Dagiti Agtutubo nga Agsapsapul Kadagiti Solusion

Idi naangay ti maika-17 a Catholic World Youth Day idiay Toronto, Canada, idi 2002, immay ti ginasut a ribu a tattao manipud iti intero a lubong. Nupay saan a nakipaset dagiti Saksi ni Jehova iti dayta a pasken, pinadaananda ti kellaat nga isasangpet ti adu nga agtutubo iti dayta a siudad. Kasanoda a sinaganaan dayta? Kas panangtuladda kadagiti Kristiano idi umuna a siglo, inaprobetsarda ti okasion tapno kasaritada ida maipapan kadagiti Kasuratan.​—Aramid 16:12, 13.

Kinomendaran dagiti Saksi ti panaginteres dagitoy nga agtutubo kadagiti naespirituan a banag. Gapu iti dayta, adu ti nainggayyeman a nakasaritada maipapan iti Kasuratan. Idi adda Saksi a nangimtuod iti maysa a balasang no ania ti namnamaenna iti World Youth Day, kinunana: “Bueno, agingga ita, ti musika ken panagsasala pay laeng ti nabuyami ngem awan pay ti ad-adda a nangpapigsa iti pammatik.”

Ti Saksi intukonna ngarud iti daytoy a balasang ti broshur a napauluan iti Libro Para iti Amin a Tao. Inlawlawagna a sungbatan dayta ti adu a saludsod nga iyim-imtuod ti tattao maipapan iti Biblia, kas iti “Pudno aya a Sao ti Dios dayta?” ken “Kasano nga ammotay a saan a nagbalbaliw sipud idi damo a pannakaisuratna?”

Simmungbat ti balasang: “Nabayagen a pampanunotek dagita a saludsod. Masapul a masungbatanen dagita a saludsodko. Kayatko a basaen a dagus daytoy. Mabalin a dayta ti kapatgan a magunggonak iti daytoy a biahek.”

Maysa laeng dayta iti adu a nakasarita dagiti Saksi kadagiti delegado ti Catholic World Youth Day. No kayatmo met ti maaddaan iti 32 ti panidna a broshur a Libro Para iti Amin a Tao, suratam laeng ti naipakuyog a kahon ken ibusonmo dayta iti adres a makita iti kupon wenno iti maitutop nga adres a nailista iti panid 5 daytoy a magasin.

□ Pangngaasiyo ta patulodandak iti broshur a Libro Para iti Amin a Tao.

□ Interesadoak iti libre a panagadal iti Biblia.