Manipud Kadagiti Agbasbasa

Kinalupes Nupay saanak a nangala iti kinadoktor, nagustuak a binasa ti serye a “Kinalupes​—Dagiti Remedio, Dagiti Isyu.” (Setiembre 22, 2004) Makaparagsak a maammuan nga ipatpateg unay ni Jehova ti biag ti tao. Ti nainkalintegan a pannakailawlawag dagiti isyu a nairaman ti makatulong iti maysa a tao tapno ad-adda nga agtalek kenkuana. Adu a tattao iti teritoria ti kongregasionmi ti naragsakan nga immawat iti daytoy a magasin.

V. P., Russia

Inkagumaanmi ken ni lakayko ti maaddaan iti annak kalpasan la unay ti panagkallaysami. Ita ta adun a tawen ti napalabas, sarsarangtenmi dagiti isyu a nailawlawag iti daytoy a ruar. Makaliwliwa unay a maammuan a mangipapaay ni Jehova iti taraon iti umiso a tiempo. Talaga a nagsaem idi ken uray ita ti mabagaan a saankami a mabalin a maaddaan iti anak. Ngem babaen iti panagsirarak ken babaen iti daytoy nga artikulo, naliwliwaak a makaammo a saan la a dakdakami ti adda iti kastoy a kasasaad. Ibilangmi a maysa a pudno a bendision ti panangipaaymi iti panawenmi nga agserbi a naan-anay ken ni Jehova.

T. O., Estados Unidos

Vitiligo Pagyamanan unay iti artikulo nga “Ania ti Vitiligo?” (Setiembre 22, 2004) Lima a tawenen nga addaanak iti kastoy a sakit. Ngem nasaysayaaten ti panangdaerko iti dayta sipud idi impablaakyo daytoy nga artikulo. Maragsakanak ta maysaak a kameng ti Nakristianuan nga organisasion a talaga a maseknan iti tunggal maysa kadakami!

C. H., Alemania

Makariribuk ken makapadanag ti panangibturko iti vitiligo. Isursuronatayo ni Jehova nga agbalin nga ad-adda a mannakipagrikna iti sabsabali. Segseggaak ti tiempo inton agsubli ti natural a kolor ti kudilko.

B. W., Estados Unidos

Agsagsagabaak iti vitiligo iti napalabas a 25 a tawenen. Makaliwliwa unay a maammuan a saan la a sisiak ti agsagsagaba iti kasta a saem. Adu a tattao ti addaan iti di umiso nga impresion maipapan iti daytoy a sakit, ngem babaen iti daytoy nga artikulo, makagun-odda iti umiso a pannakaawat. Pagyamanan unay iti panangilawlawagyo iti daytoy a suheto!

K. S., Japan

Naapektaranak iti daytoy a sakit iti dandanin 30 a tawen. Idi ubingak, um-umsiendak dagiti kapatadak gapu iti langak. Nasursurok a daeran daytoy a sakit. Kas ken Sibongile, inkeddengko a paregtaen ti sabsabali maipapan iti kari a nailanad iti Biblia nga asidegen nga ikkaten ni Jehova ti amin a sakit ken dagiti kakuykuyogna a danag a pakaigapuan ti nakaro a kinasaem.

J. M., Czech Republic

Ti balasangko nga agtawen iti 19 ket addaan iti kastoy a sakit. Awan ti makaammo no kasanon kasansan ti panagsangitna ken ti panangikararagnan iti dayta ken ni Jehova. Ay-ayatenna ni Jehova ket itay nabiit, nagbalinen nga amin-tiempo a managebanghelio. Agyamankami ta mangipabpablaakkayo kadagiti artikulo a kas iti daytoy agsipud ta iparpariknana ti panangaywan ni Jehova kadakami.

S. S., Japan

Maysaak nga amin-tiempo a managebanghelio. Diak mayebkas ti kasta unay a saem a mariknak no mingmingandak dagiti sabsabali ken maariekda a mangalamano wenno mangarakup kaniak gapu iti nagbalbaliw a kolorko. Naliwliwaak unay gapu iti kasta a nadungngo ken maikanatad nga artikulo. Pagyamanan iti panangipaawatyo iti sabsabali a saan a makaakar ti sakitmi ken iti panangisuroyo kadakami a maseknan ni Jehova kadakami.

C. S., Estados Unidos