Rumbeng Aya nga Usarentayo ti Nagan ti Dios?

IDI 1902, ti The Presbyterian and Reformed Review impadamagna ti pannakairuar ti 1901 American Standard a bersion ti Biblia. Rebision dayta ti Biblia a King James Version idi maika-17 a siglo. Iti artikulona, inlawlawag ti pagiwarnak ti kinaumiso ken kasansan ti pannakausar ti nagan ti Dios a Jehova iti Ingles a Biblia:

“Dimi maawatan no kasano nga agsisimparat dagiti kapanunotan maipapan iti kinaumiso daytoy a desision. Daytoy ti personal a nagan ti Dios, a pinilina nga ipakaammo iti ilina: sakiten unay ti nakemmi a napadpadakes dayta gapu ta nabaliwan babaen iti mangiladawan a titulona. Talaga nga addada agririri maipapan iti pudno a porma ti nagan, ket awan ti mamati a ‘Jehova’ ti pudno a pormana. Ngem adda pategna a kas ti pudno a porma para iti agbasbasa iti Ingles; ket panaglablabes no masukatan dayta iti Yahwé wenno dadduma pay a porma a maus-usar itan wenno saan unay a siuumiso nga us-usaren dagiti mannurat. Patienmi a mabenepisiaran ti agbasbasa iti Ingles a Daan a Tulag nga ita pay la a makitana iti nalatak a bersion ti Bibliana ti nagan a ‘Jehova’ ken maammuanna ti kinapateg ni ‘Jehova’ ken dagiti inaramid ken aramidennanto pay nga agpaay kadagiti tattaona.”

Adu pay nga Ingles a patarus ti Biblia ti agus-usar iti “Jehova” wenno maysa a porma ti nagan ti Dios. Umasping iti dayta, ti personal a nagan ti Dios ket masarakan iti nagadu a saan nga Ingles a patarus. Makita iti daytoy a panid ti dadduma a pagarigan. Imbaga ti Dios ken Moises maipapan iti naganna a Jehova: “Daytoy ti naganko agingga iti tiempo a di nakedngan, ket daytoy ti pakalaglagipan kaniak iti kinapkaputotan.” Sigurado ngarud a di mapagduaduaan ti kinaumiso ti panagusar ita iti nagan ti Dios!​—Exodo 3:13-15.

[Dagiti Ladawan iti panid 31]

Ti Salmo 83:18 kas iti pannakaisuratna iti nadumaduma a pagsasao

Tsonga

Shona

Vietnamese

Espaniol

Hindi

Tagalog

Ingles