Manipud Kadagiti Agbasbasa

Panagsaur Kayatko a maammuanyo nga apresiarek unay ti serye a “Salaknibam ti Bagim iti Panagsaur.” (Hulio 22, 2004) Adda bassit a negosiok idiay balay, ket maysaak a biktima iti panagsaur. Dagiti riknak ket kaasping kadagiti nadeskribir iti serye​—panagbain, panangsidir ti konsiensia, ken pannakaibabain gapu iti napasamak kaniak. Inaramidko ti eksakto nga imbalakad ti serye. Inaminko ti kamalik, nagkararagak ken Jehova, ken nakisaritaak iti maysa a gayyemko a panglakayen. Babaen iti tulong dagitoy nga artikulo, nabang-aranakon. Anian a bendision!

T. G., Estados Unidos

Panagdenna Sakbay ti Kasar Ti artikulo nga “Agimtuod Dagiti Agtutubo . . . Ania ti Pagdaksan ti Panagdenna Sakbay ti Kasar?” ket makapabileg a tulong kaniak. (Hulio 22, 2004) Ti kapanunotan dagiti agtutubo a nadakamat iti artikulo ket kaasping iti kapanunotak. Ti Salmo 84:11 ti nangnangruna a nakatulong kaniak, a kunana nga aniaman a naimbag ket saanto a medmedan ni Jehova kadagidiay magmagna iti kinaawan pagkurangan.

T. U., Alemania

Kas maysa nga agtutubo, kanayon nga ikagkagumaak ti agbalin a nadalus iti imatang ni Jehova, ngem no dadduma, nagrigat dayta. Daytoy nga artikulo ti nangpabaro iti determinasionko ken nangipalagip a saan la a sisiak ti marigrigatan iti daytoy a lubong ni Satanas. Talaga a makaparegta a maammuan a maseknan unay ni Jehova kadagiti agtutubo.

F. B., Botswana

Langa Kayatko ti agyaman gapu iti artikulo a “No Nalabes ti Pannakaseknan iti Langa.” (Hulio 22, 2004) Agtawenak iti 21, ken talaga a maseknanak ta dakdakkelak ngem iti dadduma. Ita, kayatko a taginayonen ti kinapintas ti kinataok. Kas man la naisurat ti artikulo nga agpaay kaniak!

N. U., Japan

Nakalkaldaang ta iti kaaldawantayo, maipapati kadatayo a rumbeng a maaddaantayo iti kasayaatan a bagi. No dadduma, nagrigat dayta ta masansan a maldaangak no diak madaeran dayta. Ngem kayatko nga itultuloy ti panangikagumaak ket nagdakkel ti naitulong daytoy nga artikulo!

D. P., Alemania

Post-Polio Syndrome (PPS) Pagyamanan iti kapadasan ni Jack Meintsma iti artikulo nga “Apaman a Maapektaran, Maapektaranto Manen.” (Hulio 22, 2004) Nagsagabaak iti polyarthritis iti napalabas a 23 a tawen ngem addaanak kadagiti sintoma a kaasping iti nadakamat ti artikulo. Kayatko ti agyaman ken ni Kabsat Meintsma gapu iti impormasion nga inranudna maipapan kadagiti makatulong nga alikamen ken no kasano a kissayan ti panagbannog dagiti naapektaran a masel.

U. K., Austria

Naaddaanak iti polio idi agtawenak iti dua ket kagudua ken PPS idi agtawenak iti 25. Saan nga ammo dagiti doktor daytoy a sakit, isu a narigatanda a nangdayagnos iti dayta. Sakbay a binasak daytoy nga artikulo, awan pay a pulos ti ammok a kasta a nalawag nga impormasion maipapan iti daytoy a suheto.

J. E., Francia

Naaddaan ni nanangko iti poliomyelitis idi innem ti tawenna. Nakatulong kaniak ti umiso a panangdeskribiryo iti sakit tapno maawatak ti kasasaadna.

T. V., Italia

Naaddaanak iti polio idi 18 a bulanak pay laeng, ket saan unay a nakaro ti kasasaadko no idilig ken ni Kabsat Meintsma. Nupay kasta, nakapsutak gapu kadagiti nakapuy a maselko. Ti artikulo ti nakatulong kaniak a mangtarus no kasano a kontrolen ti pigsak. Ti kangrunaan a naitulong kaniak ti artikulo ket ti pannakabasak a makitkita ni Jehova ti kasasaadko ken maseknan!

L. J., Estados Unidos