Ania ti Mabuya Ita a Kalgaw?
Ania ti Mabuya Ita a Kalgaw?
ANIA ti kayatmo nga aramiden no kalgaw? No dumagaang ti paniempo, mabalin a kayatmo ti rummuar—nalabit tapno agpasiar iti baybay wenno iti parke.
Nupay kasta, dagidiay agar-aramid iti pelikula agpampannurayda iti minilion a tattao a mangbusbos iti adu a tiempoda no kalgaw tapno agbuya iti sine. Adda di kumurang a 35,000 a pagsinean iti Estados Unidos laeng. Kadagiti napalabas a tawen, agarup 40 a porsiento kadagiti napastrek iti takilia iti dayta a pagilian ket nagun-odan kabayatan ti kalgaw. * “Kaasping dayta iti mapastrek no Krismas,” kinuna ni Heidi Parker iti magasin a Movieline.
Saan a kanayon a kastat’ kapigsana. No kalgaw, nakapuy idi ti mapastrek iti takilia kadagiti pagsinean iti Estados Unidos isu nga adu kadagitoy ti nanglimitar iti eskediulda wenno nagserrada iti dayta a tiempo. Ngem idi ngalay ti dekada 1970, dagiti pagsinean nga air-condition ti nangatrakar iti minilion tapno mabang-aranda iti nadagaang a paniempo. Bakasion dagiti ubbing isu nga adda mainanama a napigsa a panguartaan a ginundawayan dagiti agar-aramid iti pelikula. Di nagbayag, naaramiden dagiti pangkalgaw a sine a napigsa iti takilia. * Dayta ti nangbalbaliw iti pannakaaramid ken pannakailako dagiti pelikula kas makitatayonto.
[Footnotes]
^ par. 3 Idiay Estados Unidos, ti maipabuya a pelikula no kalgaw ket mangrugi iti Mayo ken agtultuloy ingganat’ Setiembre.
^ par. 4 Kadawyanna, ti termino a napigsa iti takilia ket agaplikar kadagiti pelikula a makaganansia iti $100 a milion wenno nasursurok. Nupay kasta, nalawlawa no dadduma ti kaipapanan dayta a termino a mangdeskribir iti aniaman a naballigi a pelikula, kasanoman kadakkel ti mapastrekna iti takilia.