Baro a Pagtaengan Para iti Nadunor a Billit-tuleng
Baro a Pagtaengan Para iti Nadunor a Billit-tuleng
“TALAGA kadi a rumbeng a manayonan dagiti asikasuenta?” Dayta ti damo a reaksionko idi nangyawid ni baketko iti billit-tuleng a natnag manipud iti umokna. Idi miningmingak ti agpigpigerger a billit, uray la a naasianak. Ngem pinampanunotko latta no kasano a makalasat daytoy agkakapuy a parsua. *
Idi damo, pinaregtami ti sangailimi a mangan iti napalet a taraon nga insaganami. Ngem kabigatanna, kanayon a naganibaar daytoy bassit a billit-tuleng ta kayatna metten a kanayon a pakanenmi. Mangngeg pay ketdin ti panaganibaarna agingga iti agdan, uray iti ruar ti doble a ridaw ti apartmentmi!
Ti dutdot ti billit ti mangipasimudaag a kabaian daytoy a billit-tuleng. Idi agangay, napasublina ti pigsana ken makatayaben. Ngem uray no inkarigatanmi a pasublien iti dati a pagnanaedanna iti ruar, dina latta kayat! ‘Nalabit mabuteng a pumanaw ditoy balay,’ impagarupmi. Isu a gimmatangkami iti tangkal ket tinarakenmi daytoy bassit a billit-tuleng. Pinanagananmi iti “Spatzi,” maysa a nadungngo a porma ti Aleman a sao para iti “billit-tuleng.”
Naminsan, nangisaganakami iti bassit nga innapuy ta kasla maysa dayta kadagiti paborito ni Spatzi a kanen. Gapu ta medio napudot pay, inyadayo ni baketko sa nangiwara iti sumagmamano a bukel iti sango ni Spatzi. Ania ti reaksion ti billit a tarakenmi? Nagdumog sana intinnag dagiti bukel iti lamisaan babaen iti sippitna! Gapu ta nasdaawkami, nagkinnitakami ken ni baketko ken nagkatawakami. Dagus a nangikabilkami iti bassit a nabaawen nga innapuy iti sango ni Spatzi. Kasla naan-anay a napnek iti dayta!
Ti panangtarakenmi iti daytoy nakaay-ayat a billit ti mangipalagip kadakami iti imbaga ni Jesus kadagiti adalanna: “Saan aya a ti dua a billit-tuleng mailako iti sinsilio a bassit ti pategna? Kaskasdi awan maysa kadakuada ti matnag iti daga a saan nga ammo ni Amayo.” Kalpasanna, imbaga ni Jesus kadakuada: “Dikay agbuteng: napatpategkayo ngem iti adu a billit-tuleng.”—Mateo 10:29-31.
Anian a makaliwliwa a maammuan a makitkita ni Jehova ti rigattayo ken malagipna ti panagibturtayo! (Isaias 63:9; Hebreo 6:10) Wen, ti panangngaasimi iti billit ket maysa laeng a pakakitaan iti panagayat ni Jehova a Dios kadagidiay agserserbi kenkuana.—Naipatulod.
[Footnote]
^ par. 2 Iti dadduma a kasasaad, mabalin a makadangran iti salun-at wenno panagsalungasing kadagiti ordinansa iti lugaryo ti panangasikaso iti masakit wenno nadangran a billit.