ti Agriingkayo! Medio nabayag metten nga agsapsapulak iti kasta nga artikulo! Ti abilidad nga agtokar iti instrumento ket talaga a nakaskasdaaw a sagut ti Namarsua kadatayo!

D. G., Alemania

Pannakairurumen Nabiit pay nga adda Saksi ni Jehova a nangted kaniak iti magasin nga addaan iti serye a “No Mairurumenka Iti Panggedan​—Ania ti Maaramidam?” (Mayo 8, 2004) Gapu ta nairurumen iti panggedan, ti maysa nga am-ammok immikkat iti trabahona. Ditoy Alemania, kaipapanan dayta a tallo a bulan nga awan benepisiom gapu iti kinaawan panggedam. Inkagumaak a tinulongan daytoy nga agtutubo a lalaki. Babaen ti tulong iti magasinyo, nga inragpinko iti surat iti opisina a mangtamtaming kadagiti parikut dagiti empleado, tallo nga aldaw kalpasanna, naala daytoy a lalaki dagiti benepisiona!

R. S., Alemania