Panangdaer iti Kanser ti Kudil

NI Jeremiah nga agtawen iti 51 ket maysa nga Australiano a kaputotan ti taga-Ireland. Gapu ta lumabaga ti buokna ken napudaw ti kudilna, kunaen ti dadduma a “lunod kadagiti Celt” dayta. Insalaysayna: “Kas iti kaaduan nga Australiano, masansan idi a rummuar ti pamiliami, nangruna kadagiti ngudo ti lawas ken panawen ti bakasion. Kas maysa nga ubing, masansan idi nga aglangoyak iti swimming pool iti likudan ti balaymi wenno agpayanod kadagiti allon ken agay-ayam iti cricket iti aplaya iti Gold Coast, iti abagatan ti Brisbane. Masansan a swimming trunk laeng ti suotko.”

Kinuna pay ni Jeremiah: “Bayat ti kinatin-edyerko, awan pay ti magatang a nasamay a losion. Kanayon idi a mayan-anunsio ken maiparparegta kadagiti tattao ti panagusar iti mangpakayumanggi a lana ti niog tapno maaddaanda iti langa a kas iti kayumanggi nga Australiano a mangarayat kadagiti lumalangoy. Bassit pay idi ti ammomi maipapan iti panangdadael ti init iti kudil. Gapu laeng iti kanayon a nasaniit a pannaka-sunburn ti kudilko a liniklikak ti nakaro a panagkainaran tapno masalakniban ti bagik.” Ngem nadangranen dayta. “Adu ti nagtubo a siding iti bukot ken barukongko gapu ta iti adu a tawen, nakauksobak nga agkainaran. Limmitem ken dimmakkelen dagitoy, nangruna iti barukongko.”

Sipud idi, addan tallo a melanoma nga impaikkat ni Jeremiah agraman ti adu a basal cell carcinoma. Gapu iti daytoy, binaliwanna ti nakairuamanna nga aramiden. Kinunana: “Sakbay a rummuarak iti inaldaw, aglosionak iti pangpaling-et ken pangsalaknib iti init. Agkallugongak itan iti kaaduan nga aldaw iti kalgaw manipud alas 9 ti bigat agingga iti alas 4 ti malem.” Kada  tallo a bulan, agpakonsultaak met iti dermatologist wenno doktor ti kudil.

Inlawlawag ni Jeremiah no ania ti nakatulong kenkuana a nangdaer iti parikutna: “Inikkannak ni Jehova a Dios iti napasnek a pammati a maimbaganak idinto ta impagarup ti dadduma a mabalin a matayak iti aniaman a tawen. Maibatay iti mainanama a 20 a tawen a kapaut ti biag ti adu nga addaan iti melanoma, imbaga ti dadduma a dandaniakon matay. Napadasak a mismo ti anag ti imbaga idi ni Ari David: ‘Saranayennakto ni Jehova a mismo iti idda ti panagsakit; isuamin a pagiddaak pudno unay a baliwamto bayat ti panagsakitko.’”​—Salmo 41:3.

Ni Maxine ti sabali pay nga agsagsagaba iti kanser ti kudil. Bayat ti kinaagkabannuagna, ti napudaw a ni Maxine ket naibaon idiay Tropiko kas misionera. Immuna a naidestino idiay Dominican Republic sa kalpasanna idiay Puerto Rico. Iti 20 a tawen a kinamisionerana, kanayon a mainaran iti kaaduan nga aldaw iti ministeriona a panagbalaybalay. Maysa pay, kaay-ayona ti agkainaran. Kalpasanna, idi 1971, adda natakuatan a basal cell carcinoma iti rupana. Naagasan babaen iti radium ken naopera. Simmaruno a nasukatan met ti kudilna tapno matarimaan ti nadadael. Nupay kasta, nagtultuloy a nagparang dagiti selula nga addaan iti kanser.

Inlawlawag ni Maxine: “Ti parikut ket masansan a saan a mailasin dagiti selula nga addaan iti kanser, isu nga umad-aduda. Mabayag ken makapasikor dayta a tiempo​—agarup 30 a tawen nga agsublisubliak kadagiti doktor, klinika, ken ospital. Di kumurang a naminsangapulo a naopera ti rupak, malaksid pay iti ipapanko iti klinika tapno maagasan ti kanser babaen iti dadduma a pamay-an.” Ita, ti Mohs surgery, a nasamsamay a mangikkat kadagiti selula nga addaan iti kanser, ti kabaruan a pangag-agas iti agtawenen iti 80 a ni Maxine.

Gapu ta agsublisubli ti kanser ti kudilna, binalbaliwanen ni Maxine ti pamay-an ti panagserbina kas misionera. Mangasaba iti rabii tapno saan a mainaran. Ania ti nakatulong ken Maxine tapno makadaer? “Maysa ti panagtalinaed a positibo. Ammok nga agtultuloy nga agparang dagiti selula nga addaan iti kanser isu a masapul nga agpadoktorak manen. Akseptarek dayta. Ikagumaak a di ay-ayen ti bagik wenno agladingit maipapan kadagiti pakasuotak. Saan a dagitoy ti mangikkat iti rag-ok iti ministeriok. Kabaelak pay laeng ti makisarita iti sabsabali maipapan iti Pagarian ni Jehova. Sa namnamaek ti agnanayon nga iyiimbagko iti asidegen a masanguanan iti baro a lubong. Sumalibukagakton ken awanto metten ti pakapilawan ti rupak.”

Wen, dagiti addaan iti kanser ti kudil ken dagiti addaan iti sabali a sakit segseggaanda ti aldaw inton matungpal ti nailanad iti libro ni Job: “Ti lasagna agbalin a nasalsalibukag ngem iti kinaagtutubo; isu agsubli kadagiti aldaw ti kired ti kinaagtutubona.” (Job 33:25) Agingga a dumteng dayta a tiempo, agannadtayo amin iti peggad ti nalabes a panagkainaran ket ikagumaantayo a salakniban ti kudiltayo.

[Dagiti Ladawan iti panid 9]

Impaikkat ni Jeremiah ti adu a kanser ti kudilna, agraman ti tallo a melanoma. Ngem positibo latta ken mangin-inanama

[Dagiti Ladawan iti panid 10]

“Iti baro a lubong . . . , sumalibukagakton ken awanto metten ti pakapilawan ti rupak.”​—Maxine