‘Rumbeng a Pagpannakkelyo Daytoy’

BIGBIGEN dagiti pudno nga adipen ti Dios ti kinapateg ti kinamapagpiaran. Ti panagayatda iti Namarsua kadakuada ti mangtignay kadakuada nga agbalin a kasta. Alaenyo a pagarigan ti napasamak ken ni Lázaro. Nabiit pay idi isu ket empleado iti maysa nga otel idiay Huatulco, Mexico, nakasarak iti 70 a doliar a naregreg iti koridor. Insigida nga intedna dayta iti agserserbi a manedyer iti dayta nga aldaw. Sumagmamano la nga oras kalpasanna, adda pitaka a nakitana iti banio. Inyawatna dayta iti adda iti reception desk wenno pagawatan kadagiti bisita, isu a naragsakan ti nakapukaw iti dayta nupay nasdaaw.

Naammuan ti general manager dagitoy a napasamak, isu a sinaludsodna ken ni Lázaro no ania ti nangtignay kenkuana a mangisubli iti kuarta ken iti pitaka. Imbaga ni Lázaro a dagiti moral a prinsipio a nasursurona iti Biblia ti nanglapped kenkuana a mangala iti aniaman a dina kukua. Iti surat ti panangapresiar, imbaga ti general manager ken ni Lázaro: “Manmano itan dagiti tattao a mangsalsalimetmet iti nangato a moral a prinsipio. Padayawandaka gapu iti kababalinmo. Impakitam a mapagtalkan ken mapagwadanka kadagiti katrabahuam. Rumbeng a pagpannakkel ti pamiliayo daytoy.” Napili ni Lázaro kas naisangsangayan nga empleado iti dayta a bulan.

Impagarup ti dadduma a katrabahuan ni Lázaro a di umiso ti panangisublina kadagiti napidutna. Ngem idi nakitada ti panangapresiar ti amoda, pinadayawanda ni Lázaro gapu iti panangsalimetmetna iti moral a prinsipiona.

Idagadag ti Biblia kadagiti matalek a pasurot ni Jesus nga ‘agaramidda koma iti naimbag kadagiti amin’ ken ‘agbiagda a mapagtalkan iti amin a bambanag.’ (Galacia 6:10; Hebreo 13:18) Awan duadua a ti panagbalin a mapagpiaran kas Kristiano ket pakaidayawan ti isursuro ti Biblia a “nalinteg ken napalungdo” a Dios a ni Jehova.​—Deuteronomio 32:4.