Manipud Kadagiti Agbasbasa

Panagsursuro Maysaak a maestra ket kabasbasak ti serye ti akkub nga “Agtutubo Wenno Nataengan​—Makaparagsak ti Agsursuro.” (Agosto 8, 2004) Masmasdaawak a kanayon no kasano a makaputarkayo kadagiti artikulo a nagababa, naglawag, ken praktikal unay. Talaga nga apresiarek ti panangparegtayo iti amin a tattao aniaman ti edadda tapno agsursuro.

F. S., Italia

Idi addaakon iti maikadua a tawen iti haiskul, naglidayak agsipud ta binaybay-andak dagiti dadakkelko nga agadal a bukbukodko babaen ti panageskuelak iti pagtaenganmi. Ita ta agtawenakon iti 20, naragsakak ta magustuak manen ti agadal. Ti panagbasa iti daytoy a serye ket maysa a palagip nga amin a tattao mabalinda a magustuan ti agadal aniaman ti kasasaadda.

N. G., Estados Unidos

Marigatanak iti inauna nga anakko nga agtawen iti pito. Kasla dina kayat ti agbasa kadagiti libro, agisagana iti leksionna, ken agsursuro kadagiti Nakristianuan a gimong. Panggepko nga iyaplikar ti pammagbaga iti daytoy a serye.

M. O., Japan

Maysa kadagiti singasing iti artikulo ket agrepaso iti apagbiit kalpasan ti panagadal, yantangay gagangay a malipatantayo dagiti kalkalpastayo nga inadal. Agad-adalkami ken ni baketko iti Hindi tapno makatulong iti ministeriomi iti komunidad dagiti Indian. Para kaniak, makatulong ti panangisurat kadagiti baro a sasao. Kalpasanna, no adda wayak, kitaek dagita a sasao. Dayta ti makatulong tapno mayukuok iti panunotko ti kalkalpasko nga inadal.

E. T., Estados Unidos

Agtawenak iti 56, ket nabuangay ti grupo ti panagsenias iti kongregasionmi. Nupay limitado ti abilidadko, nakitimpuyogak iti daytoy a grupo agsipud ta kayatko ti tumulong. Idi madanaganak no talaga met laeng a kabaelak ti tumulong, binasak daytoy a serye. Talaga a naparegtaak iti impormasion iti subtema a “Saanka Pay a Duduogan nga Agsursuro” ken ti maudi nga artikulo. Timmuredak manen a mangaramid kadagiti bambanag iti bukodko a kapartak ken itultuloyko ti makikadua iti sign-language a grupo.

R. N., Japan

Dagiti Nasileng a Magasin Kayatko a maammuanyo a para kaniak, mamagpanunot ti artikulo a “Dagiti Nasileng a Magasin​—‘Piduten ken Gatangendak!’” (Agosto 8, 2004) Diak pulos impagarup no kasano a dagita a magasin maapektaranda ti maysa a tao. Nagustuak ti punto a ti “artipisial a kinasinged”​—pannakabigbig iti rupa ngem saanmo pay a naam-ammo a mismo dayta a tao​—ket mabalin a mangabbukay iti rikna ti tattao gapu iti ipapatay ti maysa a dida pay naam-ammo. Naminsan idin a nabiktimaak iti daytoy! Interesado itan ti balasangko iti sumagmamano a magasin. Pagsaritaanminto a dua daytoy nga artikulo.

S. M., Estados Unidos

Langa Kayatko ti agyaman kadakayo gapu iti artikulo a “No Nalabes ti Pannakaseknan iti Langa.” (Hulio 22, 2004) Kasla naisurat nga agpaay kaniak. Agtawenak iti 19, ket nakalkaldaang ta medio napaut metten nga adda sakitko a nainaig iti pannangan. Saan a nalaka nga agasan daytoy a sakit. Pagyamanan gapu kadagiti artikulo a mangilawlawag kadagiti suheto a kas kadagitoy. Pagpanunotendak a naimbag maipapan iti dayta a banag, ket sapay koma ta matulongandak a mangrisut iti parikutko.

G. L., Italia

Crossword Pagyamanan kadagiti nagsayaat a crossword puzzle. Tultulongandak a mangammo a naimbag ken Jehova a Dios ken iti Biblia. Agtawenak iti siam.

I. C., Alemania

Kastoy ti sungbat ti “Agriingkayo!”: Ti pannubok nga “Ammoyo Kadi?” a naibasar iti Biblia ti makita iti ruar ti “Agriingkayo!” iti dadduma a pagsasao nga awanan iti crossword puzzle.