Dayta ti Nangtignay Kenkuana a Maaddaan iti Biblia

Idi a ti Russia ket inturayan dagiti Komunista a diktador, naiparit ti panagbasa iti Biblia. Nupay kasta, kadagiti kallabes a tawen, naiwaras dagiti Biblia iti dayta a pagilian. Ipalgak ti maysa a surat a naawat ti sanga nga opisina dagiti Saksi ni Jehova idiay Russia no apay nga interesado manen dagiti tattao iti Biblia. Kastoy ti ilawlawag ni Sergei, maysa nga asawa ken ama idiay Volgograd​—maysa a dakkel a siudad a dinekdekada a napanaganan iti Stalingrad, a naipasurot iti nagan ti Soviet a diktador a ni Joseph Stalin:

“Nabiit pay nga immay ditoy balayko dagiti pannakabagi ti organisasionyo. Siraraem a dinamagda no mamatiak iti Dios. Imbagak a tunggal tao, uray kaskasano, ket mamati iti Dios. Idi imbagak a kasadoakon ken addaanak iti maysa nga anak, maysa kadagiti sangaili ti nangiruar iti bag-na iti libro a Ti Sekreto ti Kinaragsak iti Pamilia sana inted kaniak.”

Idi agangay, rinugian ni Sergei a basaen ti Biblia. “Talaga a nagustuak,” kinunana. “Nabatad a ti libro ket insurat dagiti nasaririt ken napasnek a tattao. Kaaduanna, pagduaduaak dagiti narelihiosuan nga organisasion, ngem para kaniak, napudnokayo. Iti maudi a panid ti libro, nakitak ti adresyo.” Isu a nagsurat ni Sergei iti dayta nga adres ken nagkiddaw iti Biblia.

Dagiti prinsipio a makatulong tapno agbalin a naragsak ti pamilia a naibalabala iti libro a Kinaragsak iti Pamilia ket naibasar kadagiti pannursuro ti Biblia. Karaman kadagiti makaisuro a kapitulona ket “Sanayenyo ti Anakyo Manipud Kinamaladaga,” “Salaknibanyo ti Pamiliayo Kadagiti Makadadael nga Impluensia,” ken “Taginayonenyo ti Talna iti Sangakabbalayanyo.”

Mabalinmo ti agkiddaw iti kopia Ti Sekreto ti Kinaragsak iti Pamilia no suratam ti naipakuyog a kupon ken ibusonmo dayta iti adres a makita iti kupon wenno iti maitutop nga adres iti panid 5 iti daytoy a magasin.

□ Kayatko ti maaddaan iti libro a Ti Sekreto ti Kinaragsak iti Pamilia.

□ Interesadoak iti libre a panagadal iti Biblia.